موضوع (الشايب ) انحل ولا انحل

انا نزلت موضوعي قبل كم يوم
http://forum.hawaaworld.com/showthread.php?t=1764646
اخوي جاب امام المسجد ( الله يجزاها خير اللي عطتني هالنصيحه )
بس للأسف امام المسجد قهرني ... قال نادوها ابغى اكلمها وقفت جنب الباب ... وهو عطاني ظهره وقاعد ينصحني
وبغيت انفجر من البكاء والقهر
يقول لي هذا الرسول صلى الله عليه وسلم تزوج عايشه وعمرها 9 سنين وهو عمره 50 سنه
وما فيها شي لو توافقين على هالرجال انا اعرف زين هو محافظ على الصلاة وصاحب اموال وراح يعزك ويكرمك
ومن جاءكم من ترضونه خلقا ودينا فزوجوه
رديت عليه وما فهمني لاني قاعده ابكي وكل شوي يقولي نعم نعم نعم واخوي يرد عني
وقال لاخوي انت اسكت انا باسمع منها
مسكت نفسي وقلت بصوت عالي انا كااااااااااارهته كاااااااااارهته حرام تظلموني مع هالشايب حرام
ولا تشبهه بالرسول هذاك الرسول صفوة الخلق وهذا قطعه شايب طماع ويحب الدنيا ولا وش له بهالدنيا وهذا عمره
قال له اخوي احنا نبغاك عون وانت صرت فرعون ... قال انا انصحها واذكرها بهدي الرسول ... قال له اخوي هدي الرسول البنت تستأذن مو تجبر ...
راح الامام وكلم ابوي .. قاله ابوي هذا جارنا له فضايل علينا ما نحصي عددها وله اكثر من 8 سنين وهو يخطبها وانا ما شفت عليه شي ينعاب غير انه رجال كبير وبس .. وروحه شبابيه .. بس هي معنده وراسها يابس في كل مره يتقدم يطلب يدها احاول فيها وهي ترفض ...
قال الامام لا تغصبها وتظلمها والظلم ظلمات يوم القيامه .. يوم جا الامام يطلع لحقه اخوي وقاله كلمت ابو ...( اللي هو الشايب )
قال ايه كلمته ... وقلت له اخطب اي وحده ثانيه البنت ما تبيك ... شف الخطابات انت بس اطلب اوصاف العرس اللي تبيها وهي تجيبها لك
قال لو تعرضون علي بنات الدنيا كلهن ما بغى غيرها ...... استغفر الله ... حسبي الله عليه
قال له لو تتزوجها غصب الزواج بااااااااطل في حكم الشرع
قال الشايب أنتم يهالجيل الجديد تجبون لنا علوم ما سمعناها من اجدادنا ( شوفوا الجهل والتخلف والرجعيه )
يعني امور الدين صارت علوم جديده بنظره انها مالها داعي حسبي الله متخلف رجعي
قال الامام المهم انا حذرتك وراح ابلغ عليكم لو اجبرتوها واخوها بيساعدنا في الموضوع
يابنات ابوي صار طرف صامت بس يفكر وساكت الله يستر من سكوته ما يطمن شكله يخطط على شي
ولد عمي كان بيجي ويخطب بس قال له اخوي انتظر نشوف الامام اذا الاوضاع تمام خلاص لا تخطب وتورط نفسك
واذا الامور تعقدت ما فيه الا انك تخطبها وبعدين تفسخ الخطوبه
ولد عمي تهور وقوم الدنيا وقعدها اتصل على الشايب وهدده واتصل على اخوانه وهددهم وصارت بينهم مشاكل الله يستر من آخرتها
المشكله ان ولد عمي يحب المشاكل وفزاع من الدرجه الاولى راح يجمع في هالشباب حقين المضاربات والمشاكل الله يستر لو يصير شي باكون انا السبب انا لله وانا اليه راجعون
اخوي يقول صارت مناشبات بين اصدقائه وعيال الشايب وعيال اخوانه .... امي قامت تبكي وقالت وش دخل اصدقائك بالموضوع أنت وين بتوصلها ... قال لها حتى ولد عمي جاب شلته ....
يارب استر يارب استر أنا لله وانا اليه راجعون الموضوع تشربك وتعقد وفي نفس الوقت انحل جزء واللي ريحني انو الامام راح يبلغ وهو يتابع الموضوع
لا الـــــــــــــــــــــــــــــــــــه الا اللــــــــــــــه
بس جالسه في غرفتي ما يدخل علي غير امي واخوي
كلما دخلت امي حسيت قلبي في حلقي واستعجلها بالكلام
وكلما دخل اخوي احس اني باموووت من الخوف اخاف اسمع اخبار شينه... واخوي يدخل وهو يضحك عشان يطمني ان الاخبار حلوه
بس اكتشف انه ما صار شي جديد .. كلما دخل الغرفه يضحك ويقولي ابشرك افرح بس لا تكلم حزنت
انا الله وانا اليه راجعون ... اليوم طلعت صدقه وهذاني استغفر ليل ونهار ... استغفر الله
دعواتكم دعواتكم