تنظيف الاذن
موضوع مقرف بس ضروري ف اللي توه ماكل ياخذله لفه وايرد مره ثانيه ،،
ارتأيت اعرض هل الموضوع لان احنا نستخدم بالعادة طرق خاطئة في تنظيف الاذن ،،
الصور من تصويري وان شاء الله الشرح يكون واضح ،،
الطريقه اليديده والجديمه في نفس الوقت لتنظيف الاذن هي استخدام
اعواد الشمع
تحتاجون هل الادوات
1) عود جبريت
2) قلاص فيه ماي عادي
3) واعواد الشمع
اعواد الشمع اتحصلونها في الصيدليات اللي اتبيع الاشياء الطبيعيه/ العضويه ، شخصياً اشتري من محل ستي سنتر الشارقه في الطابق الارضي نسيت اسم المحل او اتحصلونه من نيوترشن زوون ، سعره في نيوترشن زوون 99 درهم مب 100 المهم ، وايكفي ل 3 اشخاص او 3 مرات استخدام يعني 9 اعواد ،،
الاستخدام
اسدحو الشخص اللي تبون اتجربون عليه في الارض ، وحطو ورى راسه مخده صغيره ،
حطو العود عمودياً بحيث الجزء الاحمر منه يدخل الاذن على الخفيف ( مب اتبطون الاذن ولا اتحطونه وااايد بعيد ، يعني دخلوه بطريقه طبيعيه ) وولعو جبريت على الجزء الثاني الطويل ،
وتتريون وتتريون وتتريون لحد م النار توصل للخط اللي لونه احمر ،،
وعلى فكره
عمود الشمع في هل الجزء الاحمر اللي علمت عليه ما بيطيح على الاذن لكن بيذوب وبيتم في مكانه ما في اشياء بتتساقط على الشعر او الجسم ،،
لكن في ناس من باب الحذر والحيطه ايحطون قصدير او ورق او صحن ويغرسونه في العمود بحيث ايكون حائل دونما المصائب ف الأفضل اتحطونه عشان تتطمئن قلوبكم ،،
مثال (صور من الانترنت)
لما يحترق الجزء الاحمر ، على طول شلو العود وطفوا الجزء المولع مع ابقاء الجزء الثاني من العود جافاً عشان تتفرجون على الاشياء المتلتله اللي بتطلع ،،
انيي للجد افتحو الجزء الجاف مثل ما تفتحون السندويشه وبتلقون اشياء عجيبه
هل اللي بيظهر لكم
اني للشرح
اللي بالدائرة الحمره: هذا الشي على شكل مروحه او مصفاه ، وظيفتها اتركز الهوه الداخل للاذن و المتكون من النار ،
اللي بالدائرة الزرقه والصفره : هذا صمغ الاذن اللي بغينه انظفه من الاساس ، الصمغ يختلف حجمه حسب العمر وحسب مرات الاستخدام ، لونه ايكون برتقالي فاتح بالاضافه ل كويرات صغيره باللون البرتقالي الغامج ، بنت اختي الصغيره من كم شهر مسويه التنظيف ف الحجم وايد صغير ، واللون برتقالي فاتح ، اما اذا بتجربون على كبار السن او اي شخص كبير بتحصلون اللون فاتح بالاضافه الى كويرات صغيره باللون البرتقالي الغامج، وهل الصمغ الاخير هو المؤذي والمزعج ،،،
وبهذا تنتهي عملية التنظيف ، اعرف لوعت عليكم بس الشغله مفيده
الحين اني للتحذير
اليهال واااااااااايد يتحركون ففي خطر انه يحترقون او يحرقون البيت فالحذر الحذر ،، وانصح اللي يمسك العود شخص بالغ مب هو نفسه يمسك العود ،،
انصح بعدم الاستخدام المتكرر ، استخدم هل الطريقه من فتره لفتره ، يعني كل 3-4 اشهر ،او حين الحاجه لان الانسان بحاجه لصمغ الاذن العاديه ، بس احيانا في كتل اتعيق السمع ف الافضل ازالتها ،،
اتمنى اني وفقت في الشرح و توصيل المعلومه ، وأرحب بأي استفسار ، استفهام ، استهزاء
منقول للفائدة
و ياليت اللي تعرف أين أستطيع الحصول على هذا الشمع بالسعودية تقولي
و اللي جربته تعطينا تجربتها
و هل يصلح للأطفال