موضوع مهم لزرع الرحمه و التآلف في الاسرة السعوديه عازبات ومتزوجات

السلام عليكم ورحمة الله وبركاته
:27:

الهم لك الحمد حتى ترضى ولك الحمد اذا رضيت ولك الحمد بعد الرضى

اللهم اغفر للمؤمنين والمؤمنات والمسلمين والمسلمات الاحياء منهم والاموات

الان بترديد هذا الاستغفار كسبتي حسنات

عيدكم مبارك

وعاد عيدكم وتجدد جديدكم

خواتي وحبيباتي

يعلم الله اني ما كتبت هالموضوع الا بعد عاصرت مشاكل كثيره للاسر

وحلها سهل وهو الاحساس بالشخص الاخر والرحمه

الموضوع يخص

بنات البيوت

سواء كانت بنت او ارمله اومطلقه

باطفال او بدون اطفال
وتكون عايشه ببيت اهلها

تدرون وش تتحول

تتحول الى خدامه للطبخ وللتنظيف ولزبالة الضيوف اذا راحوا :angry:


وللا سف اللي يساعد بهالشي هو الاخوات خواتها اللي من لحمها ودمها

انتي اقرب وحده لاختك

ليش ماترفعين الظلم عنها

اذا عند الاهل قدره ماديه استقدموا خادمه
واذا ماتقدرون

على الاقل يالاخت العزيزه
اذا جيتي لبيت اهلك وجبتي عيالك جيبي خدامتهم معهم , يعني ببالك اذا جيتي لاهلك وقضيتي وقت سعيد الا هو وقت تعيس لاختك اللي بالبيت
من بينظف الاعصار اللي سووه عيالك
اكيد بيكون
اختك المسكينه اللي قاعده بالبيت لازواج ولا وظيفه
او اختك المسكينه الارمله اللي انكسرت فرحتها وهي بعز شبابها
او اختك المسكينه اللي اخذت واحد مايستاهلها وتحملت وبالاخير طلقها

اتقي الله
وتاكدي الدنيا دواره مثل ماصار فيها يمكن يصير فيك

وخذوا عظه من احوال هالايام بعض الشخصيات العام كانت بقمة عزها والسنه صارت بقمة ذلها
لا اله ا الله

وبعدين ياحبيبتي يالمتزوجه انتي جايه لبيت اهلك من قال انك ضيفه قومي وساعدي وشيلي وحطي

ولا تجين وايدك فاضيه جيبي معك شي

اذا ماتبين تعتبريها واجب اعتبريها صدقة وصله

خصوصا ان معك اطفال والاطفال يبون كل شي الله يحفظم ويبارك لهم


وابي اعرف انتي ماعندك احساس لماتشوفين امك تجيب القهوه وتحط العشاء وانتي منسدحه

واذ رحتي لبيتك امك المسكينه تبلش بوصاخة البيت بعد عيالك

امك بعد هالعمر محتاجه الهدوء والراحه

ماتبي تكون خدامه لك ولعيالك وهي بقمة انهاكها وتعبها

لا والادهى تجتمعين انتي وخواتك

ورجل على رجل وامك وخواتك اللي بالبيت يخدمونكم

والله عيب وشي يشق الصدر

عشان كذا انا كتبت هالموضوع

تكفون ياخوات ارحموا بعض ارحموا خواتكم اللي بالبيت ارحموا امهاتكم

تذكريها دايم بملغ شهري وحطي لها خدامه تريحها اذا عندك قدرة ماديه

واذا جيتي لبيت اهلك لايردك الا المطبخ اخدمي نفسك واذا ماعندك شغاله
قبل تطلعين شيلي وصاخة عيالك

هذا بالنسبه للام وبالنسبه للاخت

انتي تعرفين ان اختك محبوسه بالبيت

اعزميها لبيتك اذا عندك دورية حريم يمكن احد يشوفها ويذكرها وتتزوج زوج صالح وليس اي زوج

او حتى عشان تغير جو

واذا طلعتي مشوار مريها فرحيها

من تبين يطلعها ابوك المريض ولا اخوك المراهق اللي مايحس بالمسؤليه

ولا اخوك المتزوج اللي زوجته ماتبي احد


وموضوع مهم لحريم الاخوان ترى انتي تزوجتي ولد هاالعايله

بس ماشريتيه وموب ملكك

هذا الولد له ام وخوات

اذا رحتوا عمره مري ام زوجك وخواته اللي ماتزوجن ترى مالك الا اجر ومثل ماتسوين رح احد يسوي لبناتك

واذا سافرتي

انا ماقول خذوهم كل سفره لا

سفره لك ولزوجك وسفره مع اهله


ارجوكم حسوا ببعض وارحموا بعض


البيوت مليانه ماسي :44:


البنات يشتكون من خواتهم المتزوجات

تقول اختي بدال ماترحمني وتخفف عني وتساعدني اطلع اغير جو

لا تجي لبيت اهلي وماتطلع الا البيت صاير كنه مخلفات مباني
والادهى احيانا تجيب صديقاتها

عشان ماتتعب بالضيافه

وعشان عندها من يخدم وهي حاطه رجل على رجل

البنات يعانن وبشده
خصوصا اذا كانت يتيمة الام او الابوين
خلاص وضعها يصير على شرف جرف هار
وكل من يظلمها ويتحكم فيها واولهم خواتها المتزوجات

البنت خلاص بتهج من البيت
وتتزوج اي واحد

واذا تزوجت لان الزواج من بدايته غلط تطلق

وترجع الماساة مضاعفه


اتمنى اني بهالموضوع قدرت اني ارفع الظلم عن فئه ليست قليله

وانبه الاخوات المتزوجات لاشياء يمكن مانتبهولها لكنها تقتل غيرهم

وزوجات الاخوان لحقوق ام الزوج واخواته وتذكري انتي يمكن يفرق بينك وبين زوجك الطلاق لكن هم اهله طول العمر

ونفس ماتسوين فيهم رح يصير لك صدقيني

والله من وراء القصد

اتمنى من اليوم نتغير كلنا نعيد حساباتنا

خصوصا اننا بعيد والاجتماعات تكثر

حاولي انك اذا ماسويتي خير

على الاقل لاتسوين شر وتظلمين غيرك او بمعنى اوضح

اذا ماجا منك خير لا يجي شر

خلي الناس تفقدك وتذكرك بالخير وتدعيلك

دايم سوي خير واحتسبي الاجر من الله


والله يحفظكم ويرعاكم ويوفقكم دنيا واخره ويرزقكم من حيث لا تحتسبون

ويبارك لكم في كل شي واياي وجميع المسلمين

اللهم لا تدع مريضا الا شفيته و لاعاطلا الا وظفته والا ايما الا زوجته ولا عقيما الا ذرية صالحة رزقته

اللهم امين