موعارفة اتصرف مع زوجي ..

السلام عليكم ورحمة الله وبركاته ..


حبيباتي انا ماكنت احب اكتب هنا أي كلمة وانا توي عروس بس متضايقه مرة من نفسي وماابي اتكلم او اقول اي حاجة لا لصديقة ولا لأمي انا تزوجت علشان اريح امي واكمل نص ديني واخترت الحمدلله انسان ناجح بس عندي كم مشكله مو قادرة اتجاوزها ..

اسمحولي على الاطالة بس ابي نصيحة من قلب محتاجة نصيحة دعوة اي شى يهدي بالي .

انا ماتزوجت صغيرة تزوجت عمري 29 وبعد مارفضت كثير وانجرحت اكثر من مرة في موضوع خطبة قالقلب شايل مرة ومهموم وبعد جهاد سنين داويت جروحي بروحي ووقفت على رجلي بعد ماكنت ممثلة من الدرجة الاولى قدام الكل .
وبعدها صار زواجي سريع مرة من شخص منفصل من ملكة خطيبته كانت مريضه نفسية وسوت فيه الهوايل لدرجة ضربته اكثر من مرة بسكين واشياء واشياء يعني الرجال عانا كثير حتى وابوي يسأل عنه قالو لابوي الرجال كويس بس قول لبنتك تخليه بعينها وتعوضه لانه عانا كثير طليقته وامها وكثير من اهلها مرضى يتعالجون واهل البنت غشوه .

هو طيب وعن جد يبي يفتح صفحة جديدة ويجهاد علشان تكون حياتنا حلوة بس يمكن العيب فيني انا صايرة مرة حساسة زعولة غيورة بشكل فضيع خايفه يجرحني واتحسس من اي كلمة وخايفه بيوم يخوني يمكن من زود ماكنت مجروحة من قبل حاسة اني ماابيه يدوس لي على طرف ماابيه يجرحني ابد احس كرامتي وعزة نفسي ماتسمح لي ادري هالشى خطأ لان مافيه كرامه بين الرجال وزوجته وبالعكس يقولي كرامتك كرامتي.

ماادري يمكن لانه مرة مشغول بعمله وعنده كثير اشغال تلفونات لاب توب اتصالات سفرات ومع كل هذا يحاول يكون معاي بس انا اقول وش سويت بنفسي ، صحيح انا موظفة وكمان عندي اشغال بس احنا البنات مرة رومانسيات والرجال عكسنا مستحيل يفهمونا احتاج يكون معاي احس انه حولي دايم . في بداية الزواج كنت اسأل دايم واطمن حسيته يتضايق او يحس انه مراقب حاولت اغير اسلوبي طنشت وصرت اجي على نفسي واصفط واسوي اني بعد مو فاضيه يرسل لي مطنشتني وزعلان منك ومن هالكلام اقوله لا بس مشغولة وانا اجلس اكل في عمري مسويه ثقل .يخلص دوامي وعادي انتظره بالساعات .ومرات حتى واحنا مع بعض اتصالات وتلفون وشغلات صحيح يسوي كل شى قدامي وبصراحة مامسكت عليه شى بس ماادري ليه خايفه واغار طيب انا تزوجته وانا اعرف طبيعه عمله بس مو قادره اتحمل .

الشى الثاني انه مرات اسلوبه يكون قاسي ويتنرفز بسرعه يمكن بسببي يقولي تسأليني اسئله توجهينها لي بطريقه الاتهام يعني صار موقف مرة انه امه نادتني بأسم طليقته انا سكت وحاولت امشي الموضوع بس مااقدر اشوي وانفجر فيه وقالي لا تحاتين انا ماارضا وبكلمها . مو عارفه كيف اتعامل معه اذا تنرفز المفروض اسكت لحد مايهدأ وامسك نفسي انا مااقدر احس كرامتي ماتسمح لي واحسها اهانه وادري هالشى خطأ لازم اسكت علشان اكسبه ، وان سكت سألني وش فيك ولا تسكتين ومو زين تكتمين وتكلمي ياربي وش اسوي .:frown:

واخر غباء سويته انه كنا مسافرين وفي طريق الرجعه نتمازح واخذ كلمة أنا قلتها جد وحاول يردها لي بنفس الاسلوب انا زعلت منها وتضايقت وحاولت اكون مرة طبيعية بس بعدين قلت له بروح بيت ابوي اسلم عليهم ونمت هناك ماكنت حتى ابي اشوفه بس كنت ابيه يقول بمر اخذك لكن هو من النوع اللي يستحي يجي بيتنا وقت متأخر وكان تعبان اشوي معه انفلونزا ،ويمكن زعل مني حاول يراضيني ونطلع نتعشا وكذا انا عاملته بجفا واخر شى نام من غير حتى مايتصل ولايرسل لي شى انا صحيت لصلاة الفجر وانفجرت من البكي لما شفته مو مرسل شى.


انا تعبت يابنات والله تعبت عشت عزابية مجروحة وكل يوم هم وغم والحين وانا متزوجة خابت كل آمالي يمكن العيب فيني مو قادرة انسى جرحي ولا انسى انه كان مع غيري افكر وش قال لها وش صار بينهم وهالاحساس يقتل والشى الثاني الرجال مشغوووووووول والثالث اسلوبه مرات يقهر وانا وش اسوي كيف اعدل اسلوبي واطول بالي , وعلى فكرة هو يقولي انا اخترتك بسبب ثقتك بنفسك وعقلك وقلبك وبعدين جمالك . وهو مثلي جابو له اهله كثير بنات ماكانو يعجبونه يعني زي مااختار بسهولة .

بنات ابي احافظ على بيتي وزوجي ماابيه يتملل ويضيع عشي اللي توي ابنيه ابي اطرد هالوساوس واحساس الخوف اللي ساكني احس مرات انه يمكن بيوم يحب غيري يمكن يتركني يمكن يمكن مانجيب عيال يمكن يمكن كلها وساوس ادري بس وش اسوي خبروني :frown: