موقف بايخ حصل لي !! اعطوني رايكم ..

السلام عليكم ..
كيفكم ياحلوات ؟
البارح حصل لي موقف تضايقت منه والله ..
اتصلت علي صديقتي وقالت بجيك ، قلت الله يحييك ..
جات وحطيت العشا وتعشينا وسولفنا وووو
وعلى الساعة 12 جا زوجها ياخذها وكانت معه في السيارة
زوجته الثانية وبناته ، صديقتي عايشة معهم في نفس البيت
وهي وطبينتها علاقتهم حلوة ماشاء الله كأنهم اخوات ،
صديقتي ماعندها عيال ربي ماكتب لها تجيب وهي الثانية ..
وطبينتها عندها ماشاء الله أولاد وبنات ،، وأصغر عيالها
بنت عمرها 9 شهور ، وصديقتي لما نطلع نتمشى سوا تجيب
البنت الصغيرة معاها وتعطيني اياها عشان اسلم عليها وكذا ..
بحكم ان ماعندي بنات ،، وأنا علاقتي في طبينتها رسمية وعمري
مازرتها ولا هي زارتني ، لكن اروح لصديقتي إذا راحت بيت اهلها ..
المهم لما زوجها جا ياخذها من عندي قالت له نزل البنت على أساس
تبغاني اسلم عليها وفعلا نزل البنت وجابتها لي عند الباب ، أنا كنت
ابغى اعطي البنت فلوس لكن ماكان عندي خلص المبلغ اللي في
البيت ولسا ماسحبت ولا احنا بخير الحمد لله ..
قمت جبت شوكولاته واعطيت البنت بعد ماسلمت عليها ..
تدرون ساعتها ايش قالت صديقتي ؟!
قالت : أحسبها ميتين ريال قصدها الشوكولاته !!!!!
وقتها طاح وجهي والله ، ولا عرفت ايش اقول ..
الحين ايش رايكم في كلمة صاحبتي ؟
أنا فكرت اشتري للبنت قطعة ذهب تعليقة ولا أي شي
وارسلها لها مع صديقتي ،، هااا ايش رايكم ؟
مع العلم ان طبينة صديقتي مرة قالت عني كلام ماهو زين
واللي وصلته لي صديقتي ، واعتذرت طبينتها وحلفت لي
انها ماتقصد اللي انا فهمته ، وعشان الموقف ذا أنا مارحت لها
لما جابت بنتها هذي مع اني قبل كنت ناوية ازورها واهديها ..