حبيباتي عندي سلافة بأسولف بها عليكم وشاركوني السوالف لعلنا نفيد بعض بمجلسنا الراقي العام هذا ..
طلعنا مرة لأحد مجمعات رياضنا الحبيبة وكان مول كبير وحلو معي زوجة أخوي وتسوقنا وخلّصنا وإحنا نتسوق وندور بالمحلات شفنا هذيك البنت المتكشخة نعطيها تقريبا بالعمر 20 كان لها إستايل فريد من نوعه حبتين
" عباية كتف مفتوحة تتسكر وكانت مسكرة أزرارها عدى الإثنين الأخيرات تاركتهم وطالعة برمودتها الجنز تحت الركبة ومغاط ماسك عالساق الأبيض الفاتن مع لون العباية السوداء وكاوتش فيروزي فاقع لونه وشنطة كبيرة مرة سوداء تمسك باليد وعليها طرحة نعوووومة خفيفة لافتها على راسها والقبة فوق الرأس كأنها جبال ورامية باقيها على وجهها الحلو"...
هذا وصف دقيق للشكل عشان تخشون معي جو بس مو هنا السالفة ....
لما شفناها قلنا هذي كيف الواحد يجرأ ينصحها ؟!!
قالت مرة أخوي : والله حرام كل هالزينة بالسوق هذي فتنة ما شاء الله ...
قلت : لاتنصحينها يكفي ندعي لها بالهداية وخلاص أنكرنا المنكر بقولبنا ...
بصراحة صرنا نخاف ننصح من بعض المواقف اللي نسمع بالأسواق الله المستعان ربي يعفو عنا يتسامح
راحت البنت الله يستر عليها ورحنا على فكرة لما تبي تشف حاجة تشيل الطرحة ثم ترجعها ... أذن المغرب ومشينا لدورات المياه دخلنا وفيها قسم للقياس توضينا ودورنا المصلى قالو مافيه !!! مافبه إستغربنا قلنا يلا نصلي بأماكن القياس
إلا وتدخل البنت اللي شفنا برا بمكان كان بعيد قعدنا نناظرها شوي ...
دخلت الحمامات وتوضت هذاك الوضوء بكل هدوء وسكينة وإستشعار!! بعدين صارت تدور تدور المصلى جت سألتنا عنه قلنا مافيه وقلنا لها صلي بغرف القياس ...
قالت : لا قدام الحمامات لالا .. ماشاء الله عليها ماتبي تصلي قدام الحمامات !! طلعت وطلعنا ماكان قصدنا نتبعها لكن صار إتجاهنا واحد إلا ونشوفها تتلفت تدور وين تصلي ؟
راحت لـ محل بيع العود والعطور محل فخم راقي جدا رخامه من أجود أنواع الرخام وكانت المقدمة فسيحة وقفت في ركن وتوجهت للقبلة وكبّرت وصلّت صلاة كلها خشوع وطمأنينة صلاة رااااااااكدة الله يحرسها ...
هنا ...مرة أخوي قالت لا مستحيل أتركها هذي درة لكن شكلها مايوحي والله إذا خلصت لأروح لها أكلمها
بعد ما إنتهت راحت لها مرة أخوي ... بعد السلام
قالت : شوفي حبيبتي إسمحي لي بآخذ من وقتك دقيقتين
ردت : تفضلي ياعمري
قالت : أنا شفتك أول مادخلنا المجمع وضاق صدري على شكلك الملفت والفاتن بس قلت ماأقدر أكلمها واضح عليها ماراح تستجيب شكلك عكس صورة سيئه عنك
بس لما شفت حرصك وطريقتك بالوضوء والصلاة وتنقي أحلى وأطهر مكان لـ ربك عرفت إن فيك خير عظيم ما شاء الله
أبهرتيني بفعلك والله إنك أحسن مني وأنا كلي ساترة لنفسي ماطلع مني غير سواد عيوني وضوءك أفضل وصلاتك أخشع بالعربي تحسّفت بك على هالشكل ...
ردت : الله يجزاك يارب والحمدلله على كل شي بس وش فيه شكلي ؟
قالت : لبسك طالع ، ساقك كله واضح ، عبايتك ملفتة، وجهك باين ، كل شي فيك بارز بفتنة ..
ردت : يووووه والله مادريت إن ساقي طالع على بالي مسكرتهم وعادية عبايتي أنا متعودة على كذا ..
قالت : لا بالعكس حاولي تغيرين من شكلك لو بالشي البسيط أبعدي عن البهرجة في لون النعال والطرحة وموديل الشنطة ونزلي شعرك حتى لاتبان رفعته ونفخته ولا تحطين ماكياج وإلبسي نقاب غطي وجهك عدل ..
ردت : أبشري والله يعافيك أنا كنت ماخذة الموضوع ببساطة
لكن ولايهمك والله يعافيك مشكورة على تنبيهي ...
قالت : شكرا لك أنتي على التقبل الله يكثر من أمثالك وأهنيك على أخلاقك الرفيعة وإنتبهي حبيبتي على روحك والله يحفظك ياقمر .... إنتهـــــــى
كانت ذوووووووق من جد وتقبلت وشوي أحب على راسها من زود أدبها وطلعنا وطلعت وخلّصت سالفتي
أتمنى كلنا نسلك مسلكها في الأدب والأخلاق ومسلك زوجة أخوي في النصح والتوجيه ...
أنتظر تعليقاتكم
كل الود
...