الدنيا مافيها راحه ، لاسعاده تدوم ، ولا الكدر يدوم ، فدوام الحال من المحال ..
واللي يبي يعيش فيها سعيد يتعامل معاها بمرونه ، وماتصير هي اكبر همه ..
بالبدايه بوضح كيف تغيرت نظرتي للسعاده ؟؟
كنت اول اذا بغيت شي اسعى اني احققه الى هنا تمام ، اصلا المفروض الوحده تفعل الاسباب مع الدعاء طبعا ،
بس للاسف لو ماحصل ازعل وابكي والدنيا تصير سوداء بوجهي ، وخلاص انتهت السعاده من حياتي ..
واذا جلست امي تكلمني وتقول انت ماتدرين وش الخيره فيه وارضي لان هذا الشي ربي كاتبه ،
الكلام هذا اللي تقوله امي لي، ومره اختي ، ومره اخوي ، كان ماله اي معنى بالنسبه لي وكنت اقول ليش لازم ارضى !!
و اي شي مايتحقق يكون خيره ؟؟ وش دراهم يمكن الخيره انه يتحقق !!
طبعا انا ماكنت من النوع اللي اجادل واناقش لا ، ازعل واتكلم مع نفسي :42: <<<< يحليل نفسي ماتهاوشني ولا تهزئني اقول اللي عندي وهي تسمع بس
عارفين الانسان اذا ربط سعادته بأمور الدنيا صدقوني مايشبع .. واذا تحقق له شي تمنى غيره ؟!!!
واذا ماعرفنا وشي السعاده الحقيقيه بنستمر نركض ورى متطلباتنا وبس ..؟!!
ياغاليات السعاده بالقلب لا بالمال ولا بالدراسه ولا بالوظيفه ولا بالزواج ولا بالسفر ، صح هالامور ممكن تكون متطلبات عند الشخص واشياء ضروريه بحياته ،
بس لازم مانجعلها هي سعادتنا ولو ماتحققت خلاص نتحطم ولا عاد للدنيا طعم ..
وعشان تتأكدون من كلامي شوفوا بعض البنات ربي رازقها كل شي مال وجمال وزوج على كيفها وظيفه وبيت ملك وماينقصها اي شي الا السعاده !!؟؟
وبالمقابل نشوف ناس جايتهم الدنيا من كل مكان تكون مريضه وزوجها غير صالح ، عيالها متعبينها ، ظروفهم صعبه ولا توظفت ،
بس اذا شفتيها تشعرين بالسعاده لانها انسانه سعادتها بقلبها ،
انسانه شكوره تشكر الله وترى نعمه الكثيره مهما كانت ظروفها ، تتأمل بنعمة البصر اللي حرم منها الكثير ، وتشكر الله على السمع والمشي
لو بس تدخل قزازه برجلنا ماقدرنا نتحرك لين تطلع ..
الصحه والعافيه ، الابناء ، الامن والامان ، مافي احد بالدنيا ربي ما انعم عليه ،بس فيه ناس ترى هذه النعم وتحمد الله وتشكره ،
والبعض للاسف ماترى اي شي وتشوف حظها مايل ، والناس مبسوطه وهي لا ، ولا تصحى من غفلتها الا اذا ربي ابتلاها وسلب احدى النعم ؟؟
انت اشكري الله على النعم اللي غيرك مايلقاها مهما كانت ظروفك ، وشوفي كيف ربي بيزيدك من النعم ،
ومن اعظم النعم اللي ممكن ربي ينعمها علينا الرضا والقناعه بالحياة ...
نرجع لبداية موضوعي صح قلت لكم كنت اول اذا ابي شي ولا حصل مااقتنع اذا قالوا لي اهلي خيره ووو ،،
الان وبعد ماعرفت هذا الحديث اقتعت بالخيره وصرت ارضى مهما كان الامر يخالف رغبتي ..
قال صلى الله عليه وسلم :
( عجبت لأمر المؤمن ، إن أمره كله خير ، إن أصابه ما يحب حمد الله و كان له خير ، و إن أصابه ما يكره فصبر كان له خير ،
و ليس كل أحد أمره كله خير إلا المؤمن )
صححه الالباني
من بعد هذا الحديث صار عندي رضا بكل اموري ودائما اتوقع ربي صارف عني شر اذا الشي ماتحقق لي ،
وبرضوا من الاسباب اللي تخليني ارضى هذا الحديث ..
قال صلى الله عليه وسلم :
(إن الله إذا أحب قوما ابتلاهم ، فمن رضي فله الرضا ، و من سخط فله السخط )
حسنه الالباني
اذا مافي خيار عندنا الا الرضا عشان ربي يرضا علينا ويرضينا ..
يقول الشيخ صالح المغامسي حفظه الله :
(خيرة الله لعبده خيرا من خيرة العبد لنفسه , وكم من امور حجبها الله جلا وعلا عنّآ وبقيت في قلوبنا
بعض علامات الحزن والأسف عليها ، ولو فتح لنا الغيب لسجدنا شكرا على آن الله حجبها عنّا)
من ارادت السعاده وراحة البال فلتتوقف عن المحرمات ..
تقاطع الاغاني والمسلسلات ،
تتوقف عن النمص حتى لاتطرد من رحمة الله ،
تترك كل محرم الله من التبرج ، الغيبة ، النميمة .. وغيرها من المعاصي والذنوب ..