نزلت 50كيلو..........

السلام عليكم و رحمه الله و بركاته
العنوان صحيح انا ضعفت 50 كيلو .. انا طولي 173 و وزني الحين 70 كيلو...
من سنتين كان وزني 120 كيلو و لله الحمد نزلت كل هالوزن من غير ترهلات ولا تعب و جسمي مشدود و متناسق.... قولوا ماشاء الله
خلونا بالمهم بقولكم شلون ضعفت
انا كل شي جربته في حياتي جربت الابر اصينيه و رجيم الماي و نظام الوجبات الجاهزه و الحرمان و جميع انواع الحميات الغذائيه بس كل هاي كانت حلول مؤقته و بالاكثر ماكان في نتيجه..
اهم شي في الشخص الي يبي يضعف ان يكون مقتنع انه لازم يضعف و عدم تحديد مده زمنيه محدده للضعف..
سجلي وزنك في البدايه و اذا تحبين خذي مقاساتك (للذكرى فقط)
النظام الي مشيت عليه ما يمنعني من اكل شي... اكل كل شي ولكن باعتدال.. بقولكم شلون
انا ما حرمت نفسي لا من الحلا ولا المقالي ولا المعجنات.. قللت الكميات بس
لما اكون قاعده بالبيت و ما اكون معزومه على مكان ما اكل اي حلويات و لازم تعودون نفسكم انكم تاكلون لما تجوعون بس.. مو لما تكونون مشتهيين الاكل..
في بدائل كثيره للوجبات الدسمه.. مثل شرب المشروبات الغازيه الدايت بدل العاديه.. استخدام الحليب خالي لدسم بدل الحليب كامل الدسم... التخفيف من كميه السكر المتناوله في المشروبات تدريجيا... الخ
لا تحرمي نفسك من اي شي لان لما تنزلين الوزن الي تبينه ما يرجع مره ثانيه
حاولي توقفين وجبه العشا.. يعني اذا تغديتي غدا ثقيل لا تتعشين>>>>>> معليه استحملي الجوع و بتتعودين
اذا ثقلتي بالعشا يوم من الايام حاولي تخففين اكلك اليومين الي بعدها علشان ما يتراكم وزن زايد عليكي... لان الوزن المكتسب يكون سهل انزاله بسرعه ولكن الوزن المختزن صعب تنزلينه بسهوله..
الرياضه
انا كنت اكره شي اسمه رياضه و ما كنت اداوم عليها بس كنت اعمل جهدي من وقت للثاني.. حاولي ان تلاقين رياضه تحبينها.. انا مثلا كنت احب المشي .. فامشي ساعه باليوم مرتين او ثلاث بالاسبوع..
الرياضه مهمه لانها تشد الجلد الزايد و تعطيكي جسم حلو مشدود و ملفوف
شرب الماي هذا اهم شي.. انا من يوم بديت اشرب ماي من غير رجيم ضعفت 10 كيلو.. اشربي من 1.5 الى 3 لترات ماي باليوم.. ادري انه كثير بس مع الوقت بتتعودين ... انا كنت اكره الماي بس الحين صرت ما اقدر استغني عنه
في البدايه كل شي صعب بس مع الوقت يهون ... انا تغيرت حياتي بعد ما ضعفت و صرت احب اطلع و اشوف الناس و بعدين هذا بيكون نظام حياه .. الحمدلله وزني ما يزيد الحين بالعكس انا لين الحين ينزل وزني من غير اي جهد او تعب.. حتى من غير ما اخطط ..
انا تغير مقاس لبسي 10 مقاسات كنت البس اول مقاس 52 الحين صرت البس 4
و اسفه طولت عليكم



تجربة اخرى


بقولكم تجربتي مع الضعف...انا طولي 165 وكان وزني قبل اربع سنوات 95 يعني كان عندي وزن زاااااايد وايد وايد وكنت احس نفسي ثقيلة...

ضربت في راسي وقلت لا يبه خلاص لين متى هالمتن كني ام عيال وانا مب متزوجة - وقررت ابدأ الرجيم وفعلاً بديت الرجيم انا وبنت عمي والحمدلله انا استمريت وبنت عمي وقفت وضعفت في حوالي سنة نزلت 25 كيلو وصار وزني 70 كجم..والحمدلله وزني مازاد ولا كيلو بالعكس ثابت تماماً...

طبعاً انا سويت اكثر من نوع رجيم لن اذا طالت فترة الرجيم الجسم يتعود على الاكل وماعاد يفقد وزن وكنت اتابع مع اخصائي تغذية...بالإضافة الى الرياضة الي تنوعت..

أبي أنزل 5 كيلو مب قادرة وزني ثابت وبدرجة مب طبيعية - الكل يقولي ما شاء الله عليج حافظتي على هالوزن طول هالفترة - فصار عندي حرص كبير ما آكل شي فيه دهن او سكريات وايد ونزولي كان تدريجي مب سريع عشان جذيه وزني ثابت وما يزيد ولله الحمد...

واذا صار وكنت معزومة وعجبني شي وكلته اليوم الثاني أكلي يكون فواكه وخفييييف واشرب ماي وايد...

صارت عندي خبرة كافية في الرجيم من أكل ورياضة...ومازلت امارس الرياضة بشكل يومي مشي لمدة 45دقيقة ورياضة بمركز رياضي مع السباحة وغيره من الرياضات...

الكل يقولي 70 حلو عليج لكن انا ودي انزل 5 او 10 كيلو لين 60 اشوفه حلو وفعلاً بديت الحين برجيم وان شاء الله يفيد وينزل وزني - ادعوا لي يابنات...

وبالتوفييييييييييييييييق للجميع وتحيا الصحة والرشاقة...
__________________



منقوووووووول للفائدة