نسيت طعم الفرح 💔

مساؤكم وصباحكم فرح لا يرحل وسعادة لا تزول ..
آآآه يابنات من سنين طويييييلة ودعني الفرح ،، لدرجة اني نسيت شكله ، يابنات كيف طعم الفرح ؟! و كيف تكون الضحكة من قلب ؟!
بحكي لكم قصتي وطمعانة في دعوة طيبة لعل منكن واحدة مستجابة الدعوة أو تصادف ساعة إجابة وتقول لها الملائكة ولكِ بمثل ...
أرادت مشيئة الله أن أتزوج إنسان اتكالي عديم مسؤولية دمر حياتي ودمر أولادي ، طلب تقاعد مبكر من عمله وجلس في البيت طبعًا تقاعده بسيط جدًا ومايغطي تكاليف الحياة ، أنا موظفة الحمد لله لكن راتبي يروح في مصاريف البيت ومصاريف أولادي وطلباتهم ، حتى إني والله أشياء كثيرة أتمنى أشتريها وما أقدر ، أولادي تخرجوا من الجامعة وماحصلوا وظايف ، وجلست فترة اجمع من راتبي وسويت جمعيات وأقنعت ولدي الكبير يفتح محل وأعطيته المبلغ اللي كان معي وراح استأجر محل وسوى الديكورات .. تدرون ايش حصل بعد كذا جاء السوسة زوجي وقعد يوسوس لولدي إن المحل غير مناسب والعمال بيسرقونك وماادري ايش لحد ماترك المحل وبطل منه تخيلوا بعد مادفعت مبلغ الإيجار حق ستة شهور والديكورات راح ولدي وكنسل المحل وذحين جالس في البيت ونفسيته صارت دماااار أبوه دمره وكم مرة يسوي الحركة هذي مو أول مرة خلاه يفقد ثقته في نفسه لدرجة صار يكلم نفسه .. قلت له طيب شوف لك وظيفة في شركة ولا في محل رااااافض نهائي والسبب أبوه حسبي الله عليه ونعم الوكيل ..
ومو بس كذا أولادي يوم كانوا صغار كانوا يصلون في المسجد ويوم كبروا صاروا يسوون مثله لدرجه ماعاد يروحون المسجد ، أحيانًا يصلون في البيت وأحيان لا .. بتقولون ليه ماتطلقت منه واقول لكم خفت على أولادي ياخذهم مني ويضيعهم وهو مو كفو ولا قد المسؤولية ..
طبعًا أنا ماحكيت لكم إلا جزء بسيييط من معاناتي ولو أحكي لكم كل شي راح تنذهلون من مقدار التعاسة اللي عايشة فيها ..
من سنييييين ماجفت دمعتي خايفة على أولادي ، ولدي الكبير قرب يدخل 28 وهو لاوظيفة ولا زواج ، و أبوه مو مهتم أبدًا ماكأنه ولده حسبي الله ...
تكفون يابنات ادعوا لأولاي بالصلاح وبالوظيفة والرزق الحلال والتوفيق ..
والله يجعل لنا ولكم من كل ضيق فرجا ومن كل هم مخرجا ..