نصيحه لحد يقدم في السعودي للاستقدام اكبر نصاب

السلام عليكم ورحمة الله

بنات حبيت انصحكم عشان محد يصير له اللي صار لي في البدايه كلمتهم وقلت ابي اقدم على فلبينيه في امكانيه قال ايه اكيييييييد قلت طيب كم تاخذ عشان تجي قال من 3 الى 4 شهور
قلت اوكي رحنا وقدمنا ومكتوب في العقد الى 6 شهور قالوا لا لا عادي بس روتين وعشان لو لاقدر الله حصل تأخير وان شاء الله مافيه تأخير ويتكلم بكل ثقه المهم ياطويلات العمر صار لنا 9 شهور ووصل السيل الزبى كل ماكلمناهم قالوا في السفاره تحت الإجراء راح لهم زوجي تقريبا قبل شهر وقال عطوني فلوسي قالوا لا لا مايكون خاطرك الا طيب
وهذي 3 فلبينيات اختار وحده منهم طبعا من خلال السيره الذاتيه تخيلوا يعني اوراقنا الى الان موجوده عندهم ومابعد اختاروا حتى ويكذبون كل ماكلمتهم قالوا اوراقها في السفاره نصـــــــــــــــــــــابين المهم قلنا كم يبغى لها تجي بعد الاختيار قال اسبوعين بالكثير وان كثرت مره شهر وخلص الشهر يابنات والى الان ماجت كلمتهم اليوم
قالوا لي يمكن بعد 3 اسابيع يعني بعد مانكمل 11 شهر المهم اني عصبت وقعدت اتكلم عليهم قام المصري مدير المكتب ينفخ ولسان حاله يقول اللي ماتطولينه بيديك طوليه برجليك
قسم بالله عصبت والحين ادور محامي وبرفع عليهم قضيه تعويض 30 ريال كل يوم بعد 6 الشهور مع انه المفروض دايركت يعطونيه لانه مكتوب في العقد لكنهم مايجون الا بالمقاضاه والله ماراح اتكاسل وانا وراهم والزمن طويل
واخوي له اخويا في مكتب وزير العمل بكلمه بكره اشوف لهم صرفه الله لايوفقهم


المكتب هو اللي على طريق الملك عبدالله السعودي للاستقدام



بنات لازم نحط حد لهاللي يصير اقل شي نعلن عنهم عشان الناس ياخذون حذرهم ومن خلال التوعيه هم يبدون يتنافسون على رضى الزبون يعني انا ساكته وانتي ساكته ومحد ماخذ حقنا طبيعي يسون اللي يسونه ويلعبون بيديهم ورجليهم طالما مافيه يد تردعهم


بالله لو كنت اجنبيه ماني سعوديه تتوقعون يصير لي اللي صار الحين من مماطله ونصب ولف ودوران


اتمنى من كل قلبي ان المشرفات مايحذفون الموضوع ونكون شعب واعي اذا الحكومه ماتاخذ حقنا نصير ناخذ حقنا عن طريق المقاطعه والتشهير

وشكرا لكم