أخاف الله يعذبني وأنا خواف يابنيه
واخاف ابساعه اللذه يجينا هادم اللذات
ويأخذ من حشى جوفي بقايا روحي الحيه
أنا ليّه ثمان اسنين وأنا مدمن على الشهوات
ديار الفسق حاستها مواطي تحت رجليه
عيوني من كبر همي تخلط الدم والعبرات
مِسيل الدمع من عيني حفر بالخد ماريه
صحيح إنك جميله بس تبنا من هوى الزينات
تركنا الحب غصب وطوع للعين الشقاويه
يابنت أنتي على بالك أباخذ من بنات الشات؟
أجل مجنون أنا يابنت أشيل العقل بيديّه؟
ترى أكبر شيء يربطني مِعك جوال ابو شاشات
وهاتف ينقل أشواقي على نبرات سلكيه
وترى كل السوالف اللي عطيتك بالهوى كذبات
وحتى دمعتي يوم الفراق الصعب كذبيه
هذاك اليوم ماهلت عيوني لجلك الدمعات
لأن الدمع ماينثربقصه حب وهميه
أنا أضحك مِعك واضحك منك ..عليك أكثّر الضحكات
كأني بالهوى جني.. يعبي راس جنيه
وأنا ماني بخكري يلبس القمصان..والشورتات
ويفرح قلبه المسكين إذا حب الديوانيه
أنا من لابةٍ أروت ضمايا سيوفها الغزوات
خلايا جسمنا عاشت على دم القبيليه
ودهنتي شعرك الاسود بألوانٍ من الصبغات
وعيت تقبل الصبغه ملامحك الخليجيه
وحشرتي ردفك المسكين بالبنطال ..والجنزات
خلاقينٍ تصنّعها مزاجات اليهوديه
عشاني ميتٍ في ثغرك الأحمر أبولمعات
تحسبيني أبرضخ لك لأن اشفاك ورديه ؟
ورب الكون ماارضى فيك لوإنك شيخة الحلوات
وإذا صمل عليّ العلم أكب ارض السعوديه
يابنت الناس عزك في سوادٍ يستر العورات
وعزي في شماغ أحمر.. وثوب أبيض..وطاقيه
{سعوديين نفخر في عبايات السعوديات
نغض الطرف إجلالا اذاشفنا السعوديه
}و{خليجيين نفخر في عبايات الخليجيات
نغض الطرف إجلالا إذا شفنا الخليجيه
}