الله يحيي (هـالخشش) الحلوة كلها ..
علومتسن يابنات يازاحفات أنشالله مرتاحات
«·¨*·.¸¸.» مدخل حصري «.¸¸.·*¨`·»
قالوا تحبه ؟! قلت: بالحيل بالحيل * قالوا توده؟! قلت: ما اود غيره ..
قالوا تريده ؟! قلت: بالحيل بالحيل.. قالوا تعزه: قلت آه بالحيل بالحيل ..
قالوا تتمناه؟! قلت: يقطع ابليسكم لكم ساعة طايحين فيني أسئلة!! توكلوا على الله عشان أبدأ القصة
_____________________________
( الفصل الأول )
- لحظات ماقبل ماقبل الحسم -
كان ياماكان .. ذات مساء عاصمي جميل .. وكنت في طريقي متجهاً الى وسط الرياض ..
بالتحديد ( سوق عتيقه ) حق الخضار والفواكه ..
وكان معي صديقي وحبيبي أبوفهيد
والعلاقة بيني وبين هذا الصديق تمتد لبطون التاريخ .. وذلك قبل 24 سنه أول ما انولدنا في اسبوع واحد ..
وكان يسولف لي عن مغامراته في سوق ( الغزل ) ومواعيده الغراميه مع ( البنات ) ..
وانا ( فاغرُُِِ ُ فاي ) ورايح وطي ورايح كشنه بالكشري مع سواليفه
-- تصدق يا سحوري ، أمس "دلول" أهدتني دب مكتوب عليه أحبك !!
-- تصدق يا سحوري ، هذا البوك اللي في يدي .. مهديته لي تغريد الربوع اللي طاف !!
-- تصدق بالله سحوري .. "هدى" سددت فاتورتي حقت الشهرين اللي راحوا وفيها ألفين ريال !!
وانا قاعد أستمع له و ( مبلم ) لدرجة اني قطعت اشارتين حمراوتين بس الله سلم !
0 0 0 0
ترن .. ترن .. دق جوال أبوفهيد .. ناظره وقال:أف .. أبو اللزقات ياهووووه ..
شف يا سحوري !! طالعت شاشة الجوال ومكتوب فيها: النشبه يتصل بك !!
قلت من هالنشبه ؟! قال: هذي ابتسام الله ياشيخ ياخذها .. أنواع الازعاج كل يوم عشرين مسج
وستطعش ستين اتصال .. سميتها نشبه ولا قمت أرد عليها .!!
قلت في نفسي : إيه بلا والله من العز اللي انت فيه .. يحق لك تطنش !! مو زيي منقطع
شاف ابو فهيد بقاله قال وقف وقف .. وش أجيب لك معي؟ قلت : أي شيء ..
نزل ابو فهيد البقالة وجواله عندي بالسيارة ..
قعدت أهوجس.. الحين أنا أزين من ابوفهيد بألف مرة .. وشعري أنعم منه وأرتب ..
وسيارتي أحلى من سيارته .. ومع هذا البنات عنده وانا ( متلحط ) بس بربع الاستراحه التماسيح!!
و فجأة
ترن .. ترن .. قطع هواجيسي اتصال جوال ابوفهيد .. ناظرت الجوال وأثر النشبه يتصل بك!!
إنبرش علي ابليس انبراش مايسويه المنتشري وقال:
رد .. رد واسمع الصوت العسل .. انت في حياتك ماسمعت الا صوت حرمتين:
أمك لا قامت تدعي عليك.. وشغالتكم لا قالت: جيب شماغ انته .. انا فيه يكوي ..
شلت الجوال..ظغطت على السماعه الخضراء وقلت بصوت رومانسي حنوووون عاطفي حااد:
ألوووووووووووووه .. واحتريت الرد العسل والصوت الدافيء واذا بصوت أجش مكر مفر مقبل مدبر معا .. يخترق طبلتي:
-- وينك فيه يابن الحرام تاركني بالمستشفى ساعتين وتدوج في هالشوارع !!
من الروعه سكرت السماعه وذبيت الجوال وقلت الله ياخذك يالفقاش يابوفهيد.. أجل أبوك خليته ابتسام
ركب ابوفهيد ومعه بيبسي يشربه وعطاني براية خضراء !! قلت: خير ان شالله ؟
قال: انت مو تقول جب لي أي شيء ..
قلت: أقول ترى ابتسام تحتريك بالمستشفى يالنصاب !! ( دحجني ) بنظره حاقده وخذ جواله
وجلس ساكت وهو عيونه حمراء وبحر أمواج خدوده قاعده تتلاطم من قوة التهزيئه
وفجأة إذا بنا على أعتاب السوق الجميل سوق عتيقة المركزيV
V
V
( الفصل الثاني )
<< لحظات ماقبل الحسم >>
دخلنا سوق عتيقه .. شريت كم حزمة خس على جرجير مع كراث وبطاطس على كوسه ..
وطماط وكرتون بردقان مصري وتفاح أحمر وعنب احمر عشان احس اني ولد نعمه
وطبعاً مانسيت الخيار لأني من النوع اللي يحب المكرووونه موت .. ولا تسألوني وش دخل المكرونه بالخيار لأني باختصار: أكره الحمص
وهنا اشتدت وتيرة الاحداث ..
قاعد أحاسب راعي البسطه ..فـ مر من جنبي شبح !! هالشبح ياجماعة الخير ( لحس ) مخي!
خلاني بدون شعور أطلق تصفيره من شفايفي !!
دققت النظر .. وأثاريها بنت ..
العيون كل الكحل اللي بمحلات أبوريالين مكبوب فيها..
صرت زي ماقال الشاعر في كتاب النصوص :
مرحوم يا ضبٍ على الخط مدعوس ** له سبعة أيامٍ ومحدن درى به
قعدت أتمقل فيها .. أبحلق. أناظر.. متعجب!! وفجأة ..سددت لي نظره !!
و طاحت عينها بعيني.. ومن لهفة الموقف طاح أخوكم على بسطة الخضار حقت البياع ..
شالني فهد والبياع وهم (يسموون)علي .... وقال لي ابوفهيد بخبث ابليسي ماكر:
سحوري .. الغزال يلزمك أو تتركه لحبيبك أبو فهيد؟
نقزت وقلت : أبوفهيد بلاش تكفى حكي أهل العصابات ترى تخوفني.. وش تقصد ؟
قال لا تستهبل معي.. البنت عينها عليك من يوم دخلت السوق..يعني ياتروح تظبط أمورك معها..
أو اتركها للي يفهمون هالشغلات .. وطق على صدره !!
نقزت ببراءة تثير الشفقة وقلت: لا لا .. الله يفضخ عيونك ان ناظرتها. . أنت عندك تغريد وهدى وغيرهم..
خل هذي لي أنا ( حالها ) قبلك .. ضحك وقال بمكر قروي!! : يهنيك فيها ياشيخ..لعيونك تركناها..
بيني وبينكم ترددت . لأني ماعمري عشت كذا موقف ,,. قعد يوسوس لي بليس عن يميني وابوفهيد عن يساري وهو يقول:
الحين تواجه كلب مسعور .. وتعجز تروض مهرة جت تتحرش فيك ..
حسيت انه استفزني بيني وبينكم والكلام للجميع .. رحت طاق صدري وقلت:
أنا ولد ابوي !! إرس ياترس واعتدل ياملف .. اليوم يومي وانا اخو شقحاء <<شقيح وش جابهاذي
طلعت قرطاسة علك ابونعناع غندور وكتبت الرقم وتحته اسم: لؤي
ولأول مرة في حياتي العمليه..قربت من البنت ورميت الرقم.. وجيتك أركض للسيارة وابوفهيد وراي ولا تسألوني عن الجرجير وكرتون البطاطس لأني نسيت اسمي وقتها
........................
مر يومين على القصه هذي .. ويأست من اتصال ( الغزال ) اللي ماطلع من بالي أبد ..
أيقنت أن البنت تركت الرقم بالأرض وطنشت ..
وفي تمام الثالثة فجراً .. ترن .. ترن .. (طبعاً نغمة موسيقيه بس مقدر أكتبها قلت : ترن ترن وافهموا )
رقم غريب كان واضح أنه رقم ( سوا ) .. قلت: ألو؟ جاني صوت حنون حنون خلى جوالي (يموع) في يدي ..
ألووووووه ... هاااااي .. الأخ لؤي ؟ ؟ قلت: لا .. إلا صح أنا لؤي نعم ؟
قالت: وش هالحركات ؟ قلت : أي حركات مافهمت ؟ ---> عمري يالبريء
قالت: الترقيم اللي بالسوق أو تسوي ناسي ؟ قلت : آها ذكرت بس والله آسف ..
قالت:وين اصرف آسف هذي فيه !! قلت بحنية مستفيدها من ابوفهيد الداشر:
والله آسف..ليت تعذريني..اختي عيونك وفتنتها الله يعلم خلتني أسوي شيء أول مرة اسويه بحياتي..
(( بيني وبينكم حسيت أن البنت تسلكت واستانست بالمدحه..رحت مزود العيار )) قلت :
حشا مو عيون هذيك.. هذيك أسلحة دمار شامل راح بوش يدورهم عند صدام وهم بعيونك !!
صدقيني أول ماشفتك قلت مستحيل تكون هذي انسانه مثلنا ..
هذي أكيد لوحة من لوحات بيكاسو طاحت منه وهو يتمشى في عتيقة !!
(( البنت داخت .. وبديت أحس ان صوتها قام يرعد .. واخوكم في فن التسليك استاد ))
قامت تضحك وقالت : الله اسلوبك حيل..حييل.. حيييل يجنن !! دمك بالمرة خفيف ..
رحت مزود العيار مرة وحده وقلت: فيه نصراوي مات ابوه قال كله من الحكم !!
ضحكت بصوت عالي: ههههههههه الله يرجك يا لؤي ..
قلت: هاااه !! من لؤي ؟ قالت: ههههههههههههاا ههههه هذي بعد مرة حلوة..
من غيرك قاعدة أكلم .. الله يرجك لؤي!!
رحت مصرفها قلت : ايه استهبل معك (( بغيت اجيب العيد لأني أول مرة اسمع بلؤي))
قلت: بليز ..بونسواغ ؟.؟ وش اسمك؟ ماتشرفت فيه ؟ ---> مسوي مثقف وهو أدلخ فرنسي
جاوبتني : إممممممم ماراح أقولك.. بس أول حرف (نوون ) ؟
قلت بدلاخه متأثرة بموسم التمور : نوون .. نووون .. نبوت سيف ؟!
قامت تضحك وتقول الله حسيبك يالؤي ماقد ضحكت هالضحك قبل اليوم وااااو وناسه انت ..
اوكي را ح اقولك .. معك (( نوال )) يا لؤي .. اسمي ((نوال )) ..
المهم راحت ساعه وربع غزل وتنكيت..قمنا نسولف سواليف لين أقام الفجر !! قالت وهي مستعجله:
لؤي عن اذنك الوالد قام يصلي واخاف يشوفني أكلم.. بعدين أحاكيك أوكي؟ مع السلامة !!
طــوط طــوط ..
رحت المراية.. (سرحت ) قذلتي اللي متطاق بسببها أنا وأبوي لي شهرين ..
قمت أبخبخ على روحي من كل عطر اشوفه قدامي..
حسيت نفسي انسان ثاني.. انسان غريب .. رومانسي .. صرت اسبح يومياً.. مو زي أول أسبح بس بالأعياد
المهم ..استمرت المكالمات بيني وبين نوال .. تدق دقة وحده وتفصل ثم أرجع أكلمها ..
صح ان الفاتورة ( تمحطني ) بس كله لعيون الغلا يهون
صرت شخص ثاني..رومانسي عاطفي..صرت ما أتحمل اشوف الدجاجة تنذبح قدامي مع اني أول اذبح الخرفان بالعيد
صرت من الناس اللي يؤمنون بالحب من أول آلو ..
صار ابوفهيد يحسدني وانا اللي كنت أحسده .. مسج يروح مسج يجي واستمرينا مده على هالحال
v
v
v
v
( الفصل الثالث )
<< لحظات الحسم >>
تعمقت العلاقة الهاتفيه بين لؤي - اللي هو أنا - وبين نوال ..
صار بيننا عيش وملح وحب وغزل..والبنت عليها أسلوب مو سهل ..يعني بالعربي الفضيخ:تعطيك
مثلاُ:
كنت مرة أكلمها عن واحد من العيال صار له حادث وتبرعت له أنا بدم ..
وسألتها: نوال على طاري الدم وش فصيلة دمك انتي ؟
قالت: فصيلة دمي.. لؤي موجب!!.. قلت: هاه.. يعني وشو
قالت: دمي كله لؤي.. !!
واخوكم لاتسألون عنه وقتها.. ( انفرش ) في سريره وجته سكتة عاطفيه..
ماصحيت الا على وقع سطل موية بوجهي من الوالد وهو يقول: قم صل وانت فيذا كنك ثور ماعليه قلادة!!
والثيران في قاموس الوالد نوعين: واحد حبوب وهادي قدروا يلبسونه قلادة.. بس يظل ثور
والثاني: من زود هباله وثوارته ومطامره ماقدروا يمسكونه ويلبسونه قلادة.. وانا أتبع هالمدرسه
في نظر سماحة الوالد .. المهم خلونا الحين من سيرة الوالد ..ونرجع لموضوع الأول
0 0 0 0
مرة من المراريت وأنا أكلم نوال .. قلت:
نوال .. أبي أشوفك .. ..
قالت: أخاف مايعجبك شكلي .. وتقطع العلاقه ..
قلت: لا .. أنا شفت عيونك ومستحيل ذيك العيون تكون على شينه .. ..
انتي سكنتي قلبي من الوريد الأيمن الى البطين الأيسر ولا يهوون الشريان الأورطي
قالت: بس.. بس .. كسرت قلبي والله..
قلت خلاص الوعد متى ووين ؟
قالت: اممممم بكرة المغرب بنفس المكان عتيقة ..
قلت أووكي .. مع السلامة عشان أبدأ أتجهز للموعد اللي سيكون خالداً في براثن التاريخ البشري ..
_________
من بكرة ..رحت مظبط الشعر .. طاق الجنز .. مسوي سكسوكة
رحت لأخوي الكبير اللي توه مطلع من الوكالة كابرس رويال2004 طلبته منه وقال خذه ..
( واخوي الكبير على فكرة أخلاق حبووب وسمح ولسانه طاهر ومايسب أبد..
الا اذا كان ذاك اليوم يدخن و هو معصب في الملحق فهو يلعن )
وصرت كل من شفته علمته اني بموعد غزلنجي .. وعلى بالي راعي غزل ووخر عن دربي ..
أتى المغرب الموعود .. ودخلت عتيقة ..
وقفت بالمكان اللي أتفقنا عليه .. دقيت وجت نوال تمشي وركبت
طبعاً لا غنى عن نصائح ابوفهيد رحت موقف في حواري عتيقة الظلماء الضيقه ( أحم احم )
قلت :نوال شيلي الطرحه ..
شالت الطرحه قالت: شووووف !! قلت: من جد نوال شيلي الطرحه ماحد فيه ..
قالت : لا تستهبل لؤي أنا شايلة الطرحه شوووف زين
ناظرت.. طالعت ..تمقلت ماشفت شيء .. يوم ابتسمت لي وشفت (ضروسها) دريت انها شايلة الطرحه صدق
:bkh: معقولة نوال كذا !! معقولة هذي اللي قصدت فيها عشر قصايد !!
معقولة هذي الدلخة اللي دفعت 5 آلاف فواتير فدوة لها !!
مابينها وبين الكفر حق السيارة فرق اللهم ان الكفر فيه صواميل
قلت: نوال .. ترانا (غرزنا) ممكن تدفين الموتر ؟!!
قالت: غرزنا في زفلت .. قلت بعصبيه وانا حاقد عشان فلوسي اللي طارت :
إيه غرزنا .. قومي دفي عشان اطلع السيارة ونروح لا احد يشوفنا ويشتبه فينا ..
هي نزلت ولا ما نزلت .. رحت دايس البنزين وناصي ابوفهيد ولعنت إبليسه
قال: وش دخلني .؟ قلت: الله يقطع الغزل والمغازل وخرابيطك كلها ..
قلت خل الكفر لك وتووووووووووووووبه ..
........................................ .................................
حكمة العدد :
اذا رأيت في السوق امرأة وأعجبتك .. فأذكر لؤي واهرب
........................................ ....................
و ختاما
هاااااااااااااااااااااااااااع
ثم هاااااااااااااااااااااااااع
و أيضا هاااااااااااااااااااااااااع
و طووووووووووووووووووووط
هع طع ..!!
مزرووووف
ونستين الله يونسك بالعافيه >>>>>>>>>> جايتني غلقه وضيقه من بعد ماقفلو موزوعنا تهئ تهئ
يسلمو علي هيك تزريفااااااات