كيف بنات حواء الحلوات..
اليوم فاضيه ..ومشتاقة لسهارياتي..!!!<<أتحداكم كأنكم فاهمينها
قلت وراه ماأنزل موضوع لي..!!
الحياة الزوجية تطرق لها الكثير اللي يفهم واللي مايفهم..!!!
ومالك الخبرة..وغير مالكها..
الحكيم ..والغبي ..
الكبير والصغير
المتزوج والأعزب..
ورغم كل حكينا فيها..
لم نوصل لقواعد ثابته تريح الزوجة أو الزوج..!!!
ليه لأن الأزواج يختلفون والزوجات بعد..
مطالب الأثنين تختلف..
xxxxxx
رسم لذوات ارواح
يريد زوجة مثيرة..
يريدها بأخلاق عالية..
يريدها خادمة محبة له..
تريده زوجا محبا عاشقا ولهانا
تريد أن تشعر معه بالأمان..<< وغالبا الأزواج يفوتون هالنقطه ومايهمهم يحققونها لزوجاتهم..
كيف يشعرها بالأمان بأشياء بسيطة..
يظهر حبه لها ..يكرمها ويكرم أهلها..
يكون واضح مو غامض معها..
يظهر شي من خوفه عليها..
هذي مطالب يحتاج الزوج أن يعرف مدى أهميتها..منك أنت..!!!
يحتاج من يلقنه هالشي ..
لأن إحساسها بالأمان يجعل نفسيتها مستقره فممكن تعطي بكل حب ..ومن عيونها تسمع كلمتك..!!!
xxxxx
والزوج لما يظهر حبه لزوجته بكلمات غزل صادقه..
أو بإهتمام منه واضح بها..
مايدري بإنه بمثابة البنزين يزيد من طاقتها ومرحها ونشاطها من أجله وأجل بيته لأنها تحس إنها زوجة سعيدة إمتلكت قلب زوجها..!!بكل رضا منه ..!!(مع إنه أحيانا يمنحها هالشي خرطا لينال مايريد لكن تظل نفس ردة الفعل الإيجابية موجودة..لأنها تظل أنثى)<< بيني وبينكم لاتعلمون أحد
xxxxxوالزوجة الذكية..
تخلق لها طريقة تشعر بها زوجها بأن رضاها مهم فيسعى هو للمحافظه عليه..
يعني مثلا الزوج مشغوووووول...
ثم تطلب منه يوم الجمعة وقت فراغه يطلعها تتمشى...
يرفض..
تبين حاجتها الماسه للحظات تقضيها معه..
يرفض
تقترح ..ايش رايك نطلع نتغدا برا..
يرفض..ليه يرفض مايبي مطاعم مايبي يصرف...؟؟؟
أوكي ..راح أجرد طلبي من النزف المادي اللي ممكن يزعجك لأن هدفي أوقات نحكي فيها مع بعض..
ايش رايك أسوي غداي نتغداء بالبر.؟؟
رفض..
خذي لك أقرب ساطور وطخيه
هنا يجي وقت الزعله ..أزعل أنام بهدوء دون مرح ونطنطه..!!!
أتغداء معاه بهدوء...
ماأسولف أبد..أعتبري السوالف في البيت غلط..الضحك غلط..
الفرفشه غلط..
وأبقي على كذا لحد مايسألك سؤال صغير ..فيك شي.؟
أو كأنك مسخنه.؟خخخخ
بسرعه أستغلي السؤال..وكبي عشاس قبل يحترق..بأسلوب ودي وعيون حزينه..
أنا أحتاجك..ودي أطلع معك أحس إني عايشه مع زوج يحبني ويداريني ..مابي رومانسية بس أبي وقت يقربنا من بعض..
رفض..
عطيني رقمه أبلغ حقوق الإنسان عنه..!!!!!!!!!
أزعلي وطوليها كم يوم..مع العلم إن حقوقه لاتمنعينه منها لكن لا تكونين أنت المبادره..!!!!
خليه يحس البييت صار كأيب ..ويحس إن ضحكك وفرفشتك مفقوده..
فا ذيك الساعه كان رفضه ماله سنع فهو بيرميه ..وبيقول يالله ياعمري نتفسح :p<< ترفقي
وكان رفضه كان رفض حقيقي فهو بيجيك يقول والله يازوجتي إن ودي أوسع صدرك بس جد مااقدر عشان كذا وكذا..بس أبشري باللي يعوضك في اليوم الفلاني ..
هنا خلاص عاد مابدهاش..يكفي راعى خاطري وماتركني إلين تترهل براطمي مع مدة البوز:D
xxxxx
والأسلوب ..
بين الزوجين مطلوب..
موب عطني وانت ساكت..!!!
وهات لأعلم أبوي..!!!
xxxxx
تعرضين طلبك مع..
الله لايخليني لاتنسى كذا..!!!
تكفى أحتاج لكذا مع بوسات خطافيه..يحس إنك محتاجة له وممنونة له لو لبى الطلب..
تحتاج الزوجة لأن تكون قوية أحيانا..
وهنا..سؤال..
ماذا تريد الزوجة حين تفرض قوتها على زوجها.؟؟؟
وماذا يريد الزوج حينما يفرض قوته على زوجته..؟؟؟
الزوجة تفرض قوتها حين لاتُقدم لها حقوقها على طبق جاهز للأكل..
فهي تحتاج لأن توقف الزوج عن هضم حقوقها ..
رغم إن تكوينها وهي نفسها لاتحب ذلك..!!!
بل هي مجبوله على الضعف والإحتياج للحب والحبيب ..!!!
والدليل على ذلك أن الزوج لما يرجع يقدم لها حقوقها ويراعيها تزداد هي وداعه وحب له لاتزداد قوة..!!!
...
والزوج الطبيعي ماذا يريد بإظهار قوته..!!!؟
يريد إثبات رجولته..
ووضع الحدود في محلها الصحيح..!!!
فإما أن زوجته استنقصت منه لكونه طيب حبيب معها..!!!
أو إنها ماعادت تحسب له حساب...
أنت تقدرين تعفينه من هالشي..
بإظهار ضعفك في الأيام العاديه من غير مذله..
مثلا..
بيجي راعي البقاله الحين تقدر تصبر ماتطلع أخاف يجي وأنا لوحدي ..
بيحس برجولته وإنك محتاجه له فبيحقق ذلك..
أو لما يزعجك على جوالك لعاب..
تعطينه الجوال شف هاللعاب ..أزعجني ..
هو بيحس برغبته لحمايتك وبيهوش اللعاب ويشرشحه..!!!
والشي الثاني ليحس برجولته ..هو أنك تشعرينه بأنه مطاع وله كلمة..!!!
سم..
أبشر..
أنت تآمر..
ماتخالفينه مهما كان..
إلا إذا تنعفق وصار يمشي ويلولي (من كثر ما يقول لا)..!!
أحيانا يفرض أمر على بنتي ويكون صعب عليها ..تجي قدامه تلتفت علي ماما .؟؟؟
يعني ماهي راضية بطلب أبوها..
أقولها وأنا قلبي متقطع: أسمعي كلام بابا..!!!
جواته يكون راضي..وبنتك تتعود ماتخالف أبوها وتضيع بين رايين مختلفين..!!!
وإلغاء قوة الزوج وإن أسعدت الزوجة مؤقتا إلا أنها ستطلبها في المستقبل ..
يكبرون العيال ويصيرون مراهقين ويحتاجون لمن يردعهم يلقون أبوهم لايهش ولا يبش ..
وتتعب الأم من الهم والحزن والخوف عليهم..
وفيه حركات وإضافات ممكن تضيفها الزوجة ..
تحسب لصالحها..
فلما يزعلها الزوج تلغي الحركات اللي تميزها عن غيرها في نظر زوجها فيحن لرضاها غالبا..!!
بدعي..فكري..
والزوجة غالبا لما تحب زوجها فهي راح تبدع..!!!
أولا..
تعوده على قربها ..
يجي من دوامه يتغداء..تجلس حوله تهمز راسه..تكون مستمعه جيدة لأنه يبي يسولف بكل اللي مر عليه بالعمل..
مفرش السرير كل أسبوع تبدله بمفرش ثاني موجود..يدخل يشوف التغير ..
تلبس لبس مغري..
وتروح وتجي عادي تسوي نفسها بريئة مهما طارت عيونه..!!
ماينام إلا وهي جنبه..ماتتركه أبد يحط راسه على الوساده ويهوجس بلا أنيس..!!يكفي أيام النفاس بيرقد هالرقده وحيد بلا وحده تلاعبه..وإذا ماجاه النوم تمسح على وجهه وعيونه وتوانسه..
يوم الجمعة تبخره..وتقدم له التمر ..
ومن الحركات اللي ممكن تجي من كل زوجة..
الغيـــــــــــــــــــــرة ..!!
وش نوعها عندك.؟
أسألي نفسك ..
وقيسي على مواقفك في أيامك مع زوجك..
- تفتشين جوال زوجك.؟؟
فرضا فتشتي ولقيتي رقم غريب أو رسالة مو مفهومه...واجهتي زوجك صرختي بوجهه ..
وش أستفدتي.؟؟؟
أنا أقولكم تجربتي..
أول الزواج كانت غيرتي نااااااااار لكن على نفسي يعني هو مايدري إني أغار..!!!!
لكن كنت أتعب نفسي وأطحن بدون مايدري..
وكنت كل ليلة ينام أشيك على الجوال..
لما أشوف عنده بلوتوث مايعجبني ..
أخذ منه البلوتوث وبعد يومين أوريه أقول ماشفت هالبلوتوث يفشل..
فيشوفه ..ويقول ايه عندي ..ثم يطلب مني أمسحه يقول ماأرضى تشوفين حركات هالشباب الماصخه..!!
قلبت الغيره عليه
ولما ألقى رسالة كذا ولا كذا من رقم غريب واضح إنها لعابه أو لعاب أعطيه أسبوع إن ما مسحها مسحتها أنا وشوله تقعد..
الحين تغيرت مفاهيمي ..ومع العشرة ومعرفتي له..هدأت الغيره وصارت طبيعية..!!!
ولايمكن أصارحه بغيرتي وأضيق عليه الييين يحس إنها من ممنوعات الزوجة وليست من المحرمات.. ..
لأني ماابيه لما يمر على أشياء تثير الفتنة يقول : لاتشوفني زوجتي..!!!
أبيه يقول: ياويلي من ربي كيف أعصيه..!!!
لأن مهما شال همي أضل ضعيفه مااقدر أنهيه عن هالشي..
أما لما يخاف من عقوبة ربه فهو راح يأنبه ضميره ثم يلجأ لطاعات يكفر عن ذنوبه..ثم ربي برحمته يعينه ويحصنه عن كل شر وفتنه..
وبالنسبة لغيرته هو عليك لاتحاولين تستهلكينها الين يمل ويصير عنده تبلد..!!
خليها طبيعية تجي لوحدها..أطعم حتى..!!
ونفس الشي لما تشوفينه بدا يزودها ويغار عليك من أخوك أوأو....
ضعي حد من البداية..
واستسخفي تصرفه ..وتحمدي وتشكري ..
خليه يحس إنه غلط..
ومايسوي كذا إلا الإنسان المريض أو راعي سوابق..!!!!