هل انا طبيعيه او لا ؟؟

السلام عليكم ورحمه الله

هلا الله حيهم

بالاول اعرفكم على نفسي انا بنت عزباء عمري 23 سنه لي سنه متخرجه من قسم حلو وومطلوب بجامعه الامام بالرياض
الحمد لله مرتاحه نوعا ما بحياتي لكن هناك شي يضايقني ويشغل تفكيري ومررره مخليني دايم سرحانه ومو مركزه بشي

اللي هو طبعا مشغل البنات ""فكره الزواج ""
يابنات انا قبل مااتخرج كنت دايم انخطب وكذا من جميع الدرجات ناس كويسين وناس عاديين وناس مو مره وكنت دايم ارفض مدري من خبالتي او اني مااهتميت بفكره الزواج والا لاني اغتريت بنفسي وقلت اكيد دام ذولا خطبوني اكيد فيه احسن منهم بيخطبون وهناك بعد سبب ثاني الا هي دراستي بحكم ان تخصصي صعب وابد ماينفع اتزوج كنت اوهم نفسي بهالسبب لكن ماكان هذا سبب رئيسي لاني صديقاتي نفس تخصصي متزوجين وعادي وممشين امورهم

المشكله الحين اني تخرجت ومن تخرجت مادق بابنا احد وضايق صدري مدري احس اني ندمانه اني رفضت ناس ماعليهم وربي اني ندمااانه بس وش ينفع الندم:(
واللي يزيد الطين بله امي كل شوي تقولي اللي تتخرج تقل فرصتها بالزواج الناس يبون البنت الصغيره اللي توها تدرس:44:

بنات ساعدوني قولوا اي شي احس اني خبله :angry:اني رفضت ناس تقدموا لي وربي اني احس انها عقوبه من ربي انه ماصاروا يجون لي ناس الحين حوبت هالناس اللي رفضناهم باسباب سخيفه وتافهه!!!

ومشكلتي الثانيه اني لما ابي اسعد نفسي واتقرب من الله مرره واحس الفرج قرررريب وانبسط سبحان الله اسوي معصيه مثل الاغاني وغيرها وابعد عن ربي والله يابنات مرات اشوف الفرج بعيوني خصوصا لما اقوم الليل بالصلاة والدعاء بعدين سبحان الله فجأه اصير ودي انام الليل ومااسهر اقوم الليل يعني اخرب على نفسي ليش كذا يصير معي ووشلون استمر وماانقطع انصحوني ؟؟؟؟؟؟

اااخ بس وش اسوي ادعولي بالهدايه واني ابعد عن المعاصي وان الله يغنني بحلاله عن حرامه واتزوج وافرح امي خواتي اللي اكبر مني متزوجات لكن ماجابوا ضنى وامي ياعمري حاسه فيها ودها باحفاد يسعدونها ودي اتزوج وخواتي يحملون ويجيبون توأم ونفررررح

ايه صح
لما اكون مبسوطه وادخل هذا القسم اتنكد واتكدر اتذكر الزواج مدري يابنات خوفتوني احس من كلامكم ان البنت اللي عمرها 23 كبيره والا ؟؟ انتو وش تحسون كبيره والا عادي تكفون لاتجاملون ؟؟ ماشاء الله الغالبيه متزوجين 19 و 20

اسفه اني ازعجتكم وماعمري تخيلت اني اكتب مشكله زي كذا في اي منتدى لكن شسوي قلت بطلع اللي بخاطري

وسلامتكم خواتي