هل تصرف زوجي صحيح

السلام عليكم كيفكم ياحلوين
انا تزوجت قبل خمس شهور واحد يشتغل ب ارامكو
هو صديق اخوي وزميله بالعمل وطلبني من اخوي بدون حتى مايشوفني واخوي جاني وقالي انه طلبني منه وانه مارح يحصل احسن منه لي لانه رجال ونعم فيه
استشرت الوالد والوالدة واخواتي البنات وصليت استخارة ووافقت
وجاو خالاته طلبوني وحددو كل شي بما انه امه ميتة
تمت اجراءات الملكة والعرس بشهرين وصرت عنده
زوجي الحمدلله متكامل بكل شي
انا عمري ٢٣ سنة وهو ٢٤ يكبرني ب سنة فقط وكنت احسبها مشكلة بس تجاوزتها
طول ووسامة وهيبة وكشخة وعنده شقة فخمة ملك لحاله وسيارة حديثة وراتبه حوالي ٩٠٠٠ ريال ومع الايام يزيد وعنده مصادر دخل ثانية من املاك امه الله يرحمها
متميز بعمله والكل يمدح منه ومن اخلاقه وتعامله الطيب مع الجميع
بشوش بوجه الجميع ومايرد احد طلبه
الحمدلله مو منقص علي حاجة ابدا ومدلعني اخر دلع وكله من فلوسه مايخليني اصرف انا
طبعا لي عجبني فيه انه كتب بالعقد انه ماله علاقة براتبي ابدا
انا موظفة ايضا ببنك الاهلي
راتبي كل ماينزل بالشهر يقولي خبيه ولاتوريني ياه وانا اخبيه عندي وهو يعطيني مصروف ٤٠٠٠ ريال بالشهر
زوجي من يوم تزوجنا خفف علاقته مع ربعه عشاني
اول كانو كله سهر وطلعات الحين خففوها
بس لي الاحظه انه كل يومين لازم يزور اخته المتزوجة ويقعد عندها وهي لازم تجي بالاسبوع مرة تتغدى عندنا وتقعد هي وبنتها وتخليني ازورها بعد انا
للامانة طيبة جدا وقلبها ابيض وتونسني كثير
انا لي كان شاغلني هو عمي ابو زوجي ليه مايزورنا هو وحرمته واولاده انا ماشفته الا يوم العرس فقط حتى
زوجته ماحضرت
انا لي قالولي عن زوجة ابوه انها طيبة كثير وماقصرت عليهم بشي وبدتهم على اولادها وكله قعدو يتكلمولي عن حماتي لي هي امهم انها كانت قاسية وتعذبهم و تحرضهم على ابوهم وبعدها يقولون الله يرحمها راحت لديار الحق مانقدر نقول شي
طبعا لي تكلمولي همة صاحباتها لزوجة ابوهم
جيت فتحت الموضوع مع زوجي لقيت وجهه انقلب
قالي لاتفتحين هذا الموضوع مرة ثانية وطلع من البيت كله
حاولت اكثر من مرة معاه بس مافي فايدة رحت مسكت اخته ورحنا كوفي لوحدنا
اول مافتحت الموضوع لقيت وجهها انقلب هي الثانية
ومسكتها الين فتحت قلبها وتكلمت بالموضوع
اول شي كان ابوهم متزوج امهم وكانو اهل ابوه يكرهون الام كثير ويبغونه يتزوج مرة ثانية عليها
وفعلا خطب وحدة ثانية وتزوجها وانتهى امر ذيك بالطلاق
طبعا كان عمر اخته يومها ١٠ سنين وهو ٨ سنين
ورمو زوجي واخته عند بيت جدهم وهناك لاقو اصناف العذاب من جدهم وجدتهم وعمانهم الصغار
عذاب مو طبيعي
ينادون اخته يالمنطولة والجد يخليها تخدم عمانها وزوجاتهم
قعدو سنتين هناك كأنهم قاعدين عند يهود
وراحو بعدها عند زوجة ابوهم وهناك تضاعف العذاب عليهم
اي هي نفسها لي كانت تضحك ومسوية روحها ملاك نازل من السماء
كانت تكويهم بالحديد وتنيمهم بالملحق واذا جات تصحيهم بالموية الباردة ووقتها يكون الجو بارد
وتخليهم ينامو بالحوش بالبرد وبالصيف عريانين بدون مكيف
تمنعهم يجلسو معاهم على طاولة الاكل ويوم تخلص هي وعيالها يعطونهم الباقي
حرمتهم من امهم سنين وايام
خلت اخته خدامة تنظف البيت كله
تحرض ابوهم دايم عليهم وابوهم يضربهم ضرب مبرح
كلام كثير مايكفي صفحات
عاشو بالقهر والظلم ٧ سنين لحد ماتدخلو خواله وخالاتهم وامهم بالاخير وقدرو يسحبوهم لحضنهم
طبعا قبل ماكانو يقدرو يتدخلو بحكم الحضانة للاب وكل مايسألون عن حال العيال يقول ابوهم زين وكويسين ومو ناقصهم شي وعايشين ببيت جدهم
ابوهم شخصيته ضعيفة قدام اهله وزوجته وشايف الموضوع وساكت عنهم
بعد عمري جات كملت معاهم وتوفت امهم لانها كانت مريضة وزوجي كان عمره ١٥ سنة واخته ١٧
وانا اقول ليه زوجي يوم العرس سلم على يد خواله وخالاته وحضنهم بقوة وعماته تجاهلهم وحقرهم
وبالمقابل ابوه مصافحة عادية حتى بدون ابتسامة
خواله وخالاته عاملوهم معاملة ولا احلى من كذا
تحلفلي انه خالهم الكبير يبديهم على عياله بكل شي وطلعهم من جو الحزن والكأبة كله
ونسوهم الماضي كله وزوجو البنت لواحد من عيال خالها والرجال حاطها فوق راسه
الحين اخته طبيعتها قلبها ابيض ونست وغفرت لبيت جد ابوها
بس لزوجة ابوها لا وكله تتحسب فيها
اما ذاك حامل حقد الدنيا بقلبه على كل حاجة تخص عايلة ابوه
اخته تقوله جدك مريض سوى عملية يقولها ولعنة الله لا يشفيه وجعله مايذوق اسم الراحة
تقوله اخوك سوى حادث وتكسر يقولها جعله بالشلل
ولايزورهم ابدا ومقاطع ابوه من سنتين مايبغى يشوفه وحالف انه بيطرده اذا جاه وقالي انه كان بيوقف العرس عشان ابوه حضر
يجي عندي يفتح قلبه
يقولي انا احس نفسي بموت اذا ما انتقمت منهم لاني عشت طفولة قاسية كثير بسببهم وفوق ماتتوقعين
يقولي انا قلبي ابيض مو اسود وما احب الحقد بس لي عشته مع اهل ابوي يخلي الواحد يكفر ويطلع من دينه
انا متعاطفة معاه كثير وصابتني حالة نفسية بسبب قصتهم
اقوله ياعمري لاتفكر بالانتقام وفوض امرك لله هو لي بياخذ حقك وحق امك واختك منهم
يا الله وش هذا الظلم ولييييه كل هذا العذاب والظلم لطفلين ابرياء خليتوهم كذا
والظلم الاكبر امهم الله يرحمها ماتهنت بحياتها يوم كانت على ذمة ابوهم عذبوها وخلوها خدامة لهم وبعدها طلقها وحتى يوم تطلقت يطلعون عنها كلام ويفترون عليها ورب الكعبة انهم وصلو يتكلمون على عرضها وشرفها ويطعنون فيه
انا اواسي زوجي واذكره ان الله يمهل ولايهمل وربي
بياخذ حقه منهم
كلهم حصدو لي زرعوه
جده وجدته الحين عايشين لوحدهم كل عيالهم ساحبين عليهم وبالموت يزورونهم بالاسبوع مرة وعاقين فيهم
زوجة ابوه الله ابتلاها بعيال يكرهون بعضهم
هواشهم يسمعوه كل اهل الحي بسبب المشاكل لي تصير بينهم وهي تصير تبكي
اختها صادوها الهيئة مع رجال بوضع مخل للاداب وانفضحو وسيرتهم صارت على كل لسان
اختها هي نفسها لي افترت على ام زوجي
انا اقول لزوجي انه يكلم ابوه بس عالاقل بس هو مايرضى ابدا
انا اخاف يكون في قطيعة رحم بالموضوع وعقوق من الابن ل ابنه
انا احب زوجي كثير واخاف عليه من هذا الموضوع
وش رايكم انتم احبائي