السلام عليكم
اتمنى تعطوني حل وتساعدوني في طريقة التعامل مع زوجي
انا متزوجة من سنة تقريبا والحمدلله حياتنا مستقرة جدًا ونحب بعض هو اكبر مني بسنتين
المهم بعد الزواج بثلاث شهور سافرنا 6 شهور برا عشان ناخذ لغة مع بعض
وكنا بنفس المعهد بس مستوياتنا مختلفة..
المهم زوجي كنت الاحظ انه يغار علي من فترة الملكة
بس كنت اقول عادي يعني زي اي رجل
لكن بديت احس ان الموضوع اكبر من الغيرة صرت احسه ياشكاك يامو واثق فيني او مو واثق من نفسه
مع انه مثقف وتفكيره حلو وشخص واعي
بس ليش يسوي كذا مدري؟
كان بالمعهد بس يراقب انا اكلم مين انا اتعامل مع مين
اكيد عندي اصدقاء بالكلاس يساعدوني اساعدهم عادي
بس اول مااطلع ينتهي كل شي
الست شهور كانت حلوة لولا بعض المنغصات اللي سوالي اياها ..
اول شي كان معي بكلاسي ولد سعودي مابيني وبينه شي ابدا ابدا ابدا
بس هو يكرهه كذا من ربي
اذا طلعت من الكلاس عادي مبسوطة يقول اكيد سولفتوا اكيد فتح معك مواضيع اكيد مدري ايش
اقوله ماصار شي ترا احنا جايين ناخذ لغة مو جايين نتعرف يقول اوكي ..
بعد فترة جاني فتح لي سالفته من جديد
انتي معجبة بشكله صح؟
عاجبك وجهه؟
تخيلوا يسألني اسئلة كذا
الولد هذا صح وسيم لكن انا مو معجبة فيه
كيف جاء بباله كذا اصلا؟؟؟؟؟
قلتله من جدك تفكر كذا انت مالي عيني وانت احلى رجل اشوفه ومدري ايش وكذا كنه تطمن وسكت
المعهد فيه سعوديين وفيه اجانب وفيه من كل الجنسيات
مو مستقعدلي الا ع ذا الولد
احيانا يسوي مشاكل من الفراغ بسببه
وبآخر شهر تخيلوا ايش سوا من قوة الشك
راح كلمه🙂 قاله انتوا بينكم شي؟
مستوعبين الموقف الغبي اللي حطني فيه
انا زوجتك طيب !!! وقايلتلك كل شي
عصبت عليه مرة قال شسوي شي خارج عن ارادتي
دايما هذي كلمته كل شي يسويه خارج عن ارادته
ويوميا اقوله انت مالي عيني انت احلى شخص اشوفه انا راضية فيك
مع هذا يشششك؟!
لاحظت ان عنده هاجس ان احد يلفت انتباهي
عنده هاجس اني أُعجب بأحد بالذات بالشكل
الغريب كيف يفكر فيني كذا؟؟؟؟؟
حتى نظراتي محاسبة عليها
حتى لما اسمع صوت احد يغني واعجبني مااقدر اعبر
يخاف اني امدح اشياء مو موجودة فيه وتنشب بيننا حرب
يعني قبل ماامدح اي شي لازم اتأكد هالأشياء فيه ولا لا
طبعا انتهى المعهد واخذنا لغة ورجعنا السعودية الحمدلله
وبدأ فصل ثاني من القصة
تخيلوا احيانا اذا بطلع يقول مو لازم تطلعين خليك اليوم معي ومدري ايش
ويكسر خاطري واجلس مااطلع
وهو مايطلع برضو
لين مااكتشفت مؤخرًا انه مايحب يوديني جمعات بنات خالاتي
لأنه يخاف انبسط معهم اكثر منه ! تخيلوا؟
صار يحرمني من الطلعات اللي انا احبها
انا متى شكيت ان زوجي فيه مشكلة
لما لاحظت انه اذا بيوريني شي اعجبه اي شي حتى لو تافه يتردد يعني يقول ترا هو مو مرة حلو بس مدري شوفي ..
وحتى لو كان هذا الشي فعلا مو حلو
انا انبهر اقوله مررررة جميل واعجبني وكذا
لما يعرف انه اعجبني ينبسط مرة كأنه طفل
ملابسه طبعا انا اختارها له انا انسقها
مع ان ذوقه حلو
اذا راح السوق يكلمني فيديو يوريني ويستشيرني
هذي الاشياء الصغيرة انا احبها والله
احب انه يشاركني كل شي
بس زوجي مو واثق بأي شي يسويه واي شي يجيبه
حتى شكله مو واثق فيه
مع انه يعتبر وسيم جسمه حلو رياضي شعره حلو
بس انا مقصرة شوي بمدح شكله
واوقات يجيني شعور يحس اني كثيرة عليه💔
طبعا هذا كوم وكيف ينبّش من وراي كوم ثاني
يتابعني بتويتر وانا فعالة مرة بتويتر ومتابعيني كثير
وهذا الشي رافع ضغطه يخاف ان لي علاقة بالهوامير
ومدري كيف يفكر فيني كذا والله
مع اني دايم اوريه واعلمه كل شي اول بأول
واذا تابعت شخص متابعينه قليل يجيني بدوامة اسئلة مالها نهاية.. مين هذا ؟
ايش تبين منه؟ عاجبك ليش؟
اذا احد منشني بتويتر يسألني مليون سؤال
واحيانا يجججججججرح بكلااااامه ويعصبني
طبعا يقولي دايم يجيني شعور حلو لما تغارين علي
اقوله اي بس انا واثقة فيك
يعني انا مااحب انبش اشوف هو مين يكلم واجلس افسر تصرفاته مريحة راسي مرة..
فهو اوقات يقولي مواقف يبي يستثير غيرتي وانا عادي..
يعني قبل يومين قالي سالفة ان وحدة معهم بالشركة قالتله تقدر تتوسط لنا يجيبون لنا الة قهوة ؟
وان هو سفهها
واكيد هي طلبت منه هو بالذات عشانه طيب واسلوبه حلو ومدري ايش
انا ادري قال السالفة عشان بيشوفني اغار ولا لا
انا ضحكت وقلتله شكلها تحب القهوة ليش ماتجيبون الة ؟
ردة فعلي طبيعية هذا الشي اللي جاء ببالي وقتها
الزبدة انا احس فيه مشكلة بطريقتي بالتعامل معه
احسه هو يحتاج اشياء معينة مدري ايش هي بالزبط
وبنفس الوقت مرة احبه ومو قادر يستوعب ذا الشي
وخلاص مالي عيني وراضية فيه لدرجة صرت اقوله اقرأ هذي الجملة عشر مرات يوميا عشان تستوعبها
مع هذا يرجع يشك ويغار ويسويلي سالفة حتى ع الاشياء اللي اسويها بصدق نية
ماابي وضعنا يتأزم ..وتنقلب حياتنا جحيم
يلزم عليك تسجيل الدخول أولًا لكتابة تعليق.
سحابة4
•
ممكن زوجك يشوف انك ناجحة أكثر منه وهو اساسا ثقته بنفسه مهزوزة متوقع ان شخصيته ماراح تعجبك ويشوف عالواقع شخصيات أفضل منه وخايف.. يحب يكون هو محور حياتك..وانت يمكن مشغولة عنه.. عموما كثري له مدح مو فيه نفسه لا في شخصيته صفاته حاولي تخفيف من البرامج اللي تثير غيرته مثل تويتر ترى مو كل الرجال يحبون زوجاتهم يكونوا عالبرامج هذي ومتابعين وردود ومدري ايش حتى لو الكلام عام ومن حقه لو منعك.. خليك وسط.. أو اجلسي فترة لاتتابعي أو لاتردي وإذا سألك قولي مليت مو كل وقت بجلس اتابع وشوفي كيف يرتاح.. سددي وقاربي في حياتك مابين نفسك ورغباتك ومابين زوجك ورغباته.. والله يسخركم لبعض..
الله يسعدكم ويهنيكم، حياتكم حلوة ماعدا هالموضوع... لو تقدرين تقنعين زوجك حتى لو بطريقة غير مباشرة إنه يشوف دكتور نفسي لأن واضح الموضوع يحتاج مساعدة مختص عشان زوجك يسترجع ثقته بنفس وتعيشون حياة طبيعية.. لو كُنتُم بالرياض فأنا أقترح مركز إدراك
بتول~
•
زوجك يحبك وخايف يفقدك هذي النقطه هي سبب الحكايه الي تصير معكم ..ﻻ تشيلين هم مع الوقت الزواج يتحول لموده ورحمه الحب كذا ..يصير طرف يحس انه يحب اكثر ويحس انه الطرف الثاني مايحبه بالشكل الي يحبه فيه فزوجك فاقد الثقه بنفسه ويحسك ممكن تتركينه ..الثقه ذي انتي مسؤوله عنها ..في اخطاء تسوينها فعلا خطا ..بالصف ماكان ﻻزم تكلمي اوﻻد ..بتويتر المنشنات مالها داعي ..ماعرف بس انتي لو سوا العكس ماراح تغاري ..فعلا هل انتي راح تحسي بغيره او ﻻ لو كان العكس ..زوجك يطمنك ويقول لك انه يرفض بنات انتي ماتطمنينه تكلمين وتمنشنين وعادي ومتوقعه مايغار طبيعي اي رجل معه زوجه وهو رجل طبيعي بيغار بس نوع زوجك ضعيف فتلاقينه بدال مايمنعك من اشياء ثانيه يلتف بطريقه خطا زي ماكلم الولد لو كان قوي شخصيه كان امرك تقطعي اي تواصل بس ضعفه هو الي يخليه حزين ومتوتر وشكاك ﻻنه يخاف يوصل لك الي يبيه وتكسرينه او تتركينه ..
احس زوجك فاقد غيرتك عليه ،، ترا الغيره المحدوده اساس الحب.. اظهري له انك في بعض الاحيان تغاري عليه وبدلع.. يعني مثلا لما قالك القصه كان قلتي اكيد اختارتك لانك ذوق ومحترم والله اغااااار عليك ماودي اي وحده تكلمك وبس كذا مجرد كلام وشكله مدقق عليك لانه شايف مافيه غيره منك تأكد كلامك وحبك له فخايف انك بأي لحظه تدوري غيره وهكذا.. اعطيه شوية ثقة بحبك له وعبري عن حبك بالافعال..
الصفحة الأخيرة
الدعاء والمدح بيساعدك بحل مشكلتك