هو ذا اسمه غيرة والا وشو ؟؟ تكفزن ساعدوني

السلام عليكم

صبحكم الله بالخير وبالسرور

سامحوني ازعجكم بهالوقت بمشاكل بس والله مالي الا االله ثم انتو افضفض لكم

:44:

:mad:

:44:

يا بنات

انا امس كنت عند اهلي من المغرب
ومتعودة زوجي ما يتأخر الا 12 وحول
عاد قبل لا نطلع من بيتنا كان مرررة فيه النوم ويقول ان جيت ومالقيتك جاهزة المغرب بارقد وروحي العشاء
فطرت طيرااان وحوسة عشان اجهز عشان يوديني
وعلى قولته عشان نرجع بدري
المهم يوم رحت لاهلي وجت الساعة 12 ونص مادق الرجال خفت عليه
دقيت وقال لي يمكن يقعد زود ساعة لانه مبسوط مع الشباب -ما اخفيكم كنت متضايقة بس قلت ماعليه خله يوسع صدره-
يوم جت الساعة 2 قضيت
فدقيت عليه وقال لي انه توه قلت له يعني انوم قال بكيفك بس خبريني
استعنت بالله وضفيت عفش وليدي واتجهت لغرفة الضيوف ببيت اهلي ورقدت وليدي ثم ارسلت رسالة لرجلي نصها :

لاتدق ترى بنوم
اذا صحيت بدق عليك
تصبح على خير

وانا قصدي اذا صحيت الفجر
ومتوقعة هو بيرجع ينوم بالبيت لين الفجر ثم يجي ياخذني
يوم جا الفجر دقيت اقومه
والا ابو الشباب يعطيني مشغول
ثم ادق ثانية ويرد يقولي انه مابعد نام
وانه بيصلي في مسجد بعيد عن بيتنا حول 40 كيلو ثم بيوصل الرجال ثم بيجي
انا قلت له انت بخير؟
<< كنت خايفة عليه لانه من 7 قايم وواصل للفجر ولسه بيسوق مشوااااار
قلت له ترى مو لازم تجي اذا بتتعب رح نم بعدين تعال العصر
قام صرفني بكلام جاف وقال اقول باجي خلاص !!

بصراحة يا بنات انقهرت
انا مانمت زين ولاكنت مستعدة للمراح عند اهلي وكذا وليدي مامعي الا رضعة وحدة له
وزود على ذلك خايفة عليه وهو يقولي كذا !

وكمان هالرجال الي هو طالع معه
من زمان وانا اغار منه صراحة لان زوجي كل جمعة يقوم معه قبل الفجر ويروحون يصلون في مسجد مشهور بقراءته
بعدين يقعد يفرفر به في شوارع الرياض الى 8 اقل شي
ومثلكم عارف شعور الزوجة لما تصحى الفجر ماتلقى زوجها جنبها
وحتى لو قمت الصبح وحبيت نفطر يقول لي قبل 8 لايمكن
ويتمشى معه في اماكن حلوة انا احبها ويقهرني لما يجي ويقول شفتي رحنا لكذا وشفنا كذا
والرجال هذا يعرف كذا وكذا
وزود عليه انه لو ينوم 3 يقوم لهالرجال 5
حتى مرة من المرات طلبت منه نطلع الصبح الجمعة
كنت توني مخلصة اختباراتي الخميس وكنت فعلا مشتهية هالشيء قالي اجليها للخميس الجاي
يعني انا يأجلني عشان يطلع مع خويه الجمعة
ليش انا اتأجل وصديقه لا؟
وليش مخصص له يوم كل اسبوع ومايقدر يتخلف عنه الا اذا عوضه في يوم ثاني؟
طلع ذا جارة (ضرة) مو صديق !!!
والي قاهرني زود ان هالصديق دايم يرسل له انك قدوتي واني احبك في الله و.. ,و .. ورجلي ينتفش من هالكلام ويطير معه كنه خبل دون مراعاة لي ولا لظروفي

عاد نعود لسالفة اليوم
انا بصراحة يا بنات ارتفع ضغطي
وقلت هذا الي كان بيموت عشان ينوم
الحين مواصل 24 ساعة عشان خويه ذا
والله لو انا ما يجاملني هالمجاملة
وقمت وارسلت له هالشي في رسالة وبينت له قهري وقلت لا تجي خلاص
لاني عارفة لو جاء بتصير مشاكل ففضلت يروق شوي واروق
قام كلمني وهزأني قدام خويه وقال لي لو قفلتي الجوال بقفل راسك
انا انقهرت حسيت كنه يرضي خويه ذا بهالكلام
بس المشكلة ان عندي عزيمة الجمعة غدا
وابو الشباب ولاهمه يقول بنوم للمغرب
يحسبني بقدر انوم مثله وانا لازم اقوم الظهر ارتب بيتي واخلص شغلي وحلاي وسلطاتي اصلا حد مايمديني اخلص كل ذا

بصراحة انقهرت من عدم مراعاته لي مع اني دايم اراعيه
وارجع بدري من العزايم عشانه
وكذا كثير من العزايم والطلعات ماروحها عشانه
فيقوم هو بكل صفاقة ويقهرني ولايراعي ظروفي وراحتي عشان خويه !!

الي قهرني بعد
اني حسيت انه يعوض عن يوم الجمعة عشان عندنا عزيمة غدا
فيمكن مايقدر يطلع معه عشان كذا يعوضه ...

حشى طلع فرض هذا وأنا السنة !!!!!

الخلاصة اني استعذت بالله ورحت معه
بعد ما استحلفته بالله ما يمد يده عشان هالرجال
_سبق و مد يده علي عشان خويه ذا_
وهو استحلفني ما افتح الموضوع

ومن وصلنا هنا حط راسه ولا اي كلمة ولف خشته وجسمه كله عالجنب الثاني

اما انا ففيني قهر ماطلع
ونفسيتي ازفت منها مافيه
وماعرفت ارقد ابد
فقلت اجي افضفض لكم عل وعسى القى منكم النصيحة والارشاد .... والدعاء تكفوووون

:44:

:mad:

:44:

:mad:

:44: