واصله معك منتهاها من ابو الشباب تعالي شوي...

بسم الله الرحمن الرحيم

حبيباتي المتوترات والمرهقات من مشاكلهن ... السلام عليكم ورحمه الله وبركاته

ابدخل بالموضوع على طول :
اول شي مليون عضوووه وعضووه كاتبه مشاكل مع زوجها كبيره وكثيره وتنزل موضوع تطلب المشوره وطبا العضوات مايقصرون ماشالله يشوروا عليها بحلول كثير وبعدين تنزل موضوع بعدها بفتره تشتكي مره ثانيه

هذا معناته شيئين : يا ان العضوه مانفعت معها الحلول اللي طرحوها البنات وهذي مشكله

او انه تكون العضوه مااخذت بنصايح البنات وهذي مشكله اكبر


يعني لما تكون نزلت موضوع طويل عريض وقالو لها البنات ان مثلا المشكله انك محبكتها شويتين او انك ماتصرفتي صح بالموقف الفلاني فالافضل تسوين كذا كذا عشان تحاولين تصلحين الوضع وبعده بفتره تلقين نفس الشكوى


يالله ياحبيبتي اذا كنتي منزله موضوع تبغين فيه نصيحه صادقه فاحنا مانعرف شخصك الكريم يعني بنصحك على حسب مشكلتك اللي احنا شفناها مو عشانك فلانه بنت فلان وبنترصد لك.. طبعا مو كل نصايح العضوات يؤخذ بها لان فيه ممكن عضوه تقرا مشكلتك ويحترق دمها عليك وتقولك سوي كذا بزوجهك هذا مايستاهلك ولا شي سوي وافعلي اتركيه ... هذي مو معناته انها تكرهك لا او انها تبي لك الشر لاا هذي وجهة نظرها لكن بما انها خارج الموضوع سهل تحكم بذا الحكم وتقول سوي كذا لانها تطلق حكم مطلق فقط لكن لو كانت بنفس دائرة الحدث يعني لو كانت المشاكل تصير لها هي كان تغيرت نظرتها لانها في وسط المشكله راح تفكر في اشياء وتحسب اشياء ممكن ماتطري عليها وهي مجرد قارئه ادلت بنصيحه خلال تصفحها .... هذي نقطه حبيت اوضحها يعني احنا ماننصحك لانك بنت فلان يعني ماننصحك لشخصك لانا مانعرفك اصلا يعني لاتقولين هذي قالت لي كذا تبغا تدمر حياتي لا هذي قالت كذا لانك عضوه طارحه موضوعك وتبغين الكل يساعدك بحلها وبنفس الوقت فيه نصايح لاتطيرينها من يدك ...




ثاني شي ان العضوات الكريمات ممكن يعطونك حلول جدا ممكن تغير حياتك للافضل لكن للاسف الشديد انتي منزله موضوعك لانك ماتبغي حلول لا ..! تبغين البنات يقولو معاك الحق وهو الي فيه وهو الي مايستاهل ضفرك ...
يعني اذا كنتي منزله موضوع وماتبين تتقبلين وجهة النظر الثانيه اللي ممكن تكون بغير هواك يعني ممكن تشوفك انتي الغلطانه وبيدك تصلحين الخطا ..... هذا يعد مشكله لانك ماتبين الا اللي يصفق لك يعني ماتبين احد يوضح لك اخطائك ويحاول يعطيك نصيحه عشان تصوبين ذا الخطا يعني تعتبرين نصيحه العضوه هذي كانها سبه وشتيمه لك واعيد واكرر هذي نصيحه لانك عضوه منزله موضوع يعني مو لانك فلانه بنت فلان ...... اتمنى فهمتم ذي النقطه
يا اختي ........... البنات ماينصحونك الا باللي يشوفونه صح ويشوفونه من مصلحتك


ثالث شي بليز ماتبين تاخذين بنصايح البنات ولاتبين احد يقولك انتي خطا بليززززز فضلا وليس امرا ماراح اقول لك لاتنزلي موضوع لا... فقط لاتقولي يابنات ساعدوني .... يفضل تقولي ابي افضفض بس ...اوك




والحين نجي لصلب الموضوع اللي هو ابو الشباب وبهدلته


اول شي ماراح اعطيك اقتراحات واقولك سوي كذا اذا كان زوجك مدمن مخدرات او مسكرات الله لان صراحه لا اعلم شي ومن قال لا اعلم فقد افتى ...
ثاني شي انا بعطيك مقترحات للي زوجها هي وياااه بطقاق اربع وعشرين ساعه وكل واحد معند وراعي العلاقات اللي قلبه يوسع مليون بنت ( بوجهة نظره هو)


قبل شوي قريت دوره طريقتين تملكين بها قلبك مثبته بذا القسم ماشالله مو ناقصها شي اتمنى تطلعين عليها لانها تكفي ..


اول شي بما انك انتي وزوجك في مشاكل هذا معناته انكم مو قادرين تتوصلين لطريقة تفاهم وانا شخصيا احملك 80 % من سبب الخلاف ( ترا حطيتها ثمانين عشان ماتذبحوني ولا نفسي ازودها ...)
شوفي ياقلبووووو يوم كنتي ايام زمان ايام شهر العسل السعيد ( طبعا نستثني بعض الحالات ) كان عريس الغفله :35: مايرفض لك طلب ابد ابد كني ملكه تامرين وينفذ كل شي وهو بس يتمنى انك ترضي وبعدين يامغير الاحوال صار النقيض تماما يعني ماصار يعطيك وجه بس يسب ويشتم ويطالع بهذي وذي ......... ليه وش اللي صار


ياحلوه زوجك اول ماتزوجك نصبك ملكه خلينا نقول لمدة شهر ....


وبعدها اخذ منك المنصب الحلو وامتيازاته تدرين ليه



لانه كان يتوقع انك ملاااااااك وملكه بالفعل ولكن للاسف الشديد بعدين اكتشف انك اقل بكثير


ومن وين جا الاكتشاف الجهنمي طبعا منك ياحلوه سفهتي بنفسك قدامه بينتي له انك شخصيه مهزوزه وماعندك ثقه بنفسك بينتي انك شخصيه مهمشه يعني قلتيله اهلي كانو معذبيني ومبهدليني ( على فكره الرجال بيقول ليه ادلعها وهي عند اهلها ملعوب في حسبتها ) يعني بالعاميه خربتي على نفسك

او انك صح كنتي دلوعت اهلك وحبوبتهم لكن ما ارضيتيه في ذاك الشي واصبحتي تعاقبينه بذاك الشي طبعا انتو فاهمين




يعني زوجك ترضينه يرضيك تطنشينه يسحب عليك .......:44:



يعني لاتشوفين زوج هذي وزوج هذي مسوين لهم وجايبين لهم ومعيشينهم ملكات زمانهم ليه يا اموووووووره تدرين ليه لانهم ارضو ازواجهم بالاول وبعدين بدوا يطلبون ويتدلعون لانهن قامن بعملهن على اكمل وجه والحي جا وقتهن يتدلعن

فهمتي يعني ارضي زوجك بعدين انتظري منه انه يدلعك يعني مو تقولين ياسلام وش حضرة جنابه ليه انا ارضيه واتعب نفسي وهو ولاهو مسوي لي شي ليه اتعب عمري عشانه ..... :mad:


خطا خطا خطا قدمي لكي تحصلي .....







يعني الحين بعد ماقريتي موضوعي اتمنى تقعدين مع نفسك شوي وتشوفين زوجك وش كان يقولك وهو معصب ( انتي ماتحسين فيني او انتي نكديه او انتي ........... الشتيمه اللي هي ........ ) انتبهي كل اناء بمافيه ينضح يعني قالها لك بوقت الغضب لما يكون زعلان علي في ذي اللحضه هو مو مهتم برضاك لانه زعلان وطلعت منه الملحوظه هذي اعرفي وافهمي ان هذا اللي يضايق زوجك منك يعني مو تقولي ليه تقولي اني نكديه او ليه تقولي اني ما احس يك اسكتي وحلو مشكلتكم وبعدين روقي وصحصحي لذي الملاحظه وشوفي ترا الكلمه هذي اللي طلعت تعتبر تقييم زوجك لك يعني زوجك قال لك هذي الكلمه ممكن تكون فورة غضب لكنها ماتخلو من خلينا نقول لو 1% من المصداقيه يعني ممكن تكوني نكديه 1% وممكن اكثر عرفتي الحين ......... خلاص وصلت المعلومه اللي هي نظرة زوجك لك انك نكديه لاتجادلينه فيها وتقولي ليه انا نكديه وليه تقول علي كذا وانا اللي دايم اراعي مشاعرك وانا وانا .. لا ياقلبي لاتناقشينه فيها لانك لو جادلتيه على ذي الكلمه صدقيني بدل ماكنت نكديه 1% راح تكوني نكديه 100 % يعني خليها واحد اصرررف .... من انك تكوني نكديه بحق وحقيقه




الحين عرفتي انك نكديه خلاص ياحلوه هدي العيار شوي وخليكي رايقه واذا تهاوشتو خلاص لاتعندي وسم وامر خليه يغير فكرة نكديه عنك احسن ماتكون لصيقه بيك طول العمر وبعدين ممكن تتعبين ماغيرتيها




(يعني الملاحضه اللي يقولها لك زوجك بلحظات الزعل انتبهي لها واشتغلي عليها .....ولاتخلينها تمر مرور الكرام )

على فكره لما تكونون رايقين انتي وزوجك وبجلسة صفا وتقولي ايش الي ماتحبه فيني ؟.... صدقيني الحين ماراح ينتقدك انتقاد قوي لانه بيكون يداري مشاعرك وراضي عليك .....



على فكره ترا مو كل الشتيمه اللي تطلع وقت الغضب تكون صح بس انتبهي لها وحاولي تعدليها لاجل مايصير فيه خلل




واعيد واكرر اذا مو مستعده تحاولين تصححين من مسار حياتك ترا وضع المتفرج وانتظار الطرف الاخر ماراح يفيد

لان الطرف الاخر ممكن يتزوج او ممكن يسوي علاقات وانتي لاا يعني احفظي زوجك وارضيه




اتمنى انكم استفدتو من موضوعي وعلى فكره فيه موضوعين للعضوه ام فايز صراحه كنز ثمين اتمنى تطلعون عليهم واتمنى ام فايز تكمل موضوعها الثاني اللي هنا بقسم الاسريه اللي هم
الاول : من حياة ملخبطه ووقت ضايع الى حياة مرتبه وراحه نفسيه
والثاني: زوجي صار هو اللي يلاحقني




اتقبل انتقاداتكم واذكركم واذكر نفسي ان الاختلاف بالرأي لايفسد للود قضيه


<< اكره ما اشوف الاخطاء الاملائيه بس شكل موضوعي مليان مشاكل نحويه



.
..
..
.
.
.
.
..سلامي