وافديت عيون البدو ادخلوا وانا اخبركن شو سر سوادهن وبالذات في ثبات جحلتهن.

مرحبا خواتي ...

اليوم انا جايبه لكم طريقه انا بصراحه اخترعتها على حسب خبرتي واحب استخدم هذي الطريقه يوم امكيج اي عروس او اي وحده معزومه من صديقاتي ... والحمدلله كل اللي انبهر من طريقه كحلتي طبعا خبرته شو استخدم تعرفون عاد اختكم دريم من حد يسألها عن شغله تستانس يوم تفيد خواتها ...
الحين بتنصدمون من اختراعي.

... نقول بسم الله الرحمن الرحيم ..

1- كحال كاجل الهندي ،
اللى يجي على شكل مرهم وبداخله مرود ولونه من الخارج ابيض ...اكيد عرفتوا اللي قيمته ب5دراهم عند الهنود ..... بتحصلون في السوق اعرف بتقولون يسيح وما يثبت ... انا اقولكم امشوا على طريقه اختكم دريم وبتقولون انها صادقه .

2-اي قلم كحال بس يكون شمعي او كريمي ، مثل قلم من ماركه نوبا او من نيفيا او HR
او كلارنس اهم شي يكون شمعي او كريمي .

3- ايشدو من ماك لون بيج بدون لمعه اسمه BRULE
بصراحه هذا الايشدوا انا اسميه المصحح لان يخفي اي خط او بارز وانت ترسمين عينج بدال لا تمسحين اتخربطين رسمه عينج .

الطريقه :-
الخطوه الاولى:
تكحلين عينيج عادي بكحل كاجل .

الخطوه الثانيه :
تسندين ايدج على الطاوله وبصبعج تبرزين خط الجفن السفلي ... كأن شي دخل بعيونج وتحاولين اطلعينه منها ... فهمتوا كيف تبرزون الخط السفلي ..بايدج الثانيه تمسكين بالقلم وتكحلين عينج بالقلم .
بتقوليلي ليش بقولكم لانكم اذا كحلتوا عينكم بالطريقه العاديه يمكن تكون رطبه ولون القلم ما يطبع عكس لما تبرزين خط الجفن ويكون ضاربنه الهوا وناشف حيل من اي دمعه ومن تكحلين عينج على طول يثبت اللون .... وبصراحه انا وايد افضل هذي الطريقه .


الخطوه الثالثه :
اذا ما كان عندج من نفس ماركه ماك انصحج نصيحه تستخدمين فقط البودره المضغوطه بس المهم يكون لونها لحمي او بيج خفيف او ممكن برونزي وتمررين اللون البيجي بالضبط تحت رموشج السفليه بواسطه قطن الاذن او الاسفنجنه المدببه .... عشان تتأكدين تماما ان مستحيل يسيح الكحل من عينج ويثبت لساعات طويله وفوق هذا كله عشان توسع عينج ويكون لون السواد بارز .

اعرف ان النتيجه روعه بس لا تنسوني بالدعاء الطيب انتظروا جديدي يا الغاليات .

اختكم :26:
dream4abudhabi