وحارت عبرتي من ياسي

السلام عليكم ....
شخباركم حبيباتي والله اشتقت لكم من بعد طول الغياب
بلا ما اطول عليكم انا فقلبي هم كبير عجزت اتحمله بروحي وقلت يمكن كلامكم يريحني ويشد من ازري

انا عمري 24 كنت احلم باالاستقرار والسعاده حالي حال كل البنات يعني بيت وزوج طيب وحنون واطفال بدت معاناتي من يوم عمري 18 لان اهلي افرضوا علي ولد عمي وانا ماابيه لاسباب كثيرة بس من كثرة الضغوط من اهلي ومن خوفي وافقت وانا ابكي فداخلي والمشكله هو كان يبيني ومتمسك فيني لانه يحبني بس للاسف الشعور ماكان متبادل بينا
مرت الايام والناس كلها درت اننا لبعض وفجاة وبدون سابق انذار اسمع انه خطب بنت عمي واقرب رفيجاتي وملك عليها وحددوا العرس بعد وش تتخيلون موقفي وانا مو لاقيه سبب حق اللي سواه بكيت حره وسلمت امري لله وتحسبتهم عند ربي هو وابه اللي هو عمي وامه اللي كانت هي السبب بكل شي تخيلوا كانت مفكرة تربطني فيه وفجاة يتركني وياخذ غيري علشان تكسرني والله اني طول عمري احترمها واعزها وماني لاقيه سبب حق اللي سوته فيني
واكثر شي كان يالمني سؤال الناس من حولي متى عرسج؟؟؟
ولما كنت اجاوب مافي نصيب وقلبي يتقطع الم مو حسرة علية لا والله لانه مايسوى بس علشان الم اللي بينا وهو ولد عمي وخطيبته بنت عمي :44:

ولا انتهت المعاناة الا وتقدم لي شاب من خيرة شباب قرايبي مهندس وخلوق ورفيج اخوي يعرفه ويمدحه ماتتخيلون فرحتي فية وافقت وتم كل شي وقالوا بكرى الملكه وكنت منتظرة على احر من الجمر وجا ثاني اليوم وانا في قمة سعادتي لاني قلت ان ربي فرجها علي وداوى جرحي من اهلي وقلت ان هذا يوم سعادتي ما دريت انه بيكون اسوء يوم في حياتي اجتمعوا اهلي واخواني وعمامي ينتظرونهم بس الصمه كانت بعد طول انتظار اتصلوا تلفون اعتذروا ولا عاد ارجعوا حسيت الجرح تجدد وهو ماكان برى للحين بكيت بقهر والم على نفسي وانطويت على نفسي كنت اضحك قدام غيري وانا ابكي فداخلي من حر مافيني بس علشان امي المريضه مثلت ان الامر عادي باالنسبه لي

بعد سنه بعد مااندمل جرحي ونسيت الماضي تقدم لي شاب من السعوديه الكل يمدح فاخلاقه استخرت ولا حسيت بشي يعني شعور مبهم بعد اكر من مرة استخاره بس قررت اني ما اوافق لاني ماابيه بس المشكله ان ابوي كان مصر عليهم لان ابوه رفيج عمرة ولايبي يخسره وامي وخواتي كلهم اضغطوا علي وعيروني بولد عمي يعني داسوا على جرحي بدون احساس منهم:44:

وتميت اصرخ ماابيه لين ماتم كل شي وملكت ولقيت نفسي اجهز حق عرسي وانا ماابيه وابكي وفعلا تزوجت من هاالانسان وارتبطت فيه بس بدون مايكون فقلبي اي احساس ولا مشاعر والله حتى فيوم عرسي ماحسيت باالفرحه ولا حتى بعد زواجي والحين لي تسع شهور ولا حاسه براحه ولاسعادة لاني بعيدة عن اهلي اشتاق حق امي ولا القاها واشتاق حق تراب وهوا الكويت ولا اشوفه المصيبه الاكبر ان زوجي امه في قمة الكذب والله موقصدي اهينها بس هي جذي فعلا كانت تقول يوم اخطبتني ان راتبه 10 الاف وطلع 5 وعليه ديون مو قادر يوفر لي اي متطلب احلم فيه

فكرت باالطلاق بس خفت اني اخسر الي في بطني وياخذونه مني والله لدرجة اني يوم عرفت اني حامل مافرحت لاني خفت من الجاي :icon33:

اسفه اذا اطلت عليكم بس هاذي مشكلتي وكل همي بنتظر عذب الكلام منكم اللي يدري خاطري ويواسيني فغربتي

استودعكم الله