أنا ابي افضفض لكم اليوم لاني حاسة انكم اخوة لي ...
حصل اليوم موقف لي وانا بالجامعة وهو انني كنت جالسة على
مقعدي بين صديقاتي اتبادل معهن الحديث فجاءت واحدة من
المجموعة التي اجلس معهن وصافحت البنات الي معي الا أنا!!
وقامت تسأل البنات عن احوالهم وكيف سووا الا أنا !! مرة
مطنشتني ولا كأنني معهم في الشلة وانا لااعرف سبب تجاهلها
لي أو وش سويت لها .. فقط أتذكر أن بداية تعرفي عليهم حصلت
مشادة كلامية بيني وبينها ورحت أنا اعتذر لها وطبعا توسع صدرها
ليش ؟؟ علشان أنا جيتها واعتذرت منها...لدرجة مرة نسولف مع بعض طبعا نسولف في الطبخ قالت لي تعرفين تطبخين
قلت يعني وتكلمنا عن القهوة وطريقة سواتها قلت لها مرة سويت لاهلي القهوة اعجبتهم سواتي قالت لي وهي تضحك
بهستيرية كيف سويتيها قلي لي الطريقة بزعمها اني اكذب عليها.........وكل مافتحت معا موضوع يخصني واتكلم فيه
تلقونها تعلق عليه بسخرية وتضحك بعد...انا مهب مجنني الا هالضحك وشوله تضحك؟؟
ومرة كان عندنا طبق خيري في الجامعة راحوا البنات يتفرجون بقيت أنا وهي ووحدة من الصديقات الي مرة لها معزة
في قلبي راحت هذي البنت الي متأذية منها تتمشى وقعدت اسولف مع البنت الي احبها لمحتها من بعيد جايه ويوم
جلست عطت البنت الي معي عصير وشوكولاتة قالت تاخذين ترى ابزعل منك وانا طنشتني ولاذكرتني بشيء أنا والله
ماهمني الاكل بس الموقف هذا الي اثارني .. للمعلومية أنا كنت بداية دخولي للجامعة مع صديقات الله يذكرهم بالخير
ويوفقهم وكانت وحدة منهم صديقتي المقربة بس حدث لها ظروف وما كملت الدراسة والباقي انفصلت عنهم والله قعدت
فترة وانا ما معي احد من شدة تأثري بصديقتي الي انقطعت بس تعرفت ودخلت مع الشلة الي منهم البنت الي مأذيتني
مع العلم أن الباقي عسل ويحبوني واحبهم ولقد صار شيء مني يكدرهم ولايكدرني الله لايغير علينا ..
وكثير قالوا لي أنها غيرانه منك لانك دخلتي عليهم فجأة وصار كلهم يحبونك بس أنا مادخل مزاجي هذا الاستنتاج ....
وامي يوم اشتكي لها تقول اسفهيها ولاتكلمينها اذا هي ماتكلمت معك بس سلمي عليها ترا السلام لله...
اخواتي وش رأيكم في هذي البنت ؟؟ وش اسوي معها؟؟
لاتقولون اروح واشوف وش عندها لانها في ذيك الساعة تبي تحس بالانتصار واني أنا متضررة ومنقهرة من حقرانها لي
وانا متأكدة ما سويت لها شيء والله يعلم ذلك....
صدقوني وانا اكتبها دمعت عيني من الموقف الي حصل اليوم وكل المواقف الي حصلت ...
فأرجوكم جاوبوا على اسئلتي ولا تدخلون وتقرون ثم تطلعون ابي خلاصة تجاربكم فأنا مازلت في أول الطريق....
.
طنشيها بتنقهر
وسلمي عليها واخذي الاجر
وعامليها بأصلك وطيبك ولا عليك من معاملتها لك ..
ولا تبينين لها انك مقهوره من تصرفاتها ابد