مدام وائل @mdam_oayl
محررة برونزية
ورق العنب بطريقتى...ذلوقى واحكمى انتى!!!
النهاردة جاية اقولكم وق العنب على طريقتى وبأذن الله هتدمنوه
وبس عايزة منك عدوة صادقة بظهر الغيب
يالا نجى للمقادير:
مقادير1--- (بصلة مفرومة ناعم
طماطم مفرومة أو كوب عصير طماطم
2م ك زيت نباتى)
مقادير2--- (2 كوب أرز مصرى
(حزمة بقدونس+حزمة كسبرة+حزمة شبت) مقطعين صغير مش فرم
معلقة كبيرة صلصلة أو معجون طماطم
بصلة كبيره مقطعه صغير
1فلفل اخضر رومى مقطع صغير
2 فص ثوم مفروم ناعم جدا
عصير نصف ليمونة
بهارات مشكلة مطحونة (كمون+فلفل+كسبرة ناشفة +شطة +بابريكا+م ص بهارات لحمة)
2 م ك زيت نباتى
مـــلح)
مقادير3---(بطاطس شرائح
بصلة مقعة شرائح
طاطم شرائح)
مقادير4--- (كوب مرقة يفضل تكون بط لو مفيش يبقى لحم عادى او دجاج
معلقة صلصة طماطم
فص ثوم مفروم
ملعقة صغيرة نعناع جاف)
السر هنا بقى ---- (3 م ك سمن بلدى أو زبد)
وطبعا اهم حاجة ورق العنب
ههههههههههههههه
امال احنا بنعمل اية اصلا!!!!
معلهش المقادير شكلها كثير
بس سهلة والله
نبدأ بسم الله
نضع الزيت على النار ونضيف البصلة المفرومة حتى تصفر ونضيف عليها الطماطم ونتركها تتسبك
وطبعا لو عندنا تسبيكة أو كشنة جاهزة اكيد اسهل واسرع
المهم
نجيب طبق غويط ونضيف فية الارز المصرى بعد غسلة وتصفيتة ونضيف علية المقادير رقم 2 كلها
ثم نضيف عليها الكشنة السابق بس تكون باردة ونخلط جيدا
نحضر حلة ونرص فيها شرائح البصل والبطاطس والطماطم بحيث نغطى القعر تماما
يكون طبعا ورق العنب جاهز سواء بوضعه فى الماء المغلى 3 دقائق
أو يكون جاهز
نبدأ نلف الورق ونحشية بالحشوة السابقة ونرصة فى الحلة بطريقة دائرية ولا نترك مسافات كبيرة بينه وبين بعضة
لحد ما ننتهى منه كلة
نغطى على وجهه بورقة او رقتين من ورق العنب لية؟؟؟؟؟؟؟؟؟؟؟؟؟؟؟؟
علشان المحشى ميسودش (يعنى يبقى لونة غامق)
نضع الحلة على النار تدفى شوية
ونضغط علية بحاجة ثقلية طبق استيل مثلا
وفى حلة اخرى نجهز المرقة تكون بتغلى ونضيف عليها الصلصة والثوم والنعناع الجاف بحيث تغمر فوق المحشى ب2 سم تقريبا
اولا ما تغلى المرقة مع المحشى نهدى النار عليها خالص كأنها شمعه ونتركها على النار من ساعه ونصف الى ساعتين
اما امثالى المستعجلين دائما فممكن يترص بنفس الطريقة ويوضع فى حلة الضغط لمدة 25 دقيقة بالضبط
والطريقة فى حلة الضغط بعد الصفارة نوطى الغاز لفوق هادى لمدة 25 دقيقة
السر بقى
بقى لما ينتهى وقت السوا نجيب طاسة ونضع فيها السمن البلدى او الزبد ونتركة حتى تطلع الريحة بالمصرى (نقدحه)
ونشيل الورق اللى مغطيين بيه على المحشى ونصب على المحشى السمن المقدوح ونغطى علية تانى طبعا النار تكون مقفولة ونتركه بس 5 دقائق ويقلب فى طبق التقديم
انا باكله سخن بس برضو بيبقى حلو وهو بارد
بالهنا والشفا
ودوقوا احلى ورق عنب
جربوا وردولى
42
3K
يلزم عليك تسجيل الدخول أولًا لكتابة تعليق.
ربنا يكرمكم
معلهش على الصور بس الكاميرا عطلانة
قلت بلاش احمكم كمان من الريحة
بس جربوا بأذن الله الصور قريبا
معلهش على الصور بس الكاميرا عطلانة
قلت بلاش احمكم كمان من الريحة
بس جربوا بأذن الله الصور قريبا
الصفحة الأخيرة
شكله لذيذه
وننتظر منك المزيد