وش رايكم بتصرف صديقتي

السلام عليكم ..
صلووو عالحبيب ..
بقولكم سالفتي اللي مضيقة صدري حييييل
وش رايكم انا الغلطانة او لا !
صديقة لي لنا خمس سنوات مع بعض عالحلوة والمره انا عمري 24 وهي اصغر مني بسنة
صداقتنا مو في الدوام فقط .. لا كنا نطلع سوا ومع الاهل وفي انسجام متبادل
تزوجت اختي من اربع سنوات وظروف زواجها سريعة وعرس مختصرررر جدا
مو هنا المشكلة
انا بعد زواج اختي انخطبت كذا مره ولا صار نصيب او يصير بس كلام .. ف ما اجيب سيرة لأحد عن الخطبة لين تملكت
تملكت وبنفس الليلة خبرت صديقاتي الكل فرح لي وهي أولهم
نضحك ونمزح كثير وعلاقتي ماتغيرت بالجميع الحمدلله حتى بعد زواجي
بعد زواجي بسنة تقريبا سمعت ان واحد من جماعتنا تملك على اخت صديقتي هذي
واروح من الفرحة طيراااان وابارك لها من كل قلبي
تفاجأت بردة فعلها !! هجمت علي بكل شراسة حتى ماردت على تبريكاتي
تقول من علمك وشلون دريتي انتي ماعلمتينا بزواج اختك الا قبل عرسه بأسبوعين وانتي كنتي تنخطبين وانا عارفه بس ماتقولين لي<مع اني شارحه له ظروف زواج اختي وهي عارفه هالشي .. استغربت وانصددددمت بكلامها انه كل هالاربع سنوات شاااايله بقلبها علي بسبب زواج اختي ! وعشاني بحسن نية جيت ابارك قلبت علي!
اتصلت عليها فورا واعتذرت منها ورجعنا سمن على عسل
بعد زواج اختها اتغيرت حيييييل علي 
بدأت تجرحني بالكلام وتتجاهلني 
حسيت بأنها ماتبي قربي .. بكل هدوء انسحبت وجلست مع شلة ثانية طايرين فيني وانا بعد .. نسوني اياها واستانست معاهم
صار مره ترسل لي عتاب
تقولي وينك ماتجلسين معاي مثل اول .. قلت احس بقلبك شي علي قالت لا
بعد فترة نتكلم عن الحمل وكذا 
قالت اختي تبي تحمل وزوجها بعد يبي الحمل وضايق صدرها .. قلت لسا بدري الله يرزقها .. سكتنا عن السالفة الا وتجي تسألني ماحملتي ؟؟
قلت ماكتب الله للحين .. واكيد راح اقولك عشان تدلعوني <امزح معاها
بعد 6 اشهر ارسلت لي تبشرني ان اختها جابت ولد 
باركت لها وفرحت من جد
لكن استغربت يوم تقول ان اختها تبي الحمل كانت بالشهر الثالث !! يعني بس تبي تشوف عني او ايش !!!!
بعد فترة .. ارسلت لها عتاب 
عن موضوع اختي واختها
وان مالنا دخل فيهم حنا صديقات وكذا
تفاجأت بأنها ترسل لي كلام جارح وبلكتني 
طبعا انا قلت يالله الخيرة 
ضاق صدري بالبداية وزعلت 
قبل كم يوم وحدة من البنات تقولي ان صديقتي هذي تبي تتزوج قريب
فهمت من حركتها انها تبي تقطع بي قبل زواجها .. حركة قديمة وغبية طيب انا متزوجة قبلك ماسويت هالحركة معك !




للحين بس افكر بالسالفة 
ضااااايق خلقي مره
مابي ارجع اكلمها ولاشي بس ابي انسى موضوعها
واحيانا احس اني انا الغلطانة بالسالفة كلها
وش رايكم تكفون خففوا عني