الأخت الصغرى @alakht_alsghr_1

عضوة فعالة

وش سالفتكم يا بنات ذبحكم الطفش – مقارنة بين الأمس و اليوم

السلام عليكم ورحمة الله وبركاته ..

حبيباتي اخواتي حريمات وبنوتات عالم حواء .. :27:

في البداية أحب اقولكم ان موضوعي هذا الهدف الأساسي منه التخفيف على اخواتي المتضايقات و المتغلقات و ابدا ً ما أقصد فيه التقليل من شأن مشاكلكم و ضيقة الخلق اللي تلف أرجائكم بين الفينة و الأخرى ..

لأني كثير أقرأ عن معاناة حبيباتي بنوتات عالم حواء اللي ما بعد صاروا مدامات خصوصا ً ..

المعاناة من الملل و الفراغ و الطفش وووو ... الخ

كل ما قريت الفراغ اللي انتو فيه تذكرت نفسي قبل الزواج وكيف كنت أعاني مثلكم ولكن فيه فرق كبييير...

أنا و اعوذ بالله من كلمة أنا اعتبر نفسي من آخر جيل من أجيال العصر الحجري .. يعني أيام عزوبيتي ما فيها انترنت و لا قنوات و لا جوالات و لا طلعات مع صديقات ..

حتى الأسواق ما اعرف الا حلة القصمان وسويقة و اذا كشخت رحت المتنبي .. و آخر شي ايام تجهيز عرسي اكتشفت مجمع الموسى و المجد .. :)

طيب بتقولون هذي كم عمرها ؟؟ أكيد من الاربعين وفيها ؟؟

لأ ..أنا أصغررر .. أنا بوقتي كان فيه جوالات بس كانت توها طالعة و يادوب اخوي الكبير عنده واحد ابو عشرة الاف .. و كان موضوع الجوال زي موضوع سواقة السيارة بالنسبة للحرمة الحين ؟؟
كان الانترنت موجود بس كانت سمعته زفت و كنت اسمع فيه بس من بعض بنات الجامعة ..
طبعا ً الدش مخترعينه من زمان بس سمعته أشين وأشين و كان ما يرتفع الا بسطوح الدشير الله يعافيهم ولا يبلانا !

و أترك لكم تقدير من كم سنة الكلام هذا ...؟

المهم .. في ظل الظروف هذي كيف ممكن اقضي وقتي ؟؟ بالبلاك بيري و لا بالمسن و لا مسجات لسديقاتي ؟؟ :44:

من سوء حظي اني اصغر اخواتي ( عشان كذا معرفي الأخت الصغرى ) وخواتي كلهم متزوجين من لمن كنت في الابتدائي .. و ماما الله يحفظها كانت من جيل بعيييييد عني ..
كنت من جد أطفش بقوووة .. حتى مجلات ممنوع .. و يالله تجرأت و جبت مجلة الجميلة ذات مرة من صديقاتي و أنا في الجامعة .. لإني ما أحب اسوي شي غلط .. أو بالأصح لو سويت شي غلط راح يكسر راسي :arb:

كنت أسمع من بعض بنات الجامعة طلعات للمطاعم وكذا .. يووووه كانت احلام بالنسبة لي ..
لأنو ما في مولات و اسواق للتمشية زي الحين حدهم مطعم ؟؟

بصراحة كنت أحيانا ً أعيش نفسي بخيال .. اتذكر لمن يكون عندي اختبار كنت اتخيل ان خطيبي الوهمي بيجي يمرني الساعة 8 مثلا ً نروح لمطعم ويالله بسرعة اخلص من المادة قبل تجي الساعة 8 .. خخخخخخخخخ العب على روحي ..

بس و لله الحمد كنت أحاول اني ما أعيش بتعاسة .. ألهي نفسي بأي شي ... مثلا ً ارقى للسطح أحاور القمر و النجووم <<< أم الرومانسية !
أرسم لوحات أكتب مذكرات ويوميات .. كنت أفرغ فيها كل شي و أنواع الحش بحريم اخواني و أي أحد يقهرني ..

كنت أكتب بالليلة الوحدة عشر صفحات تقريبا ً .. <<< سويت مجلدات

وطبعا ً .. كان حرااام علي أني أبين اني طفشانة .. أولا ً ما ابي اضيق صدر امي .. ثانيا ً عشان ما يسيئون الظن بي ويقولون ميتة على العرس .. وهذي التهمة بالذات كنت أكرهها . لإنهم يفهمونها غلط×غلط

لإنو مرة من المرات .. ما كنت صغيرة كنت بالجامعة و انخطبت وحدة من قريباتي على واحد من قرايبي و كانت قصتهم شوي رومانسية .. غرت بصراحة و تمنيت أحد يحبني و يجي يخطبني و يموت فيني وووو

و بالمصادفة كانت وحدة من خواتي نفاس عندنا .. وقمت ببراءة سولفت لها و أخبرتها عن مكنون صدري .. يوووووووه صارت سالفة ..!! تخيلوا .. اختي قالت لأمي و امي سوتها قضية حتى اني سمعت امي من وراء الباب تحاكي وحدة من خواتي الكبار وتقول وش اسوي بهالبنت مشتبة على العرس ؟؟؟؟ انا انصدمت و رحت ابكي بغرفتي .. و زدت الطين بلة .. جت امي تحسبني ابكي ابي أعرس ؟؟؟خخخخخخخخخخخ ... و تهاوشني لا تشتبين على العرس ترى تعنسين ... وااااااااع تمنيت أموت ذيك الساعة من القهر ...افهموني ما أبي عرس زي ما يجي في بالكم .. بس أبي أحد يهتم فيني عاطفيا ً و يعطيني وجه !!

كنت أتمنى أطلع مع صديقاتي .. ومرة من المرات باض الديك خخخخخخخخخ سمحت لي أمي أواعدهم .... وووين ؟؟؟؟ في ملاهي الخيمة ؟؟؟ هههههههههه و أروح أجرجر اميمتي عسى ما يخليني و تدور معي أنا وصديقاتي .. ؟؟!!
حسيت اني مالي داعي بقوووة !

المهم .. مشت الأيام ..و تزوجت الحمد لله و اكتشفت ان الزواج موب اختراع لنفض الطفش .. هو في أفضل حالاته استمرار للحياة .. و تبديل للهموم اذا ما كانت أكثر بعد الزواج ! :angry:
بس بصراحة .. الحمد لله الحين أحس الوضع أفضل بكثير .. مو لإني تزوجت .. لكن التقنية هي اللي لها دور كبير بنفض الطفش .. يعني أبيكم بس تستشعرون هالنعمة يا بنوتات حواء ..

و أقول آه يالدنيا الحين بنتي بثالث ابتدائي الله يصلحها و ماسنجرها مليان صديقات و قرايب و ايميلات و فلة و قنوات اطفال ما تنعد و لازم طلعتين بالأسبوع تمشية و زيارات ووووو صاجتني تبي جوال ... والمشكلة تستمر >>>>>> كل شوي ناطة بحلقي هي و اختها ... ماما طفشانييييين ؟؟؟؟؟؟؟؟؟؟؟؟؟؟

الله يصلح الحال و يوفق الجميع و آسفة على الإطالة .. و أتمنى موضوعي خفيف ظريف على قلوبكم ..

يلزم عليك تسجيل الدخول أولًا لكتابة تعليق.

تسجيل دخول

زينة الغيد • 14 سنة

خخخخـ ياحليلك
بس كانت الحياة حلو قبل
بالتوفيق..

الالماسة السمرا • 14 سنة

ماشاء الله تبارك الله

قولي امين الله يسخر لك ويسعدك ويفرحك بالولد الصالح ويخليلك اميمتك

ويستر بنات المسلمين ويرزقهن بالرجال الصالحين

صلصة الصويا • 14 سنة

تفته • 14 سنة

ههههههه ياحبيلك
اعجبني موضوعك بقووووه,,
حسيتك تتكلمين عني وعن حياتي اول<<مع شوي اختلاف
بس عاد تصدقين مع انها كانت حياة ممله الا اني احن لها الحين
الله يخليلك بناتك ويسخر لك زوجك يارب

00زهور الريف00 • 14 سنة

هههههههه انا اقول عمرك 30 سنه او31 خخخخ خليت الموضوع كله وقعدت احسب عمرك
امزح بس والله كانك تتكلمين عني نفس الحياه ونفس القصه مع بعض الاختلافات بس من جد موضوعك حلوو