وقاحة زوجي !!!

السلام عليكم
انا متزوجة من سنين طووويلة وزوجي فيه مشاكل قوية بالانجاب اخرت حملي والحمدلله ربي اكرمني بطفل واحد علاقتي انا زوجي متذبذبة بس الغالب فيها الأشياء الحلوه لكن بعد ولادتي صارت العلاقة تسوء اكثر فأكثر
زوجي رافض اني اكرر علاج عشان احمل يبي لين يصير ولدنا عمره ٤ سنين لان امه بس تزن عليه ماهو زين العيال ورا بعض وخلو مسافه ثلاث سنين وفوق والعيال متعبين بهالعمر شف اختك تعبت منهم وزوجها مجبرها وهي تكذب بنتها ماتاخذ موانع حمل اصلا ومايمدي بزرها يكمل سنة الا الثاني يرفس ببطنها وتنبسط هي وامها ويسوون جمعه بينهم لها كل ماحملت وحالات واتس كلها حمد وشكر وصور مواليد او بالونات على جنس البيبي المفروض كان الاولى تنصح بنتها او تنصح نفسها هي عيالها تسعه على بعض وانا فوق وضعنا المزري بالعقم تعبي راس زوجي على التباعد وحنا كبار بالعمر والعلاجات مو مضمونة كلامها ماراح ولا جا لكن مارفع ضغطي الا ان زوجي مصدقها ومقتنع بكلامها واللي يقهر بس يهاوش رافض ويقول مالي دخل فيهم ولاني مسؤول لو جبتيهم مع ان مايرضع ولا يحفض ولا ينوم حده يمسكه قدام التلفزيون بس وقت ما اطبخ عشانا وكل شوي جايه اشيك واشوف الولد حايس الدنيا وهو على الجوال !! حسبي الله ونعم الوكيل
الى هنا عادي لكن زوجي اسلوبه صار سي معي بقوووة من بعد ماخلفت وهو يعصب بسرعه وينافخ ويتشكى على اتفه الاسباب والله انه طاقة سلبية بالبيت
تخيلو اذا النت ما اشتغل معاه يجلس يسب ويتحلطم ويتأفف وقالب وجهه اليوم كله وينكد علي
اليوم تهاوش معي على سبب تافهه عشان حشوة الرز بطاطسها مانضج عدل !!!
صار ينافخ ويصارخ قدام الولد لين اضطريت ابلعها ويوم حطيت العشا قلت له عدل اسلوبك معي قام قلب الكلام ضدي انتي اللي عدلي اسلوبك وانتي فيك وفيك ويسب قلت الولد موجود ومن القهر جيت بعطيه الملعقة ودفيتها بقوه وجن جنونه قام يضرب فيها باقوى ماعنده بالصحن شلت الولد عشان مايحس ووديته لغرفة ثانية وجلس يقول طبخك بالفرن بشع وماهو زين وانا اتحمل قلت ليه ماقلت لي وانت لك شهر تاكل بهالطريقة وتمسح يدك بالجدار ليه تجامل وانفجر بوجهي قال لانك تقليين وجهك اذا طلبت منك تقلين الاكل انا بفهم يا بنات مو اللي يسوي دايت ضروري اكله يكون قليل زيته واغلبه بالفرن هو يسوي دايت وانا بعد لكن يبي الدنيا كلها زيت والله انه يتغافلني لا طلعت ايدامي يذوب الا هو جاي ومطلع له ايدام ثاني ويقليه بالزيت قبل ما اطبخ عشان ماياكل معاي والا المطبخ كله دخان ابيييض والمقلا سوووودا من كثر الزيت اللي يحطه والارضيه كلها زيت تزلق والله كم مره بغيت اطيح خصوصا وانا شايلة شي قزاز او شايلة ولدي واذا نبهته يعدل من طريقة طبخه اذا هو حاب هالاجوا انه يطبخ يصارخ ويقلب الطاولة يجلس ينتقدني
وطبعا قبل اسبوع متهاوشين بسبب اهله وهو ضعيف شخصية مايقدر يرفض لهم طلب وكعادته قلب الطاولة علي وجلس يسب باهلي وانا والله الشاهد اني اروح لاهلي واقول لهم لا تسوون معاه كذا لا تقولون كذا
انا مو رافع ضغطي الا انه متمااادي علي بقوة اسلوبه سيء وصاير يدور الزلة علي وش الحل معاه تكفون الطلاق صاير ببالي واجدد انا ضحيت بامومتي وتعبت معاه ادور علاجات واشجعه ووقفت معاه وكذا سوا فيني مافي تقدير حتى ولده مو مره معاه اللي ينجبون بسهوله وطبيعي فازين بعيالهم أكثر منه وفوقها ساعدته ماديا بأشياء كثيرة لكن فعلا مايبان فيه
وش الحل وش الحل ارجوكم