ولادة في الجامعة

بخبركم قصتي في اول طفل لي كنت في جامعه العين وداخله السكن الجامعي
المهم لانه اول حمل كنت ما اعرف شو هو الطلق وكانت عندنا فترت امتحانات
النص ..

كان ذاك اليوم عندي حصتين وحده من الساعه 8 الين 10 والثانيه الساعه 10 الين 11

الصبح حسيت بوجع يطلع في ظهري وينزل قلت لربيعتي يمكن في ولادة قال يالله بس هبل

بعدني اليوم اريد امشيك بالليل كانت كل يوم تنزلني تمشيني عشان تتسهل على الولادة

الي يضحك انه موعد ولادتي كان في اليوم الي بعده بس انا من كثر انشغالي بالامتحانات ما جا على

بالي ..

الحبيبه ما قصرت وراحت الامتحان **اقصد حضرتي ** وانا في الامتحان احس بالوجع يزيد يطلع وينزل في ظهري اقول يالله هذا اخر امتحان خليني اخلصه وافتك بعد ما خلصت الامتحان ما حسيت بوجع قلت خليني احضر الكلاس الي بعده ** اونه مجتهده** قلت عقل ما كأن فيني ولادة كل هذا مفكره
وجع؟!!

المهم في الكلاس تميت احس بالوجع يزيد وينزل وخلاص مش كاقدره اتحمل ولا استاذنت تميت لين ما خلص ..

طلعت من الكلاس انا وربيعتي ورحنا السكن وكنت بموت جوع من الصبح ما كليت رحنا مطعم السكن

وكانوا مسوين دجاج كنا نسمية بالسكن دجاج ملحف .. اول ما جيت احط اللقمه في حلقي حسيت بشي انفتح قلت لربعتي احس بشي انفتح البنت وحليلها اخترعت قال شو الي انفتح قلت ما اعرف المهم اكرمكم الله رحت حمام المطعم ما لقيت شي اول ما بغيت اطلع الا الماي يطيح كله :eek: يا فضيحتي شو اسوي الحين كنا بطني مره منتفخ وقت الحمل ماي بشكل مو طبيعي يوم نزل الماي تقولين حنفيه
طيب شو اسوي يا ربي فتحت الباب ناديت بنات واقفات في الحمام قلت لهم انا حامل فيني ولادة نادوا الممرضه ..

الهبل الي فيني كنت فرحانه وخايفه وارتجف اريد افتحك من تعب الحمل بس مو عارفه الي بيجيني بعده

المهم .. جت الممرضه بدال ما تهديني بروحها خايفه تمت تقول يالله بوديك المستشفى كان مستشفى توام الي اراجع فيه ورا السكن مره يعني 5 دقايق .. اتصلت على اهلي وقلت لهم يالله تعالوا بولد

الممرضه تقول لي يالله بوديك اقول لأ .. اونه قالت امي محد يروح المستشفى على طول :22: .. اول ما يت امي قالت يالله على المستشفى قلت ليش قالت خلاص الماي طاح ولادة

يوم دخلت وبدأ الطلق الصدق تميت من الساعه 1 الين الساعه 9 بالليل وجبت بنت .. اول ما خلصت
وخيطوني قلت يالله جوعانه سووا لي اكل بموت من الصبح ما كليت ..

الي صار لي بعد الولادة غريب ثاني يوم بديت احس بوجع في مفاصل الحوض لدرجه اني صرت ما اقدر امشي وامي الله يكرمكم توديني الحمام وانا اذا حد حرك رجولي اموت من الصياح ويجي دكاتره من كل تخصص ما عرفوا شو الي صار فيني وتميت على هال الحال في المستشفى 5 ايام الين ما قالوا بنجرب نعطيك مضاد حيوي ويوم عطوني بدا الالم يخف وطلعت بعد 5 ايام زياده يعني تميت 10 ايام

وبعد ال10 رديت الجامعه لانهم ما طاعوا يعطوني اجازة منها بيسوا لي حرمان وتميت اروح الجامعه وانا نفاس ورجولي من الوجع اسحبها بس الحمد لله تخرجت ذاك الكورس بامتياز وتوته توته خلصت الحدوته