ولادتــي الميسره وتجربتي في احلا مستشفى

ولله الحمد والشكر طلع ولدي سليم معافا مافيه سكر ولا انتفاخ ولاشيء مجرد صفار بسيط ..
بالنسبه لي بعد العمليه الحمد لله ماتعبت كثير وربي بدون مبالغه يابنات اول ماحس بالم يجبوا لي مسكن ماشاء الله سحر .. موب مسكن قنبله ماشاء الله ماتعبت كثير ولاجاني كحه ولابرد ولله الحمد
القصطره طبعا ركبوها لي بعد ماحطولي البنج يعني ماحسيت فيها وفكوها لي باول يوم بعد العمليه ب 8 ساعات الم بسيط لاني جسمي باقي فيه بقايا بنج يعني ماوجعني مره ويد الممرضه خفيفه ماشاء الله
في نفس اليوم شربت مويه وشوربه واليوم الثاني اكلة فطور وغداء وعشاء طبعا انا اختارها من القائمه حقتهم قلتلكم كنهم فندق خخخخخخخخخخ
وعندي صبابه خاصه في الغرفه اذا جوا عندي زوار تجي تقدم لهم القهوه من المستفى نفسه وتمر
وطبعا الثلاجه مليانه اربع وعشرين ساعه عصيرات وحلويات .. وزوجي له سرير خاص ولاب توب وانتر نت واكل رايح جاي يعني مسنتر ماشاء الله عليه مااخذها الاهو ههههههههههه
طبعا انا ولدة الساعه 11 الظهر واهلي جو عندي الساعه2 الظهر جابوا لي ولدي واخواني جوا طبعا فشلونا كنهم ماشافوا مستشفى الي متسدح في الحمام والي حاط راسه في حوض السمك واللي نام في الثلاجه من كثر مابلع
حتى ماما انهبلة يوم شافت الدكاتره داخلين طالعين لانه كل 4 ساعات يجي عندي اخصائي يشوفني ويطمن على حالتي اخصائــــي موب اي كلام ...
اخويه الكبيره يقولي لايكون المستشفى غلطان يحسبك بنت وزير ولا امير قلتله لا هو كذا مستشفى بس نظام فندقي يعني كلهم متدربين ودارسين هالاسلوب هذا شغلهم
بصراحه شرفوني قدام زواري من اسلوبهم واستضافتهم .. هذا كوم والشاشه الي على الطفل 24 ساعه تهبل كبيره مره مره .. وتلفزيون ثاني فيه كل القنواة .. زوجي يقول بيرجع يسكن عندهم يومين هههههههههههههههههههههههههههههههههه

خلاص خلصت .. يمه ياكثر كلامي
قولوا ماشاء الله يابنات
أكتشفت بعد تجربت ولادتي ان ربي رازقني بنعم ماكنت احس فيها وغيري يتمناها
انعم عليه بالصحه والعافيه وبالزوج الطيب الصالح الله لايحرمني منه وقف معي في كل لحظة من يوم دخلة المستشفى الين الحين حس بتعبي والمي ولاقصر عليه باي شيء كان يساعدني اقوم من على السرير واانا ادخل الحمام وانتوا بكرامه .. وساعدني على المشي وفي كل شيء الله لايحرمني منه ويخليه لي ...,
ربي انعم عليه باحلا ولد في العالم ورزقني بولد ثاني صار اخ له في هالدنيا
ربي انعم عليه بأهلي الي هم عزوتي وقوتي بالحياة ..وباخواني واخواتي
سبحانك لااله الا انت اني كنت من الظالمين
سبحانك لااله الا انت اني كنت من الظالمين
سبحانك لااله الا انت اني كنت من الظالمين
يارب ياكريم انك تديم نعمك عليه وترزق كل وحده فيكم بالصحه والعافيه والزوج الطيب والذريه الصالحه ويحفظ لكم كل غالي وحبيب

ماشاء الله تبارك الله

الف مبروك والله يتمم عليك ويحفظلك هاالنعم

ولادتك حلوه ياريانه وتخلي الواحد يتفائل ماشاء الله تبارك الرحمن

ماشاء الله تبارك الله

الحمد لله على سلامتك

ومبروك ماجاك وان شاء الله يتربى بعزك

وبصراحه شكلك راعيه سواليف وتجننين يعني زيي انا احب السواليف ولما اسولف مااسكت ماشاء الله تبارك الله

الحمد لله على السلامة .
حسافة كان ودي اولد بالرياض بس عشان اروح للمستشفى .
بس انا مستغربة ليش ما طلبتي ولادة طبيعي بدون الم احسن لك من القيصري .
الله يعينك على الجرح .