ولدي يحرجني في المولات وفي المناسبات,يرمي نفسه على الأرض ويفصخ الجزمة والشراب !

ولدي الله يهديه عمره 3سنوات ونص وهو أول ولد لي الله يحفظه من كل سوء..
هو ولد حبوب لكن إذا عصب إختلف الولد تمامآ وأصبح الوضع معاه لا يطاق..
قبل إسبوع,رحنا مدينة الألعاب في مركز التحلية مع أهلي ولعبنا لمدة ساعة وخلاص تعبت..المهم
قلتله :هيا يا حبيبي خلصنا و إن شاءالله نجي تاني
إلا هو عصب و صرخ وقال لي روحي ما أبغاكي
قمت شلته بالقوة بس ما عورته وصار يضربني بس أنا متملكته ويسبني الله يصلحه ورحت قسم المطاعم ونزلته على الأرض إلا هو إترمى وفصخ جزمته و شرابه وانسدح على الأرض!!!
وحتى لمن أخرج عند صاحباتي..لمن يعصب يفصخ الجزمة والشراب

وهو متعلق فيا مررة لأني عمري ما تركته مع الشغالة
أنا (و أعوذ بالله من كلمة أنا) أنومه أحممه أدخله الحمام حتى في المناسبات الشغاله ما توديه,أنا بنفسي بس هي تمسكه وتنتبهله لمن أكون معزومة وأخذه معايا
أنا أسويله أكله وكل شي يخصه

بس تعلقه الزايد فيا صار يتعبني و أنا بأفكر أوديه حضانة عشان يتعرف على الأطفال بالرغم من إنه مو هاين عليا بس ما باليد حيلة!


أنا ولله الحمد مني من نوع الأمهات إلي تتساهل مع أولادها في كل شي حتى لو على حساب التربية..
ولا أنا من النوع الشديد العنيف المستبد إلي يضرب وكل شي عندي لا..
أنا ولله الحمد من النوع الوسط..الصح صح والغلط غلط والحمدلله مني من النوع إلي يسب

أنا ولله الحمد غرست فيه خصال ومباديئ طيبة ..منها

عاطفيآ..أنا مشبعة ولدي من هذا الجانب..معودته على الحب والعناق وحب المشاركة في الألعاب والطعام
ولمن يعطس يقول الحمدلله
ولمن أشتريله شي أو أسويله أكله يقولي شكرآ
ولمن يشوفني تعبانة يقولي أوديكي الدكتور
لمن أبوه يروح العمل, يجري عليه ويسلم عليه ويعانقه ويقوله مع السلامة
ولمن يخرج لوحده مع أبوه من يوم ما يرجع البيت يدور عليا ويقولي: هيف وصل ويبوسني ويعانقني الله يرضى عليه
لمن يشوف الأولاد يتضاربوا يقولي :ماما قوليلهم حبوا (يعني بشويش على بعض ولا يضربوا بعض)
و هو ولله الحمد طفل خدوم يحب يساعد الصغار والكبار,إلي يحتاج شي يجيبله هو من غير ما أحد يطلبه
وكله بفضل من الله تعالى
هو أول حفيد من طرف عائلتي,أنا أكبر أخواتي
لكن للأسف مع إختلاطه مع أولاد عمه و وبنات عماته إلي من نفس سنه الله يهديهم أتعلم السب و صار يسبني أنا وأبوه والكل لمن يعصب

الله يهديك يا ولدي وحبيبي هيف
يا ولد قلبي وروحي
الله يهديك ويحفظك من كل سوء وينشئك نشأة صالحة بإذن الله