ولد جارتي و الخادمـــــــــــــــــــــه

السلام عليكم ورحمة الله وبركاته


موضوعي مجرد فضفضة قلب محروق وطلب دعوه و تنبيه للي تنهج نهج جارتي الله يسامحها




أنا يا أخوات عندي جاره موظفه تطلع الصبح وتخلي عيالها 3 عند الخدامه الكبير 3 سنوات

و الصغار توأم عمرهم كم شهر

من فتره و أنا أسمع صوت صياح الأطفال الصبح لا طلعت أمهم و الخدامه تصارخ عليهم

بس ما كنت أعرف إي وحده من جاراتي هي لأن فيه ثلاث موظفات

ولما أنحر قلبي زوجي منعني أتدخل و قال هما أحرار كيفهم وبعد ما تأكدت إي وحده فيهم

ضليت أدور طريقه أنبهها فيها عن اللي يصير بعد ما تطلع بدون ما أزعل زوجي علي

وفي مره نفذ صبري أرسلت لها غرض مع بنتي و كتبت بورقه أني أبغى رقمها و أرسلته مع بنتي

دقيت عليها وسلمت و عزمتها عندي وجت لما جت عندي ما جابت عيالها ما شفتهم وفتحت السالفه معها

و الصدمه أنها قالت وش تبيني أسوي ولدي الكبير مقرف عيشتي أنا و أبوه وأكيد الخدامه بعد

تقرف منه خليها تصارخ وتضربه وتبرد قلبها أنا و أنا أمه ودي بعض الأحيان أموته كيف عاد هي لما

سمعت هالكلام منها جاني غثيان كيف أم قلبها متحجر على ولدها كذا طبعاً سكت وقلت الله لا ينزع من

قلوبنا الرحمه و سويت اللي علي ربي يحفظهم بحفظه

و أمس كنت بالمطبخ و الشبابيك اللي على مطبخي لباقي الشقق كلها مطابخ ودورة مياه

المهم سمعت الولد يصيح صياح يقطع القلب وشكله بالحمام صوت الماء يصب بقوه

و الخدامه صوتها واصل أخر الشارع تصارخ عليه ومن ضمن كلامها و اللي فهمت من لهجتها

أنها يا فلبينيه يا أندونيسيه تقول للولد (( أنتى مجنون ليش سوي كدا يا هيوان )) و الولد ميت صياح

زوجي كان يسمع معي اللي تسويه الخدامه وقلت له كلم أبوه حرام ما يصير كذا

وبعد صلاة العشاء مسك أبوه وقاله يمكن الأبو أعقل تدرون وش قال



قال ولدي معه متلازمة داون مهب صاحي مهبل فينا و عافسنا عفس بالبيت

يالله والله قلبي أحترق يا ناس مريض وعمره 3 سنوات ويتعامل هالمعامله وربي قلبي يتقطع عليه



ما أقول إلا الله لا ينزع الرحمه من قلوبنا و يشفي هالمسكين ويرفع عنه و يهدي أمه و أبوه ويحنن قلبهم

عليه و يكفيه شر هالخدامه

منزوعة الرحمه

و أقول لكل وحده موظفه أنتبهي لعيالك تراهم أمانه تسألين عنها يوم القيامه ومحاسبه على التفريط

فيها


و أدعوله لعل فيكم من لو أقسم على الله لأبره ..