وين بشارتي!!

سلااااااااااااااااااام
ياحلي بنات وحوامل حواء بهالدنيا!!
طبعا جايبتلكم بشارة بس ابي بشارتي!
وهي انكم تعلموني كيف اشيل شريط الحمل ؟؟وابي شريط حساب عمر الطفل..
لاني ولدت الحمد لله وجبت احلى كتكوتين بهالدنيا ماشاءالله..وعلى فكرة شملتكم بدعوه عامه ..خاصه اللي ردوا على موضوعي اللي قبل ..
ودي اقول اسامي عيالي بس فيه ناس هنا يقربولي ..اخاف اقول ويعرفوني ..وانا مابي احد يعرفني للخصوصيه وعشان ابربر هنا براحتي..
والله انكم خواتي وماخبي عنكم شي..
وماخذة راحتي معكم..
الموهم ولدت بتاريخ 16\3 \ميلادي
بمستشفى الحبيب
طبعا كنت رايحه لموعد بس الحمد لله قالوا ان احد الاجنه نبضه بدا ينخفض.. وعندك طلق ..وهو مايتحمل ..فولدوني قيصري بعد كل المحاولات اني اولد طبيعي بس ماصار فيه مجال,,
لكن الحمدلله يمكن خيرة ..
البنج كان كامل ..تصدقون كل اللي كان مخوفني القسطرة حقت البول!! الله يعزكم بس الحمدلله قلت لزوجي ابيهم يركبونها لي بعد التخدير ووافقو <<ابوك يالخوف
نجي للمستشفى انا كانت دكتورتي شازيا بس هس اخذ اجازة وحولوني لساجيلا او شاكيلا ناسية والله يمكن تذكرون لمى كتبت هنا موضوع محتارة وين اروح لاي دكتورة ..كملت على ساجيلا وهي اللي سوت لي العملية.. وربي لك الحمد تسهلت ..بصراحه تعامل راقي ماتشوفين الا الابتسامات والتبريكات ..ويتحمدون لك بالسلامه ..كل من دخل يتحمد لك بالسلامه ..الدكتور والمشرفات وحتى بعض السسترات وعاملات النظافه والاكل ..جدا محترمات تصبحك وتمسيك بابتسامه ويسلمن ويستأذنن قبل مايدخلن..
يجن من وقت لوقت يتطمنن عليك وحتى دكتور التخدير جدا محترم ..طبعا لمى دخل الغرفه يشرح لي كيف يكون التخدير كنت متغطيه ..بس قال لزوجي ماله داعي تتغطي لاني انا باخدرها وباكون معها بغرفه العمليات ..فشال زوجي عني الغطى .,وطول الوقت يابنات وربي ماطاحت عينه بعيني.. ومنزل عيونه تحت ويتكلم علي ويطمني وكنت مرتاحه واردد الاذكار عشان ارتاح وما اخاف.. وسألني كم سوال وبعدها تخدرت ..الممرضات كانوا جدا صبورات لمى حاولوا يودوني للحمام الله يعزكم كتن ابكي <<خايفه ينفتح الجرح
لكن شجعوني عالحركه بشويش.. وساعدوني باشياء كثيرة بصراحه تجربة حلوة ..
الخياطه كانت تحت الجلد يعني تجميليه بس فيه خط اسود يعني باين انه مكان عملية ..
وبس لكن لاتسألوني عن التكلفه لان زوجي هو اللي سدد الفواتير.. وكل ماسألته قال اهم شي طلعتي بالسلامه مالك دخل!!
بس يابنات احس اني مو مهتمه بنفاسي ..يوم اشرب حلبه واعشاب واتبع نظام ويوم اتركه ..لاني اتعب ودايم منسدحه مالي خلق اقوم اشرب او آكل شي ..واخاف آكل شي يأثر على العمليه ..
ولمى رحت لموعد وسألت الدكتورة قالتلي ممكن تفيد بعض الاعشاب بس ابعدي عن اكل كذا عشبه باليوم ووصفتلي كريم ومشد وقالت امشي ربع ساعه صبح ومساء عشان ينشد بطنك ..
وهذا نظامي البسيط
اقوم الصبح آكل سبع تمرات مع كوب حليب فيه ماش وزنجبيل وفلفل ابيض من كل شي نص ملعقه صغيرة ..
بعدها اقوم امشي شوي
الغدا عادي والعشا برضوا عادي
قبل انام اشرب حلبة وآكل طحينيه عشان يدر حليبي ..وامشي شوي ..
واكب من هالخلطات على جسمي واتروش كل يومين والبس بنطلون وشراب وانام وينتهي يومي على كذا شرايكم احس حوسه شوي ومافيه اهتمام بس شسوي اكثر من كذا مااقدر ادعولي اطلع من نفاسي من غير خراب ومن غير شر