يا أنا يا الاستراحه

السلام عليكم كيفكم اخواتي ؟؟

اخواتي انا لي 7 سنين متزوجه وابتليت بزوج اعوذ بالله قلبه متعلق باخوياه بشكل ماهو طبيعي
نظامه يداوم يرجع ينام يصحى على الاستراحه يجي اخر الليل للنوم يعني البيت للنوم

اذا كلف على نفسه طلعنا يوم الخميس وين ووين واغلبها مشاوير اشغال نقضي للبيت طبعا غير انها تكون في عز الظهر والشمس تفقع الراس كله علشان من 5 يمديه يروح للاستراحه وحتى اذا طلعنا على عجل كله علشان ينزلنا البيت ويلحق على الشله

سكت صبرت يمكن يتعدل من نفسه تكلمت بهدو تناقشت تهاوشت كل شيء مافي فايده

طبعا روحت على الاستراحه اثرت علينا ما اقدر اروح لاحد خلته مقصر في بيته مو فاضي يقضي البيت في خراباات الى الليل عجزان يجيب عامل ماعنده وقت ولو الاستراحه احتاجت تصليح هو اللي ينط ويجيب عامل لها

يعني لا اقدر اطلع لا اقدر اعزم مالي احد في الديره غير اهله لي قرايب لكن منحرجه اروح لهم لاني لازم اعزمهم

المهم تقفلت من مجاميعه
حتى مراجعات مستشفى مايراجع فيني عندي مشاكل ومرتين على مدار سنه اروح اعمل التحليل بعد حبة الخشم ولا ارجع اخذ النتيجه واتابع مايمديه مو فاضي :(

طبعا سق اني كتبت موضوع عن وعوده الكذابه لما اكتشفت انه يكلم وحده وكنت باروح وحلف انه يتغير تغير شهر ورجع كما كان

اذا تناقشت معه قال احمدي ربك غيرك مو لاقي العيشه اللي انتي فيها ,,واذا تكلمت قلت بنطلع وقلت احنا مانطلع قال اي جحود عيني عينك كفاره للعشير ويذكرني اننا طلعنا طلعه لمدة ساعه في عز الظهر قبل مدري كم اسبوع ((ماقلت شيء كثر الله خيره ))
عيالي يدرسون ولاعندي خدامه وطول اليوم مابين الشغل والمذاكره والتفريق بين الاطفال وعلى هالحال بدت تطق روحي لي شهر ماشفت الشارع ومحشوره في البيت ماعاد لي خلق حتى اذاكر لعيالي طنشتهم الاسبوع هذا قفلت معي :(
وبديت خلاص افكر اروح لاهلي ,,, واتكلم معهم بجد وان مافي رجعه الين يتعدل ((فاتو بحكم من اهلها )) والحياه معه بالنسبه لي صارت مستحيله لاني ما اقدر استمر كذا يا اعيش براحه يا انسحب من حياته اقلها اكسب اني اعيش قرب اهلي
طبعا كم مره تصير بينا مشاكل بس ماقد تتدخل احد ويحلف لي انه يتعدل مرتين اكتشف انه يكلم ويحلف انه يتغير ويعطيني وعود ويطلع في النهايه كلام
وقدد قال لي مره انا عارف انك مستحيل تستغنين عني
لذلك قررت اني اثبت له اني اقدر استغني عنه واعيش حياتي من غيره

طبعا انا ما افكر بالطلاق لكن لازم وقفه صارمه بوجهه ويعرف ان الحياه مسؤليه مش لعب

قبل كم يوم تناقشت معه طلع فيني عيوب الدنيا وانا اعترف فيها لكنها ليست الا رد فعل طبيعي لهالحياه لان كلها من قريب لاني خلاص وصلت لمرحله ماعاد اقدر اعطي ((فاقد الشيء لايعطيه )) ومثل مايقولون خربانه خربانه
وقال انتي كنت ماشيه زي الحلاوه ومافي احسن منك
واقول في نفسي ماشفت تقدير لما كنت ماشيه زي الحلاوه على قولتك نفس نظامك وركضك ورا اخوياك واهمالك لنا

صرت استحي من الناس من كثر ماهو مبلط في الاستراحه اخرها اخته تقولي كيف متحمله الله يعينك اذا هو يداوم ويجي ينام ويرح على طول ترا ماخربه الا الاستراحه

هل تؤيدوني اروح لاهلي واخليهم يوقفون بوجهه وهل ممكن اذا رجعت ترجع حيتنا طبيعيه اخاف يكون حااااقد علي ويضيق علي اكثر لعانه

وش رايكم؟؟؟؟ وهل اسبابي مقنعه ام لا ولو اي وحده منكم كانت في مكاني وش تسوي

دعواتكم قبل ردودكم