كيفكم يا حلوات ؟
هذا ثاني موضوع لي =) .. و حبيت يكون من تأليفي .. و مخيلتي .. صحيح اني ما احب أطبخ كثير بس احب الأكل و دايم أتخيل أشكال أكلات في راسي .. و طبخة اليوم من ضمن هالأشكال اللي كانت دايم تسبح في مخيلتي و طبقتها ع أرض الواقع بس لعيونكم .. أتمنى تعجبكم و تنال ع رضاكم .. و أقصد بمطبخي اللي بقراطيسه ( لأن تجاربي المطبخية محدودة جداً جداه و دايم أمي تهاوشني و تقول لي تسنعي مثل بنت عمك (يا حبي لها ست بيت من يوم انها بزر مو مثلي طاحت ضروسي و انا لسه اتميلح خخخخخ) )
و أحب أعتذر عن عدم وضوح الصور ، لأن كاميراة جوالي أحياناً تخوني و ما تصور زين ،، بس خادمتنا الله يجزاها خير أسعفتني بجوالها ع آخر صورتين ،، و أهم شيء إنها لحقت ع الشكل النهائي للطبخة و طلعت واضحة
و الحين ندخل في صلب الموضوع .. بسم الله:
أول شي نضفت 3 صدور دجاج و خططتها بالسكينة ( عشان تتشرب التتبيلة تمام )
تبلت الدجاج بملح و آجي و فلفل أسود و قرفة و كمون (يمكن الاستغناء عنه ، انا مدري ليش حطيته ) جوزة الطيب و أوريقانو و نعناع ناشف و بردقوش ناشف و خل و ليمون و بشر ليمون و زيت زيتون
ملاحظة: يستحب اضافة الريحان الناشف لأنه يعطي نكهة طيبة بس ما كان عندي ، و كمية البهارات تعتمد ع تفضيلاتك
هنا بعد ما أضفت كل المكونات و ما بقى لي غير جوزة الطيب اللي مرتزة ع راس الملعقة
خليت الدجاج يجلس في التتبيلة ساعتين و بعدين شويته (نص استوى) في الشواية الصغيرة مثل اللي نسوي فيها الساندوتشات و هذا شكله
بعدين قطعت حبة بصل متوسطة مكعبات و بشرت فص ثوم
و حمست البصل في شوي زيت و اضفت عليه الثوم
و بعدين اضفت له صدور الدجاج (و المرق (موية الدجاج) اللي بقت في الشواية) و اضفت لها مكعب ماجي
هديت النار عليه و غطيته و هذا شكله بعد ما استوى و امتزجت نكهته مع نكهة البصل و الثوم و الماجي. طفيت النار عليه
*****
نجي للصوص الأبيض
استخدمت شوي زبدة و زيت طبخ، و ملعقتين طعام مليانة دقيق أبيض، و ثلاثة ملاعق حليب بودرة مذوبة في كوب إلا ربع موية، و ملعقتين طعام مليانة قشطة، و ملعقتين طعام مليانة جبنة كاسات، و مكعب ماجي و شوي آجي و ملح و فلفل أسود، و ذرة . و هذي صورة بعض المكونات للي يحبون الصور ^-^ :
أول شي حمست الزبدة على نار عالية شوي و اضفت لها الزيت و خليتهم يفورون شوي بعدين أضفت الدقيق، و هذي صورته
يتبع ..
\ما اسكر قليله فكثيره حرام