هديتي لكم (المندي) ...أريح وأسهل غدا

السلام عليكم ورحمة الله

عزيزاتي
الوحدة منا لابد يجي عليها يوم تكون تعبانة أو مشغولة ومالها خلق وقفة في المطبخ وطباخ غدا وغسيل مواعين وهم كل يوم هذا
بس.......مضطرة تسوين غدا للعيال
أنا بعطيك حل حلو وسهل ومريح
بس ها...قلنا للأزمات فقط يعني مو تعجبك السالفة تقومين تسوينه كل يوم وتفكين عمرك :31:

يلا لاأطول عليكم

المقادير
تكفي لشخصين (يسوون رجيم)

نصف دجاجة
كوب رز بسمتي
كوبين ماء
2ملعقة زيت
ملعقة صغيرة ملح
طماطم+فلفل أخضر بارد (فليفلة) + بصل حسب الرغبة، تقطع قطع كبيرة

الطريقة


اغسلي الدجاجة وتبليها كما تحبين وضعيها في صينية مبطنة بالقصدير وادخليها الفرن

ضعي الرز في قدر يكون أوسع شوية من المعتاد (يعني اذا انتي تحطين الكوب رز في قدر معين هاتي اللي اكبر منه حبة)
اغسلي الرز في نفس القدر (اختصارا للمواعين)ثم ضعي عليه الماء والزيت والملح وحركي
انثري على الوجه الطماطم والبصل والفلفل وادخليه الفرن مع الدجاج
بدون غطاء حتى يجف الماء تقريبا ثم غطيه ،10 دقائق ويكون جاهز
وصحة وعافية


ملاحظات
# يمكن مضاعفة الكمية حسب حاجتك بس أنا هذي الكمية اللي اسويها عادة وتزيد علينا بعد
# اذا كان عندك صينية فيها ثقوب (مثل صينية البيتزا)ضعي الدجاج عليه وضعيها فوق الرز حتى ينزل دهن الدجاج عليه ويعطيه طعم رائع
# يمكن استبدال الدجاج باللحم مع مراعاة فرق التوقيت ..أقصد فرق مدة الإستواء (كنها انقلبت جغرافيا؟؟)
# لايضاف اليها اي بهارات لأنها تعتمد عل نكهة الطماطم والفلفل الرومي
#القصدير مايفرق في سوا الدجاج لكن عشان الصينية ما تتوسخ
<<<<<<(أخاف يعطوني رقم قياسي في الكسل)


هذا كل شيء و أي سؤال أنا حضرة وانشاء الله أكون أفدتكم








عذرا على ثقالة الدم :33: