السلام عليكم ورحمة الله وبركاته

اللهم ارزق اخواتي في قسم تأخر الحمل الذرية الصالحة العاجله غير الآجله يارب العالمين

اللهم ارزق اخواتي حوامل التوأم بالحمل السهل والولاده الهينة والذرية الكامله يارب العالمين

رجعت لكم مره ثانيه زي ماوعدتكم علشان اجاوب على اسئلتكم واحكيلكم قصة ولادتي :35:

اشكر كل من بارك لي من غير ذكر اسماء علشان ما انسى احد ..والله انكم اخوات عزيزات وغاليات ..احبكم بصدق ,مضيت احلا ايامي معاكم بسهلها وبصعبها ..

ابارك لام ليان وسليمان الف الف مبروك حبيبتي يتربوا بعزكم يارب
وابارك لعاشقة اسطنبول الف الف مبروك حبيبتي مبروك ماجاكي الله يحفظهم لك
وابارك لحبيبتي شهوده الله يخليلك ما اعطاكي والحمد لله على سلامتك..

وعقبال كل وحده في هذا التجمع يارب تفرحنا وتكتب لنا خبر ولادتها لانه صراحه شعور حلو جدا جدا لما ترتاحي وتكتبي تسجيل دخول بدون كرشه:35:

خلوني اكتب لكم قصتي بالتفصيل علشان تستفيدوا..

يوم الثلاثاء 15 محمرم الساعه 7 المغرب حسيت بكتمه نفس شديده لدرجة اني رحت الطوارئ ابغا اكسجين ولما دخلت الطوارئ قالوا لا انتي روحي غرفة الولاده يسووا لك تخطيط للاجنه علشان يشوفوا في طلق ولا ..لا
حطوني على كرسي متحرك وطيران لغرفة الولاده وحطوا جهاز التخطيط حق التوام مدته ساعه الا ربع وبعد ساعه الا ربع قالوا في طلق وضروري نولدك هالحين انتي واصله حدك..
قالوا متى اكلتي اخر مره قلت لهم الساعه 5 العصر اكلت شوي مو كثير قالوا خلاص ننتظر للساعه 10 وندخلك العمليات ونولدك قيصري ..وفعلا على ماجت الساعه 10 ركبوا المغذي وحلقوا اخر البطن مكان العمليه ولبسوني ملابسهم واعطتني ابرة مضاد حيوي ..والحمد لله كنت ماخذه ابرة الرئه وخالصه من اول الشهر الثامن
والساعه عشرة ونص بنجوني بنج كااامل صحيت الساعه 12 لقيت حالي بغرفة الافاقه وجنبي اخت زوجي وكنت ضااايعه مدري ايش القصه وخايفه وشوي الم في بطني وبعدين بديت استوعب القصه ومو قادره اتكلم كنت ااشر لها بيدي رقم اثنين قصدي اسال عن التوام قامت طمنتني عليهم وصرت اصيح مو مصدقه اني ولدت واولادي بخير واشرت لها على بطني قصدي اني متوجعه قامت نادت الممرضه وقالت لها في الم قالت خلاص اعطيتها مسكن .. وكنت خااايفه ما ابغا اترك يد اخت زوجي الله يجزاها بالخير ماسكتها بقوووووه ...فنصيحتي للوالده قيصري احرصي انك لما تقومي من الافاقه توصي احد انه ماتفتحي عينك الا وهو قدامك امك اختك زوجك المهم يكون في احد قدامك لما تفتحي عيونك لانك تحسي بضياع وخوف وتبغي من يطمنك على اولادك..

المهم بعد غرفة الافاقه ودوني غرفتي نسيت اقولكم اسم المستشفى اللي ولدت فيها ..المستشفى السعودي الالماني بجده ..
الدكتور محمد رضوان هو اللي سوالي عمليه اطفال الانابيب وهو اللي تابع حملي وهو اللي ولدني ..

وزي ما قلت لكم الله رزقني ببنت وولد سميتهم سيف وجوري ماشاء الله ..
الولد طلع قبل البنت وكانت اوزانهم كيلوين والولد زايد عن البنت بمية غرام يعني كيلوين وميه وعلى طووول اخذوهم للحضانه الى يومكم هذا يارب يطلعوا بالسلامه ..والحمد لله تنفسهم صار طبيعي بس ننتظر يتأكدوا من باقي الوظائف لانهم انولدوا مبكر ...

وانا كل يوم اشفط لهم بالبيت حليب وزوجي ياخذه لهم للمستشفى علشان ما يفوتهم اللبا اللي يعطي المناعه واللبا هو اول حليب الام يجي لونه اصفر مرررره ..

رحت امس شفتهم لقيتهم ناقصين بالوزن فرررق بين اول ما جبتهم وامس لما شفتهم على فكره هم امس كملوا اسبوع ..لكن الحمد لله قال الدكتور هذا شي طبيعي وطمنا انهم اليوم بدا الوزن بالصعود وتعويض الوزن المفقود زادوا 30 غرام ..

اممممم ايش كمان قاعده احاول اكتب لكم كل شي ممكن يفيدكم..

خلوني ارجع شوي لما بعد الولاده ...
اليوم الاول بس مسدوحه بدون حركه ومركبين لي قصطره ومغذي وكل شوي مضاد وادويه اشكال والوان ..
اليوم الثاني فكوا القصطره وطلبوا مني امشي وجابوا لي وحده تسوي لي علاج طبيعي تحرك لي رجولي وتمارين لصدري ولبطني مرتين باليوم..
المشي اول يوم جدا صعب لكن شدي حيلك ضروري وحاولي تمشي مستقيمه علشان الغازات تطلع وتتحرك الدوره الدمويه وعلشان الجرح يلتئم بسرعه
وافضل نصيحه اقدمها لكم لا تحبسي اي غازات لو عندك حتى امك وابوك :35: ضروري تطلعيها
اصلا كل شوي تجي ممرضه وتسألك في غازات ؟ وتسالك: في براز
بعد ثلاثة ايام اذا كنتي خرجتي الارياح واتبرزتي وطلع منك دم النفاس وضغطك كويس وحرارتك كويسه وخياطتك ماعليها مشاكل يقولوا لك امسكي الباب :27:
انا خياطتي تجميلي وقالي اجي افك اللزقه عنها السبت الجاي ..

بنات نصيحه ثانيه لكم..
لا تسمعوا كلام كل وحده تزوركم ..
هذي تقول لا تشربي مويه وهذي تقول عبي بطنك مويه ووحده تقول خذي هذي الوصفه ووحده تقول لا ماعليكي منها خذي هذي الوصفه احسن .......وهكذا
اسمعي كلام الدكتور فقط...
انا حماتي وامي وعماتي واللي يكلمون يباركون ماشاء الله كل وحده تعطيني وصفه شكل والله لو سامعه كلامهم كان انا هالحين بالعنايه المركزه :35:

على فكره اول يوم ماتاكلي فقط تشربي سوايل وفي دكاتره يخلوكي يومين او ثلاثه حتى على السوايل وبعدها يعطوكي اكل مسلوق وشوربات وخفايف..
وكانوا مانعين عني الحليب مرررره لانه يسوي غازات...

والحمد لله طلعت من المستشفى بعد ثالث يوم لانه كل شي كان تمام قالوا مافي داعي تقعدي زياده وفعلا طلعت ورحت لبيتي اريح بكثييييير ومعاي الوالده تهتم فيني الله يخليها لي يارب ..
ومو ناقصني غير شوفة سيف وجوري :44:

نسيت اقولكم شغله في وحده سالتني عنها مو ذاكره من هي ..قالت اخذتي شنطتك حقت الولاده معاكي؟
طبعا لا لاني كنت جايه بس ابغاهم يحطوا لي اكسجين مادريت الدعوه فيها ولاده..
لكن وصيت زوجي على الاشياء اللي ابغاها وجابها لي من ملابس ولحاف النفاس لان احنا عندنا عاده انه لازم ينحط اللحاف حق النفاس بالمستشفى مو بس بالبيت ..واخذت شنطة البيبيهات ورجعت معاي زي ماهي مافكيتها لانهم بالحضانه
وانا ماكنت مجهزه شنطتي ولا كنت شاريه قمصان للاستقبال ولا شي على اساس انه عندي وقت مدري ان المكتوب لي اولد قبل موعدي فبصراحه انحست شوي ..خصوصا ان امي كانت لسه ما جت من السفر وانا كنت معتمده انها اذا جت امي هي تكمل لي الاشياء الناقصه ولكن قدر الله وماشاء فعل ..فاللي لسه ما حضرت شنطتها نصيحه مني جهزيها لاتقولي بدري ما تدري وش الله كاتب لك ..

والحمد لله الذي اتم نعمته علي
يارب تستفيدوا من قصتي
ادعوا لاولادي يطلعوا بالسلامه وافرح بشوفتهم

مبروووووووووك
صرتي تكتبين على راحتك
انا بخير الله يسلمك

انعم ام
الحمدلله على سلامتك وانا شاء الله يطلعون بالسلامه لك
وتفرحين بهم في حضنك يارب العباد

وعليكم السلام ورحمة الله وبركاااته اختى انعم ام....
الحمدلله على سلاااامتك حبيبتى ويااارب يسلملك اولادك ويطلعولك سالمين يارب وتفرحى بيهم
ومشكوووورة والله على ذكر تجربتك كاملة وماشاء الله كفيتى ووفيتى ...والله يحفظلك امك ويبارك فيها

لكن كتمة النفس حبيبتى اللى كانت عندك كان معها طلق تحسين فيه وللا ما كان عندك شعور بالام الولادة وقتها
؟؟

ماشاء الله عليك يانعم ام ربي يعطيك العافية ويكبر عيالك ويتربون بحضنك انتي باي اسبوع ولدي اتوقع انك بالشهر التاسع ليش مبكر