بسم الله الرحمن الرحيم
السلام عليكم ورحمة الله وبركاته
صباح/مساء الخير
ساكتب لكن قصتي لعلها تبعث الامل فيكن
تزوجت كاي بنت تحلم بالاستقرار والسعاده الزوجيه
وان استمتع مع زوجي في البدايه دون اطفال
ومرت الشهور الاولى دون حمل وانتظمت الدوره وبعدها تلخبطت
فرح زوجي واخذني للمستوصف عشان احلل حمل كان شاك بحملي
وانا من جوا مستبعدته وحللت وطلع سلبي وبعدها صار يتكلم عن الحمل
واذا جانا الطفل كيف بتكون حياتنا وفكرت وقررت اتعالج ورحت كشفت
عند دكتوره وسوت لي سونار وقالت كل شيء سليم من غير ماتسوي تحاليل
وصرفت لي كلوميد اخذه من ثاني يوم للدوره واخذته وتابعت معها التبويض وكل شيء
اوكي بس ماصار حمل وكررنا التجربه مره ثانيه وثالثه وربي ماكتب هنا اختي نبهتني
مااخذ كورس تنشيط اكثر من ثلاث شهور ارتاح وارجع بعد كم شهر لان اختي متاخره في الحمل
كم سنه وعندها خلفيه عن هالموضوع وتركت الدكتوره ورحت لدكتوره ثانيه وكشفت علي وطلبت مني
تحليل هرمون الحليب وكان مرتفع شوي وسألتني عن تحليل زوجي وقلت زوجي سوا بمستوصف ثاني
ومدري عن تحليله قالت ضروري اشوفه عشان احطه بالملف وقلت لزوجي ورفض قال اموري تمام
وسكت لانه مايحب اساله عن علاجه ورجعت للدكتوره وكان في اليوم 17 اتوقع قالت يووه بويضاتك
صغيره مره اتوقع ماراح ينفع معك الا اطفال الانابيب وحسيت بضيقه كيف تقولي هالكلام وانا توني متزوجه
مالي الا عشر شهور وبكيت بعد ماطلعت ولاعاد رجعت لها مره ثانيه ولاعاد راجعت اي دكتوره
بس غريزة الامومه تدفعني ادور افضل دكتور وسمعت عن مركز سمير عباس وعن الدكتوره منى
تعالجو ناس كثير عندهم وربي رزقهم وتوكلت ع الله وقلت لزوجي ورحت لهم كان بعد سنه وشهرين من زواجي
ودخلت عند الدكتوره منى وكانت دكتوره ممتازه بكل ماتعنيه الكلمه وكانت صريحه معنا قالت أنا مااعالج الزوجه
لحالها لازم يكشف الزوج عشان نتطمن ع الوضع وطلبت مني تحاليل اسويها ثاني يوم بالدوره ومتابعة تبويض واخذ
عينه تحليل من الزوج وطلعت تحاليلي كلها سليمه بس عندي تكيس ع المبيض بس خفيف وزوجي طلع عنده ضعف شديد
في العدد تقريباً نص مليون وخلوني وعطو زوجي ابر وحبوب ياخذها لمدة ثلاث شهور ويحلل بعدها يالله اخذ العلاج يوم
ياخذه ويوم لا وحلل بعدها ومافي تحسن وصرفوه مره ثانيه وثالثه ورابعه ونفس الشيء مافيه تحسن وطبعاً قرروا الدكاتره
أفضل شيء لوضعنا التلقيح المجهري وزوجي ماكان مقتنع مره وبعد اقناع مني وكلامه مع الدكاتره قررنا نسويها
ورحت للدكتوره وقلنا لها بنسوي تلقيح مجهري وكان باقي على موعد دورتي عشر ايام تقريبا وقالت بعطيك الابر التحضيريه
خفت وحسيت الموضوع جد وقرب وأجلت للشهر الثاني الدكتوره قالت مو مشكله بس زوجي انصدم قال وين اللي تلح علي
ليل ونهار قلت حسيت بالخوف قال اذا خايفه مو لازم قلت لا لازم بس الشهر الجاي نسويها ان شاء الله قال اهم شيء راحتك
سبحان الله كأني حاسه راح يصير شيء بعدها بااسبوع توفى جدي الله يرحمه وتأثرنا حيل وتأخرت الدوره وطلبت من زوجي
يجيب لي تحليل منزلي من الصيدليه وكنت اول مره اطلبه من زوجي لاني كنت اشتريه من غير مايدري وجاب لي وحللت
وللأسف طلع سلبي وكنت انتظرها تنزل ونزلت وكلمت الدكتوره قالت تعالي في اليوم العشرين من الدوره وجيتها وصرفت لزوجي حبوب فيتامين E وبدت معي
ابر تحضيريه تحت الجلد واخذتها بالمستوصف وكنت راح اسافر مع أهلي وصعبه اروح للمستوصف وقلت للمرضه علميني كيف
وعلمتني وصرت أخذها بنفسي مع اني خوافه بس قويت قلبي لان مافي احد يدري عن عمليتي غير زوجي وخواتي
وطبعاً قدام زوجي مااحد يدري
وسافرنا وقبل لااسافر صارت مشكله كبيره بيني وبين زوجي وتركت له البيت وكنت أخذ حبوب تأخير الدوره عشان ماتنزل
وأنا مسافره وجيت واستمريت في أخذ الحبوب اسبوع وحل ابوي مشكلتي مع زوجي ورجعت لبيتي وثاني يوم من رجعتي انزلت الدوره
وكلمت الدكتوره وجيتها في رابع يوم من الدوره وسوت لي تحاليل وعطتني ابر تنشيطيه 2بودره+اماء وصرت اخذها في العضل
مع الابر التحضيريه بالفخذ وتابعت مع الدكتوره وبما ان التبويض عندي متأخر طولت في اخذها وحددت لي اخذ الابره التفجيريه
الساعه 11ونص بالليل يوم الثلاثاء وموعد عملية السحب يوم الخميس وكنت صايمه من الليل ودخلوني غرفة العمليات الساعه11
وفقت الساعه وحده وكنت احس باالم فضيع وعطوني ابره مسكنه وسحبو مني اربع بويضات وخذو من زوجي عينه
ونمت وقمت العصر وطلعت للبيت وعطوني حبوب مسكنه وكنت انتظر اتصالهم واتصلو علي يوم السبت قالو تعالي بكره
عشان ترجيع الاجنه وحمدت ربي وكلمت زوجي وفرح اهو بعد وقال الله يكتب اللي فيه الخير ورحنا يوم الاحد وقالو الترجيع
مثل الكشف العادي مايحتاج بنج وتكون المثانه مليانه أفضل وكان معي بعلبة المويه موية زمزم وشربتها وانا مستقبله القبله
ودعيت باالحاح ان ربي يرزقني الذريه الصالحه ولايضيع تعبي وانه ارحم بي من امي وكنت ابي دورة المياه الله يكرمكم وقالوا لا
ونزلوني لغرفة العمليات ودخلت عندي الدكتوره قلت دكتوره مااقدر ابي دورة المياه قالت ماتقدرين تصبرين لانه افضل عشان توضح الاشعه
قلت مااقدر وطلعت ورحت لدورة المياه وقلت رجعوني قالو الدكتوره دخلت حاله ثانيه واذن الظهر وناديت الممرضه قلت ابي اصلي
وجابت لي الغطاء حق المستشفى وقلت ابي اتوضى ودخلت دورة المياه مره ثانيه وخفت وكنت ابي مويه عشان الاشعه بس مع التكييف
البارد وموية زمزم مثانتي كانت مليانه وصليت ودخلوني ع الدكتوره بعد الصلاه وقالت ها ارتحتي ولا لسى قلت لها مااقدر غصب عني
وكشفت وسوت اشعه قالت مشاءالله المثانه مليانه والاشعه واضحه شنو مسويه قلت شربت موية زمزم قالت كلها بركه ان شاء الله
ورجعت لي اثنين وورتني الصوره وتعلق قلبي فيهم احسهم قطعه مني وخذوني الممرضات ع غرفتي وبعد ساعه رحت لدورة المياه ورجعت ارتحت لين الساعه 5 وطلعت
وكنت مريحه نفسي ع الأخر الدرج يمكن خلال الاسبوعين ماطلعت الاخمس مرات بس وكنت ادعي واستغفر بكل وقت وماسويت تحليل
منزلي ابداً كنت متوكله على الله ومتفائله كثير وبعد اسبوعين رحت للمستوصف ابس اسوي تحليل دم هرموني قالو ماراح يطلع الابكره
واضطريت اسوي التحليلين عادي وهرموني وقالو استنو نص ساعه عشان التحليل وزوجي متوتر رايح جاي وأنا اشغلت نفسي بالاستغفار
وجاء زوجي ماعرف يتكلم وبعدها قال ابشرك فيه حمل وأنا مو مصدقته رحت للمختبر وسألتهم قالو الافيه حمل قلت وروني بوزتف>>مو مصدقه انها حامل >>يارب ترزقكن الاحساس بها الشعور وتعجزن عن وصفه
وقال بكره تجون تاخذون نتيجة التحليل الهرموني وطلعنا الدنيا مو واسعتنا من الفرحه وبكينا ورجعنا البيت صلينا ركعتين نشكر الله ع النعم اللي انعمها علينا
وصارالحمل بعد ثلاث سنوات زواج وصار عندي فرط تنشيط وانصحوني بالر احه والمثبتات كانو حبوب وتحاميل والحمدلله مرت اشهر حملي بسلام مع اني تعبت فيها
ورزقني الله بولدي بعد هالتعب كله وكل ماشفته حمدت الله على نعمه التي لاتعد ولاتحصى
خلاصة تجربتي اوصيكن بالصبر وتفائلي ان ربي راح يرزقك اذكر اذا شفت حامل اقول الله يتمم عليها وان شاءالله راح احس بشعورها قريب
حسن ظن بالله والدعاء دايم والاستغفار والصدقه واذا انظلمتي لاتدعين على اللي ظلموك تحسبي عليهم وادعي ان ربي يرزقك الذريه الصالحه
اذكر قبل لااحمل بسنه انظلمت ومن ناس قريبين مني حييل ودعيت انه ماتدور السنه الاطفلي معي او حامل والحمدلله مادارت السنه الاكتكوتي ببطني
واللي المشكله عند زوجها تحاول فيه يتعالج ولاتيأس
أنا زوجي قعد سنه ونص على ماوافق مع ان الدكتور موضح
لنا كل شيء وفي الاخير وافق الحمدلله
والله يرزقكن الذريه الصالحه اللي تسعدكن في الدارين ولاتنسني من دعواتكن ربي يسخر لي زوجي ويصلح ولدي ويرزقنا من حيث لانحتسب
ووفقني الله واياكن لما نحب ونرضى واللهم صلي وسلم على نبينا أفضل الصلوات والتسليم
واي استفسار راح اجاوبكن مع ان دخولي قليل بس تأكدن راح ارد عليكن ان شاءالله
افعلي الخيرات @afaaly_alkhyrat
عضوة فعالة
يلزم عليك تسجيل الدخول أولًا لكتابة تعليق.
ماشاء الله تبارك الله .. الله يجعله قرة عين لك ولأبوه ويجعله من عباده الصالحين ..
اللهم فرح قلوبنا .. وآنس وحشتنا .. ونفس كربتنا .. وفرج همنا .. وأزل ضيقنا .. وعوض صبرنا .. وقر اعيننا
بذرية صالحة معافاة ليس في خلقها زيادة ولانقصان واجعلهم خيراً لنا ومن البارين بنا ومن المستغفرين لنا عند مماتنا
واجعلهم من الصالحين ومن حفظة كتابك الكريم ومن المجاهدين في سبيلك عاجلا غير آجل يارب العالمين آآآآآمين ..
اللهم فرح قلوبنا .. وآنس وحشتنا .. ونفس كربتنا .. وفرج همنا .. وأزل ضيقنا .. وعوض صبرنا .. وقر اعيننا
بذرية صالحة معافاة ليس في خلقها زيادة ولانقصان واجعلهم خيراً لنا ومن البارين بنا ومن المستغفرين لنا عند مماتنا
واجعلهم من الصالحين ومن حفظة كتابك الكريم ومن المجاهدين في سبيلك عاجلا غير آجل يارب العالمين آآآآآمين ..
ماشاء الله تبارك الله الله يهنيك ويصلحه ويرزقك بره وتشوفين اخونه وخواتهويصلح لك زوجك ويصلحك له
الصفحة الأخيرة
الله يحفظ لك ولدك
ويرزقك باخوان
وصدقتي مافي مثل
الدعاء+الأستغفار+الصدقه+حسن الظن بالله= تحقيق المراد
والله يرزقنا عن قريب