![][ نورالدنيا ][](https://cdn.hawaaworld.com/images/user_avatar.png){kind=avatar}
السلام عليكم اخواتي جميعا .. الصراحه هاالموضوع اللي دفعني لكتابته هو حال الاخت سنيوريتا ولانه فعلا فيه كثير يعانون نفس معاناتها وضاع عمرهم وهم ناسين نفسهم .. كنت بكتبه كرد في موضوعها بكم نصيحه بعدين قررت اخليه موضوع متكامل علشان الفائده تعم اكثر وللجميع .. وهو نتيجة تجارب شخصيه ومن المنتدى اللي استفدنا منه كثير وجزى الله كل اخت نفعتنا كل خير كل وحده باسمها .. مع حفظ حقوقهم ومواضيعهم لهم لكن من كثرتها نسيت الاسامي ..
اول شي .. العلاج يبدا من الداخل .. النفسيه لازم تكون عال العال طبيعي كلنا عندنا ظروفنا ومشاكلنا لكن الله منعم علينا بنعمة القناعه والرضا .. لذلك عزيزتي اهتمي اولا قبل الجسم والشكل بالروح والاخلاق .. حسني علاقتك مع الخالق وارضي بكل شي مكتوب لك واطمحي للافضل .. اهتمي بغذاء الروح مثل ماتهتمين بغذاء الجسد .. حطي برنامج روحي تمشين عليه (( راح اذكر برنامج روحي بسياق الموضوع ).
اقراي كثير نمي ثقافتك .. شوفي اهتماماتك ايش وركزي عليها المرأه ماهي شكل وبس المرأه عقل وفكر .. الرجال مايبي وحده تطبخ وتكنس وتلبس وهي من جوا سطحيه وفارغه يبي انسان يتناقش معه ويفهمه .. وحلو يجتمع فيك الخصلتين ست بيت شاطره وزوجه صالحه واعيه ومتفهمه.
اختاري برنامج خاص لجسمك وبشرتك وشعرك واحد بس وامشي عليه لاتياسي وتقولي مافيه نتيجه ولا مليت .. والمنتدى مليان وفي هالموضوع باضيف برنامج من عندي .. وانتي اختاري الانسب لك والمتوفر
واهم شي الدعاء بالحاح وتحري اوقات الاجابه .. المحافظه على الاذكار والنوافل .. احرصي على حجابك وحشمتك وداري زينتك عن عيون الاجانب .
هذي اشياء اعتبرها اساسيات ونجي الحين لاحتياجاتك ..
الوجه .. الاهتمام بنظافته والحرص على انك ماتتعبثي فيه لابمكياج ولا بخرابيط .. الاعتدال في كل شي مطلوب .. الصباح اول ماتصحي اغسلي وجهك بغسول خفيف ومناسب لك بعد استشارة اخصائيه تتابع معك لو عندك مشاكل حبوب او شي من هالقبيل .. او حطي زبادي وقبل ينشف امسحيه بقطنه وهذا يغني عن الصابون علشان مايعدم بشرتك
بالمناسبه الزبادي واحد من اروع الاقنعه تستخدميه لوحده او مع اي خلطه جدا رائع .
الشعر .. جيبي صبغة مس كليرول بني متوسط واصبغي شعرك فيها فورا .. نصيحه لاتروحي لمشغل يصبغون لك لانها قويه صبغتهم على الشعر وتعدمه لكن مس كليرول خفيفه وانا استخدمها دايم وجدا رائعه .. واخترت اللون البني المتوسط لانه محايد ويناسب الجميع .. بعد ماتصبغي تروحي مشغل علشان يقصون شعرك التالف واختاري تدريج طبقات لشعرك .. قصي بس لاتستشوري لاني جايتك بطريقه تغنيك عن الاستشوار .. تحتاجي رولات شعر يسميها البعض مكر فيه منها احجام وانواع خذي حجم كبير ووسط وصغير .. وفيه من لوريال ماسك للشعر الملون علبته حمراء تستخدميه بعد ماتغسلي شعرك كقناع لمدة دقايق وتغسلي شعرك بعده بالمويه .. وزيت دابر املا الاصلي من العطار هذي الاشياء لازم تكون موجوده عندك وبشرح لك كل شي بالتفصيل عن كيف تستخدمينهم مع طريقه لتعطير الشعر واعطائه رائحه جميله .
الجسم .. وما ادراك مالجسم مشكلة الحريم الازليه ..سمنه ترهل خطوط لون مختلف بس الشكوى لله .. الله يعظم اجر الحريم .. المهم جسم بدون رياضه مستحيل يتعدل .. لذلك اشتركي في نادي رياضي واذا ماقدرتي المشي يغنيك عن كل شي هو الرياضه الفعاله ومايحتاج الا لملابس مريحه وجزمه مناسبه وحوش تدورين فيه لمدة نص ساعه الى ساعه يوميا بانتظام .. ومايمنع كم هزة وسط مو شرط على ميوزك انتي حركي جسمك اهم شي تتحركين وشغل البيت بعد ينفع بس لازم بحركات منتظمه وبذل مجهود .. بالاضافه الى اتباع نظام غذائي مناسب ماهو ريجيم تحرمين نفسك من كل شي ثم ترجعين لحالتك الاولى وكانك ماسويتي شي .. وبعد بحط نظام غذائي يناسب ومتنوع
اما بالنسبه للون لازم تختاري خلطه مناسبه وتستخدميها بانتظام وحمام البخار ممتاز مو بس للون لكن مريح للعظام والنفسيه تحسي تعبك تبخر مع العرق .. اشتري لك واحد واستخدميه بغرفتك وحافظي على خصوصيتك وحيائك ..
وزنك بالنسبه لطولك المفروض يكون 53 لكن بحكم انك ام فيبي لك تنقصين في حدود 7 كيلو ومااعتقد انها صعبه يبي لك شهرين على اقصى حد لو نزلتي كل اسبوع كيلو .. بس يبيلك همه واراده قويه
المنطقه الحساسه والشعر ..اممم بعد هذي مشكله ازليه بس نحاول نحلها بطرق تريحنا .. بس انصحك وانتي براحتك شيلي بالموس فيه نوعيات امواس كويسه وبعضها معه رغوه خاصه .. شيلي بالموس بنعومه وبعد ماتخلصين اغسلي بديتول الجسم المطهر مهو الصابون .. لونه اخضر للاستخدام الشخصي .. خففيه بالمويه وبقطنه امسحي المنطقه بعد ماتكونين خلصتي وغسلتيها بالمويه نشفي بعدين استخدمي الديتول وطهري بحكم ان الموس يسبب لك حبوب .. هذا اول يوم طبعا الشعر يرجع بسرعه .. بيكون قصير وشوي استخدمي اله براون سيلك ابيل الملقط مهو اللي راسه شفره .. وشيلي او استخدمي حلاوه وانتفي بقطعه صغيره وبشويش حبه حبه .. لحد ماتتاكدي المكان نظف .. استخدام الاله او الحلاوه بيضمن لك انه الشعر يقعد فتره اطول ماطلع وهالوقت تستغلينه في استخدام خلطه تفتيح من الدكتوره او المنتدى .. وانصحك تاخذي من الدكتوره غسول خاص للحبوب في هالمنطقه .. ولاتهملي نفسك ابد
اختي انتي محتاجه انتفاضه انتي وكل بنت تمر بنفس مشكلتك وناسيه نفسها .. فيه خطوات سويها قبل تبدين .. غرفتك انفضيها فوق تحت ارمي اللي ماتبينه من اغراض وملابس ودعي سنيوريتا القديمه واستقبلي انسانه جديده .. دولاب ملابسك جددي فيه بالمعقول .. المكياج اشتري الضروريات والاساسيات بحكم انك ماتعرفين فيه كثير .. تعلمي اقري خطوات الميك اب .. فيه مجلة الجميله هذي جدا مفيده ومتنوعه انا مااشتري غيرها لانها تغني كل بنت وتاخذين اشياء كثير مفيده منها .. التلفزيون تابعي البرامج المفيده .. خذي فايدة الدش .. فيه برامج كثير متنوعه ومفيده .. وبرامج خاصه بالحريم وباللبس والمكياج .. والحلو فيك عندك رفض للاغاني بارك الله فيك .. مدام صار موجود عندك الدش حاولي تاخذي الفايده منه وابعدي عن كل شي مسي ومضر .. اسمعي اشرطه كثيره ومتنوعه خاصه بالحياة الزوجيه صح انتي عندك تجربه سابقه بس خلاص صفحه وانطوت اعتبري نفسك عروس لاول مره ..
نبدا بالبرنامج الروحي .. لو طبقناه ومشينا عليه بانتظام بنحس براحه نفسيه كبيره ورضا .
1- اداء 12 ركعه نافله في اليوم والليله (( بيت في الجنه ))
2- صلاة الضحى والوتر.
3- صلاة ركعتين في جوف الليل (( نزول الله في هذا الوقت ويستجيب لمن دعاه ))
4- قراءة سورة الواقعه كل ليله (( لم تصبه فاقة ابداً ))
5- قراءة سورة الملك كل ليله (( تغفر وتشفع وتنجي قارئها ))
6- قراءة سورة يس .
7- قول سبحان الله وبحمده 100 مره (( بيت في الجنه ))
8- قول استغفر الله واتوب اليه 100 مره (( تفرج الهم والضيق ))
9- قول الله الله ربي لا اشرك به احداً / ياحي ياقيوم برحمتك استغبث اصلح لي شأني كله ولا تكلني الى نفسي طرفة عين / ربي اني مغلوب فانتصر (( يغفر بها الذنوب ويفرج بها الكرب ))
10- الحرص على الاذكار اليوميه اذكار الصباح والمساء واذكار مابعد الصلاة واذكار النوم والاذكار المتعلقه بكل امور الحياة.
11- صيام الاثنين والخميس من كل اسبوع وصيام الايام البيض من كل شهر.
12- الحفاظ على الدعاء دبر كل صلاة والالحاح فيه مع تحري اوقات الاجابه.
13- قراءة القران ولو جزء يسير منه كل يوم ولو وجه واحد بعد كل صلاة فجر.
14- الاستماع الى البرامج النافعه والمفيده مثل اذاعة القران او الاشرطه المفيده وقراؤة المفيد من الكتب والمجلات.
والاهم هو الرضا والقناعه والايمان بان ماكتبه الله لنا فهو خير ونبتعد عن الحزن والشكوى وتذكر ان الله دائما معنا ومابتلينا بشي الا لحكمه يعلمها هو .. والحرص على الابتسامه وعمل المعروف مع الجميع بقدر الاستطاعه.
نجي عاد للاهتمام بالشكل..
مثل ماقلت فوق لازم تسوي الوحده انتفاضه لتغيير كل شي مو عاجبها في نفسها او حياتها .. والبدايه تكون في المكان اللي هي عايشه فيه .. غرفتها .. تقلبها فوق تحت ترتبها بطريقه تريحها نفسيا .. دولاب الملابس ترتبه وتحتفظ بالملابس اللي تستخدمها دائما وتتخلص من اللي زايد عندها وماعاد يناسب مقاسها .. والجمعيات الخيريه ترحب في هالشي ماعليك الا انك تغسلينها وتكوينها وتجمعينها في كيس او كرتون وتودينها لهم .. اما الملابس الداخليه الافضل رميها .. بعد ماخلصنا من الغرفه وهيئنا مكان نرتاح فيه ويفتح نفسنا .. نبدا نهتم اول شي جيبي لك وحده تشيل جسمك كله حلاوه لازم تحسي بالنظافه واذا كنتي تستحين او ماتوفر لك جيبي حلاوة فيت السائله استخدامها سهل ونظيف وماتاخذ وقت .. لمن تخلصي من الحلاوه يجي وقت الترويشه .. وهذي لها اصولها
اول شي .. جسمك كله غطيه بالخل (( خل التفاح اخذه من العطار او السوبر ماركت)) وركزي على الاماكن المترهله وتحملي ريحة الخل بس نتايجه فتاكه .. في هالاثناء جهزي اغراضك اللي تحتاجينها ..
جيبي وعاء بلاستيكي وتحطي فيه قطرات من الصابون السائل ( ممكن لوكس او ديتول او اي نوع تفضلي) + نقطتين زيت سمسم + نقطتين زيت لوز صبي عليها شوية مويه وارغيها باليد وغطسي الليفه فيها واتركيها لوقت الاستخدام
جيبي صحن بلاستيك صغير وحطي فيه ملح وسكر وليمونه مقسومه نصين وتعصري نص ليمونه على الملح والسكر والنص الثاني تغطسيه عليهم وتفركي فيه الركب والاكواع والمناطق الغامقه في الجسم واذا تحبي تضيفي شوية زيت زيتون او لوز فعلى راحتك .. وقبل ماتستخدمي صنفرة الليمون .. افتحي المويه على الحار وخليك تحتها لمدة ربع ساعه لحد ماينظف جسمك من الخل ثم
جيبي صابونة ديتول واغسليها بالمويه وارغيها في الابط حتى تكون رغوه كثيره وخليها وروحي قشري الجسم بصنفرة الليمون واذا خلصتي تقشير ارجعي للابط واغسليه بالمويه وبعدين افركيه بشريحة ليمون وخليه شوي لحد ماتغسلين جسمك كله بالصابون اللي فالوعاء البلاستيكي وافركي جسمك بالليفه بنعومه ثم اشطفي الجسم كله بالمويه .. طبعا مع الشعر واللي راح اتكلم عنه في الجزء الخاص فيه .. لمن تتشطفي بالمويه يكون عندك وعاء فيه مويه بارده مخلوطه بموية ورد صبيها على جسمك وشعرك كله والبسي روب الحمام وتنشفي وروحي للغرفه .. لازم تكوني مجهزه المبخره والبخور اللي ريحته تفتح النفس بخري جسمك وشعرك .. بعدين جيبي كريم او لوشن وادهني جسمك كله رطبي الجسم ولاتتركي ولا منطقه جافه لان الجفاف سبب السواد .. كريم 21 البرتقالي القديم للبشره الجافه بزيت اللوز مره ممتاز او لوشن جليسوليد .. جيبي بودرة اطفال ورشيها على الابط وممكن تخلطينها مع بودرة معطره من اجمل بريحة دهن العود او اي بودره تفضلين وترشين بودرة الاطفال بين الفخذين .. وتلبسين ملابسك اللي مبخره ومعطره .. راح تحسين بقمة النظافه والانتعاش .. زمان كانوا يقولون اهم 3 اشياء للمراه هي الكحل والطيب والمويه ..النظافه هي اهم شي وش الفايده تكون الوحده لابسه وكاشخه وحاطه مكياج وهي مو نظيفه .
وللحديث بقيه ..
الـشــعـر ..
كلنا نحب نغير ونجدد في لون او قصة الشعر حتى لو على حساب الشعر نفسه .. ولمن يحترق وينعدم نجي نبكي ونتحسر عليه .. لكن لو عملنا موازنه سليمه راح نقدر نجدد ونغير وفي نفس الوقت نحافظ على شعرنا صحي
الصبغات لازم تكون على فترات متباعده مو كل شهر نغير 3 او 4 مرات والاستشوار بعد لازم نقلل من استخدامنا له وكل المواد اللي تضر شعرنا لكن مانقدر نستغني عنها نخليها على مرات استخدام قليله وندور بديل مناسب .. اهتموا بالاكل الصحي اللي يفيد الشعر غذو من جوا علشان يصح من برا .. كل الخضروات والفواكه لاتبخلون على نفسكم ابد راح تغنيكم حتى عن الفيتامينات اللي بالصيدليات خذوها من مصادرها الاصل .. ارجعوا للطبيعه في كل شي ..
الخطوه الاولى للشعر علشان تغيير المظهر .. هو اختيار لون موحد للشعر كله وانا نصحت بالبني المتوسط من مس كليرول لانه جاي في النص لو اخذتي البني الغامق يسود الشعر ويخشنه ولو اخذتي الفاتح بتضطرين للصبغ كل فتره والثانيه بسبب فرق اللون عن الجذور .. بعد ماتصبغي روحي لمشغل ثقه .. خلي الكوافيره تسمي وتقص شعرك التالف ولا تقصره مره بعدين قصي مدرج طبقات وهذا يناسب الكل .. لمن تجي تغسلي الشعر اختاري الشامبو المناسب وفيه انواع كثيره .. بس الغالبيه يمدحون هيربال ايسنس اختاري النوع اللي يناسبك منه .. بعد ماتغسلي شعرك حطي ماسك من لوريال للشعر المصبوغ لون العلبه احمر وفيه منها للشعر العادي ومايتعدى قيمته 15 ريال في السعوديه انا اخذها من العطار لانها ارخص من الصيدليه اللي يبالغون احيانا في اسعارهم .. الماسك مدته 3 دقايق بعدين اغسليه بمويه .. واللي متعوده على بانويل او فاشكول او بيوتي فورميلا وناسبت شعرها تستمر عليها .. بعد ماتغسلينه وتشطفينه في الاخير مع جسمك بمويه بارده وموية ورد تنشفيه بالمنشفه الين تترطب شوي بعدين تشيلينها وترشين عليها عطر ك المفضل او مخمريه انا اخلط مجموعة عطورات للجسم والشعر مع بعض في علبه مع مخمريه قديمه عندي وطلعت ريحتها روعه .. عطورات الجسم والشعر تلقينها في الشركه العربيه للعود او وادي النحل او اي شركة بخور وعود .. وترجعين تلفينه المنشفه على شعرك فتره من الوقت وتفركين شعرك فيها لمن تحسي المويه خفت من شعرك تشيلينها وتنفضي شعرك بيدك على اساس توزعين الريحه .. ووخلي شعرك ينشف طبيعي لمن يجف بنسبه 90% قسمي شعرك بالمشط كذا جزء وخذي الغره ولفيها بروله او روليتين كبار .. بعدين تاج الراس لميه بروله كبيره واللف يكون على برا .. بعدين الطبقه الثانيه لفيها برولات وسط والطبقه اللي بعدها رولات اصغر الى اخر طبقة تكون اصغر الرولات .. واللف لاتنسين على برا .. راح يستغرق من 3 الى 4 ساعات للشعر القصير واكثر للشعر الطويل وكل ماكانت طبيعة الشعره ناعمه خفيفه كل ما اخذت وقت اقل .. متى ماجفت الرولات تماما تفكينها كلها بعدين تمشطين شعرك باصابعك وتفككين اللفات اللي فيه ثم اقلبي راسك لقدام وبفرشاة الشعر مشطيه من ورا وارجعي ارفعي راسك ورجعي الشعر لورا في الاول بتحسين شعرك هايش ومنفوش بس اصبري عليه شوي ويهجد تقدرين تمشطينه وتلمينه على فوق بشباصه او تلمينه بربطه قماش على ورا .. هذي هي طريقتي مع شعري ومغنيتني تماما عن الاستشوار طبعا نوعية الشعر هي اللي تحكم وتحدد ..
نصحت بزيت دابر وفعلا هالزيت ممتاز انا من مرتين استخدام وقف التساقط عندي والله يابنات اني مندهشه الى الان .. المشط كان يمتلي شعر لمن امشطه الين جاء يوم ومن كثر كلام البنات عن دابر رحت اشتريته ونفس اليوم زيت شعري فيه وكنت مقرره اخليه ساعتين بس كنت راجعه متاخره فنمت فيه وماغسلته الا من بكره يعني تنقع فيه شعري يوم كامل وغسلته واول شي لاحظته انا في الحمام ماطاحت ولا شعره بس مااهتميت .. ولمن مشطته نفس الشي ومر كم يوم ونفس الشي لمن راجعت نفسي وش الشي اللي سويته الايام الاخيره لشعري اكتشفت انه من دابر وبس .. والحمدلله هذا الشي اللي لاحظته بقوه لكن طول او كثر مااقدر اقرر لانه مااستخدمته الا كذا مره .. بالنسبه للزيت دايم نشكي انه ريحته تقعد حتى بعد مانغسله اكتشفت انه من زود حماسنا نغرق شعرنا زيت كننا هنود .. علشان كذا يبقى في الشعر مهما غسلتيه وهذا حصل معي لمن جيت المره الثانيه حطيت الزيت بس بكميه اقل بحيث ماتكون كثيره ولا اغرق نفسي فيها ولا تكون شوي ماتفيد .. ولمن غسلته ماكان هناك اي اثر للزيت او الريحه
ممكن تستخدمي زيت السمسم واللوز معه او لحالهم .. وفيه خلطه استخدمتها انا ومره ممتازه .. تجيبي ملعقة مايونيز صغيره لاتكثري على قد شعرك واقل وحطي معها زيت اي نوع تحبي حتى لو عافيه .. وحطيها ماسك للشعر قبل تغسلينه .. تعطي نعومه ولمعه رهيبه للشعر .. وبعد طريقه هنديه جربتها ووممتازه .. جيبي صفار بيضه واخلطيه مع ملعقة من اي زيت تفضلين وحطيها ماسك للشعر 20 دقيقه واغسلي شعرك
للي يستخدمون الاستشوار .. قبل الاستشوار حطي سيروم على شعرك من ماركه كويسه وكثير مدحوا سيروم كريستال ..
علشان نتايج افضل للشعر دلكي فروة الراس مره مفيد التدليك .. وبعد تمشيط الشعر قبل النوم من كل الاتجاهات من الامام والخلف يساعد كثير في تنشيط الدوره الدمويه للراس ..
اللي تستخدم الحنا .. من تجربه شخصيه الحنا مفيد بس ينشف الشعر كثير .. الشعره تقسى وتضعف .. فاللي تقدر تخليه يكون احسن واللي ماتبي تركز على ماسكات الشعر بعد الحنا ..الحنا مفيده من فتره لفتره لكن مو باستمرار يعني لو عانيتي قشره او فروة شعرك تدهن كثير ممكن مره تحطي الحنا ساعه او اقل لانه لها مفعول ممتاز لكن ماتستمري عليها كثير .. ولا تجمعي حنا مع صبغة لانها تكسر الشعر .. لو حابه تصبغي اتركي الحنا قبل الصبغه على الاقل شهرين وطول هالشهرين او اكثر غذي شعرك واهتمي فيه
هذي نصايحي وتجاربي للشعر ولو تذكرت شي بعد راح اضيفه ..
الحلاوة وازالة الشعر ..
سمعت من خبيره ان اللي يسبب ظهور الشعر تحت الجلد هو هدم استخدام الصنفره وكانت نصيحتها هي ترك الشعر يطول اطول فتره ممكنه وقبل ماتشيله بيوم او يومين تسوي صنفره .. ممكن مع حمام البخار بعدين تشيل لكن مهو في نفس اليوم ..
فيه صنفرة بودي شوب .. افريكان سابا كثير يمدحونه وهي عندي بس مو مستمره عليها ..
فيه صنفره طبيعيه ..
ملعقه ونص ملح خشن + ملعقه ونص زيت زيتون + نص ليمونه
او
ملعقه ونص ملح خشن + مقدار ماء + نص ليمونه
يدلك بها الجسم جيدا ثم يغسل بالماء .
بالنسبه للي تعاني من مشكلة الحبوب فتحاول تكون الحلاوه نظيفه وبشرتها بعد نظيفه .. والمناطق الحساسه تستشير طبيبه افضل
من الافضل ازالة الشعر في هالمنطقه بالموس بلطف وتعقيم الموس قبل استخدامه وتعقيم المنطقه بعد تنظيفها في الاول هو مزعج ويضايق بس اصبري يومين اول ماتبان رؤوس الشعر وتقدري تشيليها بالحلاوه قطع صغيره او بالاله يكون المها اقل واسرع في التنظيف واحرصي على ترطيبها باستمرار وتعقيمها لو حتى بمويه وملح تمسحي عليها بقطنه .. اهم شي النظافه واحرصي بعد ماتقضي حاجتك في الحمام تمسحي بالمنديل وتجففي من الامام للخلف طريقة المسح لان لو كانت من الخلف للامام راح تنقل جراثيم وبكتيريا ضاره للمنطقه الاماميه .. ممكن ترشي بودرة اطفال بين الفخذين تخفف من الاحتكاك
هذا اللي في بالي الحين ..
وللحديث بقية نختم فيها ....