مرحبااااااااااااااااااا

رجعت لكم بقصة ولادتي

اتمنى ان الجميع يستفيد منها ...
عالاقل تكون عندكم فكره وخلفيه عن الي ممكن تمرون فيه :)
.
.
يوم الثلاثاء الي فات كان عندي موعد مع الدكتور للتحظير للعمليه الي بتصير اليوم الي بعده (الاربعاء) شافني الدكتور وسوالي التراساوند عشان يشوف الاجنه ووضعهم ووين راس كل وحده فيهم ...
كان وضعهم متعاكس وحده راسها تحت والثانيه فوق ... وقرر ان يطلع الي راسها تحت طبعا قبل ..
كتب لي تنويم .. وودوني فوق خذوا مني كل التحاليل الازمه وسوولي تخطيط لقلب الاجنه ..
المساء الساعه 10 قالولي صومي ... الفجر الساعه 4 ونص تقريبا جات الممرضة وعطتني الابره الشرجيه <<< ياكرهي لها ... وعطتني محلولين قالت لي قومي اخذي شور وبهذا المحلول ( لونه وردي) اغسلي المنطقه الحساسه .. وبالمحلول الثاني ( لونه احمر ) اغسلي فيه جسمج من تحت الرقبه لين اسفل البطن ...
سويت الي قالت عليه .. وجاتني قالت بالله نركب القسطره والمغذي :09:
انا من يومي اموت خوف من الابر فما بالكم بالمغذي ... وقسطره بعد ... اول ماشفت اغراضهم جاتني حاله غريبه تميت اكح واكح واكح .. حسيت اني ماقدر اتنفس وصدري مكتوم .. بس الكحه ماوقفت ... وعقب قعدت ارجع بكميه كبيره .. كان بطني فاظي فكنت ارجع ماي المعده .. هذا كله من الخوف والتوتر
بعد ما ركبولي كل شي راحوا وتركوني وقالولي خليج مستعده لان اسمي كان اول اسم في لستت العمليات ... لكن ممكن يحصل تاخير لو جاتهم حاله طارئه تحتاج القيصريه ... قعدت استغفر وادعي وانا قلبي يرقع .. كنت خايفه ومتوتره .. جاني خوف مو طبيعي من العمليه ... الحمدلله على كل حال
على الساعه 8 ونص قالولي يالله .. بنزلج تحت للعمليه .. توكلت على الله وودوني ..
دخلوني قسم العمليات .. وخلوني في غرفه قبل غرفه العمليه .. يجهزوني فيها .. وكان دكتوري مو موجود
وقالوا يالله بندخلج .. جان اقوم واقول لا مابي وين دكتوري ... ابي دكتوري <<< صرت كاني ياهل خخخخخ
كنت ابي اشوف الدكتور ..ابي اشوف حد اعرفه عشان اتطمن شوي ... ودكتوري رجال كبير كنت احس بالطمأنينه لما يكون موجود .. خاصه اني اراجع عنده من اول حملي ... واحس انه اكثر واحد فاهم وضعي وحالتي
نادوا الدكتور وانا ارتحت قلت الحمدلله ... مابي احد يلعب فيني مثل مانوموني وكانوا بيولدوني قبل فتره لما كان الدكتور مسافر ...
دخلوني غرفه العمليات .. شكلها يخوف كأنها مشرحه بسم الله علينا .. اول مره ادخل غرفه عمليات ... جاء دكتور التخدير ... وخلوني اقعد واثني ظهري واخلي راسي نازل على قدام وانا حاظنه مخده (محندبه) ومسكوني ممرضتين من كتفي وايديني عشان ما اتحرك ... حاولت اني ما اتحرك وكنت خايفه اني اسوي حركه غلط وانشل لا سمح الله .. بس الحمدلله عطوني الابره وكان المها اقل بكثير من الي كنت اتصوره
بعد الابره بدقيقه او دقيقتين قال لي دكتور التخدير تحسين بحراره في جسمج .. قلت ايه ..
انا بس قلت ايه الا هبو كلهم ... حطوا الستاره .. وجابوا صينيه المشارط والمقصات وجاء الدكتور وكنت اشوف بس راسه .. كنت احس باصابع رجولي حزتها ... وحسيت بمثل وخزه شوكه او ابره خفيفه على بطني ... شي بسيط
وجاتني حاله حزتها ... قعدت اصارخ دكتور انا احس برجولي لحظه لا تشقون بطني ... والدكتور ماعطاني وجه خخخخ .. هم نظامهم ... ان من الستاره وفوق ... يعني الجزء العلوي مسؤولين عنه دكاتره التخدير ...
ومن الستاره وتحت مسؤولين عنه دكاتره التوليد ... مالهم خص في الي فوق ... الا لو لاسمح الله النبض او الضغط انخفض..
قالت لي الممرضه وش تحسين فيه ... قلت لا يشقون والله احس .. قالت انتي لو تحسين كان الحين طرتي سابع سما ورجعتي .. الدكتور شق 4 طبقات الحين ... هي قالت جذي وانا جاتني نفاظه ... جاتني حاله هستيريه ... اقولهم انا مااقدر اتنفس بمووووت .. وقعدت استفرغ وتعبت عليهم ... على طول عطوني ابر للتوتر ومهدئات ... والحمدلله هديت لكن تمت النفاظه فيني لين اخر العمليه ..
مرت كم دقيقه الا واسمع صياح بنوتتي فدتيها ... كان شعور حلووو ... اقل من دقيقتين وسمعت صراخ البنوته الثانيه ... حمدت ربي وجانتي الصيحه من الفرح .. الحمدلله رب العالمين ..
باقي الوقت طبعا كان لخياطة الجرح .. لكن اخر شي الدكتور طلب كاميرا يبي يصور الحبل السري ...
يقولي الحبل السري منعقد عقده قويه جدا .. الحمدلله اني ولدتج ولا كان ممكن في اي لحظه تنفجر المشيمه الحمدلله رب العالمين ... يقول انا عشان جذي هذا النوع من الحمل ما انتظر عليه اكثر ... هذي احد مخاطر الحمل التوامي الي يكون في كيس واحد ومابينهم غشاء فاصل ...
عقبها ودوني النقاهه لساعتين ... وبعدها نقلوني للعنايه .. تميت فيها 24 ساعه ..
بعد الولاده بكم ساعه جاء الدكتور يكشف علي ... وشاف ان عندي نزيف :44: ... وكان يضغط على بطني وشاف انه لين مو يابس ... وبسرعه جابوا لي ادويه وابر وتحاميل ... يقول لازم البطن او الرحم بالاصح يكون يابس دليل انه يلتم ويرجع لوضعه ...
بعدها بكم ساعه كشفوا مره ثانيه والحمدلله تحسن النزيف وبطني بدى يصير ايبس ...
كنت اعاني في ذاك اليوم من العطش الشديد ... كاني في صحرا والله ... اخر شي كسرت خاطرهم وجابولي شاش مبلول وقالولي بس رطبي فيه شفايفج الماي ممنوع... والله كنت شوي واحط الشاش في فمي من العطش :09:
طبعا الم العمليه مايحتاج اتكلم عنه .. الحمدلله على كل حال ... ان شاء الله كله اجر ... بس ثاني يوم لما قالولي ابتدي امشي هني خلاص كنت بموت من الالم ... لدرجه كم مره اغمى علي من الالم ماكنت اقدر اوقف .. .
لكن الحمدلله بعد كم محاوله والمسكنات الي عطوني اياها قدرت اقوم وامشي بصعوبه شديده ...
بعد ماقضيت ال24 ساعه .. الحمدلله نقلوني للغرف فوق وطلعت من المستشفى بعد 5 ايام ..
والحمدلله هذي قصة ولادتي ...

الي ابيكم تستفيدون منه هو ...

-اذا كنتوا من النوع الخواف وتحسون نفسكم بتتعبون من البنج النصفي ... اطلبوا مهدئات من البدايه ... او اطلبوا تنويم <<<< تنويم مو بنج كلي ...
-حاولوا تجهزون في بالكم ادعيه تقولونها وقت الولاده ... لا تضيعون على نفسكم هالفرصه...
-بعد العمليه حاولوا تحركون رجولكم وانتوا في السرير .. او انكم ترفعون الحوض شوي لفوق وتحت ... كانت الممرضه تخليني اسوي هالحركات وتقول لي هذا مثل التمرين ... لان اول يوم مايمشونكم ... ثاني يوم بعد ما يشيلون القسطره تمشون ...
-ثاني يوم وقت المشي .. اطلبوا مسكن قبل فتره .. وجربوا تنزلون من الصوبين ... لان في جانب يكون الالم فيه اقل من الثاني ..
-بعد مايطلعونكم من العنايه .. كثروا من الماء كثر الامكان ... لحد يقص عليكم ويقولكم لاتشربون ماي والبطن ينتفخ والكرشه تطلع ومادري وشو ... كثروا من الماء والسوائل كثر ماتقدرون ... بس تكون حرارتهم فاتره مو زينه الاشياء البارده
-حاسبوا من تحجر الصدر ... انا كل يوم كانت تجيني حراره من هالسبب ... لين صرت احط كمادات ساخنه على صدري واحاول ارضع او اشفط ..
-الجرح بعد يومين من العمليه بيخلونه مكشوف ... لا تحطون عليه شي ... فقط اغسلوه بالماي .. وممكن تستعملون المسحه الطبيه ... وجففوه عدل ... واستخدموا فوطه صغيره تكون قطن 100% .. حطوها على الجرح ... هذي نصيحة ام زوجي بعد عدة تجارب لولادات قيصريه ... انا اخر يوم الممرضه قالت لي ما يحتاج فوطه خلي الجرح يتهوا وخليته يتهوا على قولتها ... لكن مع جونا الحار كنت استحر احيان والجرح يرطب ... انتفخ الجرح علي وكان يألمني وايد ... فأنتوا استخدموا الفوطه بس شيلوها وقت النوم .. او في وقت تكونون فيه لحالكم في الغرفه شيلوا الفوطه وهووا الجرح ...
-بالنسبه للكتاكيت .. نصيحه عطتني اياها عمتي جزاها الله خير ... هي عندها توام اولاد الحين شباب ماشاء الله .. تقول خلوا شغل التوائم دوم مع بعض ... يعني الرضعه مع بعض التبديل في نفس الوقت وتغيير الحفاظ في نفس الوقت ... وسبحان الله تقول حتى لما يوصخون الحفاظ يصير وقتهم مع بعض ... هذا عشان مايكون كل يومكم في تبديل ورضاعه وما الى ذلك... نظموهم مع بعض عشان يصير لكم وقت ترتاحون فيه ...


هذا الي عندي ... اتمنى اكون افدتكم ... وعقبال ماتولدون كلكم بالسلامه وتفرحون بكتاكيتكم يارب

اختكم

نمـــوووله

مرحبا بنات ...

مبروك عليكم التجمع الجديد ومبارك عليكم الشهر الفضيل

بنات وش دعوى مافقدتوني بس لازم اصير اخصائيه نساء وولاده مو شرايين زوجها استشاريه خلاص انا ابصير اخصائيه

عشان لافقدتوني تدورون علي

سبب غيابي اليومين الي طافو ولدي الله يصلحه جاء يركض عند دورة المياه وكان فيه شوي مويه زحلق على راسه وصرخ انا جيت اركض

ناسيه اني حامل بس كان ابوه نايم بالغرفه وخفت يقوم ويعصب على انا جيت مسرعه ومادريت بالماء عاد مشاء الله علي

زحلقت وبتعدن رجليني وجلس عاد بنات والله اني تألمت كثير وبدا يجيني طلوق وامس كله وانامااحس بحركة البيبيات الصراحه

امس خف ومن طحت وانا منسدحه الى اليوم وانا مرتاحه مره عاد اليوم الحمد لله تتقرريبا العصر بديت احس بالحركه على شوي شوي

بس العجيب يابنات الحين احس بألم بظهري كأنه مضروب بالساطور من عند الوسط والجلسه تتعبني واحس بحراره بأخر الظهر



يارب يارحمن يارحيم تمم علينا بخير ونوصل بأذن الله للتاسع يارب كما اكرمت علينا بالحمل اللهم اتمه ياحي ياقيوم

الحمد لله على سلامتك اختي نموله والله يكون بعونك انا مجربه من قبل الولاده القيصريه اللهم اجرنا يارب

الله يقومك انتي وبناتك بصحه وسلامه يارب وتشوفينهم ***** الله عرايس

نموولــة قشعرتلي جسمـي من وصــفك!!
الله يسـعدك يارب..
والحمدلله على سـلامتك وسـلامـة البنوتات..
الله يقر عيتنك بشووفتهم..
وعقبااال ماتزوجيــهم ان شاء الله..
--------------..
عيوون ولدي..
سلالالامتك ياقمــر.,.
الله يهديك بس !!
قهرتيـني ليش تجري يعني لو سرعتي بيتغير شي لكن نقول الحمدلله عدت على خير..
وريحـي عمرك ولاتعملي مجهووود ابدااااااااااااا.
وماتشوووفي يارب..

والله يتمم لنا على خير ياارب..

الحمدالله على سلامتك وسلامة البنوتات ويتربون بعزكم ان شا الله

صراحة قصتك تخوووف خاصه سالفه العقدة


الحمدالله ماتاخرتي اكثر من كذا


بس انتي حملك طبيعي ولا منشطات ؟