قصة ولادتي
بسم الله ..........الحمد لله على كل حال قدر الله وماشاء فعل
بداية مشكلتي في نهاية الشهر السادس في الاسبوع 27 نزل علي دم واستمر نزول الدم علي بالرغم من ان كل الفحوصات سليمة جدا حتى عنق الرحم ماهو مفتوح لكن سبحان الله ما ادري وش العله
زادت المغص معاي وكان في البداية في اسفل البطن في الوسط وصار الالم في الظهر والبطن
رحت لدكتور وصرف لي ابرة الرئة وابره تثبيت تحسبا لاي ولاده مبكره
وفي بداية الشهر السابع بالتحديد بعد مرور 5 ايام في السابع كنت نايمة وفي الصباح الساعه 7 مسكتني رجفه في جسمي كله حتى اسناني صارت تطلع صوت من كثر الرجفه واحس ببرد شديد بالرغم ان المكيف الحار شغال وعلي بطانيه ولابسه لبس ثقيل بس احس ببرد شديد واستمر الحال ساعة كامله وبدا المغص كل 8 دقايق يرجع لي منتظم كلمت اختي لاني عند اهلي من بداية الحمل واتصلت على امي في المدرسه و على طول على المستشفى الطوارئ
كشفت علي الدكتورة من تحت قالت الرحم مفتوح 2 سم وقلت لها كيف عرفتي قالت : الربط مشدود مره وهذا يدل على توسع
وقالت لي لازم نفك الربط علشان ما يحصل تمزق لعنق الرحم
طلعوني على التنويم وحطو لي جهاز الطلق ونبض الجنين وبعدين جاء الدكتور قال الطلق ماهو قوي وارسل لي الدكتوره تكشف من تحت وجات وكشفت وقالت لي خلاص على غرفة الولاده بافك الربط وانا هنا خلاص حسيت بالموت والرعب والخوف
دخلت غرفة الولادة وجابت الاداة اللي تفتح فيها بوز البطة وقالت لي استرخي حاولت استرخي و بدات الشغل بس لما شافت الوضع قالت لي ما راح افك الربط باعطيك فرصه ثانية حتى نخلي الجنين اكبر مده ممكنه في الرحم
ورجعت للتنويم والطلق يروح ويجي كل 8 دقايق ووصوني اني لما يصير لي اي شي استدعيهم طبعا ما اعطوني ولا شي يوقف الطلق لاني كنت اخذ يوتوبار ولا جاب اي نتيجه معي ........وخلوني تحت رحمة الله الين جات الساعة 2بالليل وقمت من سريري باروح الحمام واحس بشي ينزل مني ثقيل وبطئ ولما مسحت بالمنديل كان دم كثير
وعلى طول استدعيت الممرضة وجاء الدكتور المناوب وكشف علي قال الرحم مفتوح 3 سم طبعا الربط باقي موجود
وعلى طول على كشك الولادة تجمعو الاستشاريين علي وقرروا فك الربط الساعة 7 صباحا
طبعا جاء الدكتور الاستشاري وفك الربط في لمح البصر ما حسيت بشي ابد لاني انا استرخيت بقوه وبالفعل فادني الاسترخاء و وراني الخيط وكان في جزء منه مسود من الدم اللي كان ينزل مني على فترات
طبعا لما فك الربط اختفى الطلق وصار خفيف وخلوني في غرفة الولاده تحت الملاحظة لو وقف الطلق يطلعوني على التنويم ولو زاد الطلق يولدوني
ومن الساعة 7 صباح الى 12 والطلق يروح ويجي وانا ما قدرت انام لان كل شوي دكتورة تجي تشوف كم فتح الرحم وبصراحة حققت الرقم القياسي في الكشف من تحت اه اه اه رحمتك يارب
زاد الطلق عندي والرحم فتح 5 سم وانا خلاص تعبت مسدوحه على ظهري والمغذيات في يدي من الساعة 2 بالليل وصرت اقول لهم ابغى قيصري خلاص تعبت على مسؤليتي خلاص ماني قادره اتحمل الرحم ماهو راض يفتح بسرعة طبعا كل هذا ومشبك على الاجهزه حقت الطلق ونبض الجنين
اذن العصر جات الدكتوره تكشف قالت بافك موية الجنين لان الرحم صار فاتح 6 سم فكت موية الجنين ونزلت مويه قليل بس قالت لي موية الجنين مره قليل
و قالت لي لو مافتح الرحم بعد ساعة راح اعطيك طلق صناعي وبالفعل يعد ساعة كان 6سم ما تغير اعطتني في المغذي طلق صناعي وبعد ساعه بدات الالالم تزداد والطلق يشتد جاء الدكتور الثاني وجو الممرضات وجابوا الحضانه للطفل
جاء الاستشاري وقال ابكشف لقى الرحم 7 سم قلي خلاص الطلقة الثانيه حاولي تدفعين وانا تحت رحمة الله ورحمه هالدكتور وهو واقف فوق راسي قال ابكشف مره ثانيه طبعا انا كنت شبه ميته لاني تعبانه مررررررررررررره من الليل وانا في عذاب ولما زاد الطلق دخل يده يكشف في وقت الطلق وبعدين ماعاد خرج يده من الداخل قال لي راح اخلي يدي للطلقه الجاية علشان اساعدك في خروج الجنين وجات الطلقه وهو يوسع من الداخل وانا ادف (رحمتك يارب ) تخيلو الموقف معاي كل هذا واصابع الدكتور بالداخل وجات الطلقة الاخيره وانا ادف والدكتور الثاني معاه المقص وابرة البنج علشان يوسع ما امداه يوسع الا الجنين قد طلع وعلى طول على الحضانه وسمعتها وهي تبكي وحمدت الله على كل حال
كنت احسب اني انتهيت من العذاب بس كان لي قصه اخرى مع المشيمة اللي لصقت ورفضت الخروج ملتصقه حولوني بعدها على العمليات علشان يسون لي عملية تنظيف ودخلت غرفة العمليات وتخدرت تخدير كامل وفي اثناء العملية صار لي نزيف وبعد الافاقه ركبوا لي دم علشان النزف اللي صار اثناء العملية والحمد لله جلست 3 ايام بالمستشفى وخرجت بعدها
طبعا هذه كله ما شفت احد من اهلي 21 ساعه وانا في كشك الولاده واهلي وهل زوجي عند الباب ينتظروني وزوجي جاء بالسيارة من الجبيل للطائف ما لقى حجز
في اليوم الثاني شفت اهلي وزوجي وانا انفجر ابكي ابكي ابكي حسيت قلبي بيتوقف لاني عانيت مرررررررررره
واحمد الله على ماقدر وماشاء
وبنتي الان في الحضانه اوضاعها مستقره بس وزنها قليل كيلو 110 جرام الله يلطف بها ويرحمها ولا يحرمني منها ولا يضيع تعبي
وهذه قصتي اتمنى من العلي القدير انه ما احد يمر فيها وان يرزقكم الله الحمل الكامل والجنين المعافى ويرزقكم برهم وصلاحهم ..............امين
قصة ولادتي
بسم الله ..........الحمد لله على كل حال قدر الله وماشاء فعل
بداية مشكلتي في نهاية...
شكرا يا ست الكل على الدعوه الطيبه ربنا يسعدايامك ويكملك على خير يارب
فيكتوريا
ياحبيلك يا فيكتوريا لسه شايفه رسالتك ورديت عليك ياقمره ومنتظراكى تيجى تنورى مصر