مسسساء الخيررر يالمربوطاات
بلابل ‏-امي سر سعادتي ‏-مبرررروك عليكم الثامن وعقبال التاسع
هنوده-مبررروك حبيبتي عليك السادس وعقبال التاسع
انا كيفي-الف الف مبررروك والحمدلله على السلامه
بااااقي الكروشااات اخباركم

طبعا تفاصيل ولادتي كل مااتذكرها ابكي مدري ليه ... طبعا انا مقرره اني مااعلم احد بس زوجي لان امي راعية سكر وضغط مالي داعي اروعها من فكيت الربط وهي تتصل علي يوميا من 5 الى 6 مرات فمابالكم اقولها رحت المستفى اولد

انا مشيت كل الرياض شبرتها تشبير وسبحان الله ماولدت الين كتبه ربي
بدت رحلتي للولاده تاريخ 12 /10 الساعه 10 الليل جاني الله يكرمكم اسهال مع مغص انا توقعت ان الموضوع براد طنشت الموضوع الين الساعه 12 بالليل المغص مستمر بس راح الاسهال
كنت لحظتها ببيت اهلي دقيت على زوجي قلت ابي ارجع البيت لاني احس نفسي تعبانه ابي انسدح وانام
وفعلا جاء زوجي وخذني وامي تقولي وجهك مهوب طبيعي سبحان الله كنها حاسه وانا مادريت ان هذي لحظات ولاده وبداية الطلوق
رجعت لبيتي دخلت غرفتي انسدحت ماقدرت انام من الالام ببطني والالام بسيطه باسفل ظهري كانه سكاكين بظهرك
طلعت للصلاة جبت موية وقريت فيها وشربتها
بديت اشك لان الالم استمر الى 3 الفجر حسيت ان الوضع مو تمام
زوجي كان نايم وراه دوام
رحت اشيك على شنطتى وعفشي واكلت لي 3 تمرات وصارت 7 تمرات جاني جوع غريب
رحت انسدحت ابي انام ماقدرت جاني شعور خوف وترقب مدري وش فيني والالام كل مالها تزيد وانا اتقلب بالسرير اذن الفجر جاني انشراح كبير كان احد يقولي قرب الفرج
قمت توضيت وفرشت سجادتي وكبرت وصليت
وهنا بدى الاكشن
ركعت وبعدها عجزت اوقف جتني ضررررررررررربه بظهري خلتني لاشعوري اصرخ وغرقت عيوني
قطعت صلاتي على الطول انسدحت ماعرفت اسوى ولا شي
قام زوجي جاني يركض وشفيك وشفيك وانا قاعده ابكي اقوله مدري وش فيني هو عرف انها ولاده قام يسمى علي وجاب لي كرسي قالي صلي وادعي ربك يفرجها
راح هو توضاء قالي بروح اصلي مسكت يده ماتخليني قام يهدني
وفعلا كمات صلاتي وانا بالم ربي يعلمه
دعيت فيها من كل قلبي
من الساعه 5 الفجر وانا الالام معاي مرى تشد ومره ترخي
وجهي ولساني تغيرت لونهم
رحت انسدحت بالسرير ماابي اروح الين احس انها فعلا ولاده واني ماابي احد يحوس فيني
قعدت اتقلب مثل الحيه بالسرير اتلوى من الالم وبصراحه كان ظهري اقوى بكثير من المغص
طبعا زوجي ماراح للدوام قعد معاي يوم صارت الساعه 9 ونص الصبح خلااااااص ماقدرت ظهري شد معاي وصل لرقبتي من كثر ماهو مشدود
لبست ملابسي وعباتي وتوكلت على الله ورحت دله طبعا انا من الخوف مااخذت لاشنطتي ولا شي حتى زوجي انخرش مسكين
وصلت المستشفى شافتنب النيرس حقت دكتورتي وعرفتني وحست اني مو اكيه قالت ببلغ الدكتورة وبدخلك عليها باسرع وقت ياحبي لها هالممرضه
كان اصعب ربع ساعه بحياتي اكرهه الانتظار وانا اتالم
وفعلا دخلت عليها بالضبط 10 وخمس الصبح شافت وجهي قالت على السرير كشف
كشفت علي وقالت بسم الله ماشاءالله خلاص ولاده الرحم فاتح 4
انا هنا دوروني ماتلقوني
جاني خوف مسكت يدها وقمت اصيح اقولها انا خايفه قامت تقولي هدى خلاص بتشوفين البنوته ان شالله بالسلامه وربي معاكي وكلنا معاك
الدكتورة نادت زوجي وققالت له عن الاجراءات لحظتها انا قمت من السرير وقلت لها ابي ابرة الظهر قالت لي اوكي مو مشكله
طلع زوجي يعمل الاجراءات وانا بحالة صدمه وخوف وترقب مدري وش بيجيني
صارت اسياب مستشفى دله طوييييييييله من التفكير
قالي زوجي خلا ص روحي انتي مع الدكتورة والممرضه لفوق قسم الولاده علشان يعطوني المحاليل قبل ابرة الظهر لان لازم على الاقل 3 محاليل وهو يروح يجيب شنطتى واغراض
طبها انا قلت وبكل فخررررررررررر لالالالالالالا ماراح اتحرك الا وانت معاي بروح معاك اجيب الشنطه بنحاش من المستشفى
حاولت فيني الدكتورة وانا ربكم واحد عاد هي رحمتني قالت خليها على راحتها مانبي نخوفها ويسكر رحمها زياده خليها تروح معاك
وفعلا طلعت مع زوجي ورحت لبتي دخلت تحممت بموية دافيه وطلعت اكلت تمر وقعدت اقرا ورد الولاده
رجعت للمستشفى ودخلت بالضبط 12 وربع
سبحان الله يابنات هاللحظات يجيك احساس غريب جداااا
رقيت فيه ولقيت دكتورتي مستقبلتني هي ودكتور التخدير حق الابره والممرضات فتحو الباب لي حق قسم الولاده
اول شي قلت بسم الله واستودعت نفسي وبنتي وزوجي وكل شي غالي عندي
دخلوني الغرفه وغيرت ملابسي وعطوني الحقنه وبدا المشوار
حطو لي المحلول الاول الساعه 1 الظهر ودقت ساعات الانتظااااار
خلصو المحاليل الساعه 3 وربع وجاني دكتور التخدير كان روووووعه مصري اسمه خالد يده خفيفه ماحسيت بالابره ابدا
انا هنا فرحت كثير اني برتاح من الالم مرت الدقايق الجايه حلوة ماكان فيه الالام ومبسوطه على الاخر بس الصدمه ان دكتورتي جت الساعه 5 العصر تكشف لان الممرضه شكلها شافت شي وراحت لها
كشفت وقالت ان الرحم مافتح ولا شي 4 سم من الساعه 10 وبدت دقات قلب البيبي تضعف
فلازم اعطيك طلق صناعي وبعد ساعه نفتح موية الراس طبعا قعدت اذكر الله وادعي الله يحفظ بنتي وزوجي طبعا معاي بكل خطوة رحت كلمت اختى اكبر مني وحلفتها ماتقول لامي اني بالمستشفى والله يخليها لي ربع ساعه وهي عنده بس تقرا علي وتسمى
هنا الدكتورة رجعت كسفت بعد ساعه نفس الحكايه الرحم مافتح فهنا اضطرو يوقفون مفعول ابرة الظهر وانا اقولها لا تكفين قالت لي اسفه مااقدر صحة البيبي اهم لازم الرحم يفتح وفعلا هي كلامها سليم
واه ثم اه من الطلق الصناعي وهاتك الااااااالام وصياح وونونه وجهي تقلب الوانه وكل شوي كشفت وياقالبني يايمين يايسار علشان الرحم يفتح ويقوي الطلق وفعلا الساعه 7 و8 الرحم قاعد يفتح بشكل كويس الين الساعه 10 فتح الرحم 10 مع الالام لاتوصف
جتني الدكتورة قالت خلاص غرفة الولاده لحظتها انا لو يسون فيني الا يسون ابي ارتاح
دخلنا غرفة الولاده وانا اسمي وادعي
بدت لحظات الدفع
امي الله يخليها لي كان تقولي كيف قوة الدفع بس انا ماتوقعتها تحتاج لقوة كبيييييييييييييييييييييرة مو اي دفع
وربي اني مت مت مت الف موته الغرفه ماادري فيها احس اني بعالم ثاني بس اسمع همس زوجي يقولي يالله هانت والدكتورة تنادي انا بفتح عيوني عجزت من قوة الالم الدفع
الساعه 10 ونص سمعت صوتها سمعت صيحتها فتحت عيوني لقيتها بحضني قعدت ابكي ابكي ابكي ماني مصدقه شفتها ماني مصدقه شفتها بعد 3 سنين بعد 9 شهور ربط اللهم لك الحمد والشكر
سميتها غلا وكانت من اروع لحظتها وهي بحضني وفتحه تطالعني تبكي واذا سمعت صوتي تسكت
الله لايحرم الجميع من هاللحضات الرااااااااااااااائعه
ويرزق الجميع الولاده السهله من رب العالمين

مساءالخيرات والليرات هلا وغلا فيييك

اختي ام غلا والله لك وحششششششه حييييييل

الله يبارك فييك يالغلا واللهم آمين ،،

والله يخليك للعروووسه وتفرحي بصلاحها ..

تقديري لشخصك الكررريم ..

مساء الخيرات اختي ..

الله يبارك فيييك واللهم آمين ..

عن نفسي الحمدلله بخيررر وعافيييه ..

وانتي كمان مبروووك الشهر الثامن وعقبال

فك ربط و ولاده سهله وميسرره ..

هلا وغلا في هالطله

اخبارك يالغاليييه واخبار العروسه

الله يبارك فيك اختي .. يسلموو كثيرر على

الإفاده تعرفين ليلى مو مؤيده ابد لليوتبار

وراح اشوف ايش تقولي في مراجعتي آخر

الشهررر .. والله يعطيك العافيييه تقديري

لشخصك الكررريم ..