صباح الخيرات بنااات..أميره توكلي على الله وخذي الدم وربي يسهل أمورك..

معليش بنات ماراح أرد أخاف يقفل النت ..توي مسويه قائمه بالتجهيز وحبيت أكتبها هنا وهي مو مرتبه واذا ناقص شي ذكروني..جمعتها من كذا موضوع وأخذت اللي أحسه ضروروي...وتذكروا ان الاستعداد الجيد يريحك نفسيا قبل وبعد الولاده ويسهل الأمور عليك وخاصه للي نفاسها في بيتها..

بالنسبه للبنات اللي يقولون تجينا هدايا عني أنا ماراح يجيني شي عارفتهم وخابزتهم والصراحه مبي يجيني هدايا عينيه لأنها ماراح تعجبني ولا حتصير على المواصفات اللي أبيها ان كان فيهم خير يهدوووني فلوووووس بس هذا اللي أبيه وكثر الله خيرهم...

القائمه اللي كتبتها مو مرتبه كذا مالي مزااج تحملوا..

أولا ببدا بغرفة البيبي..طبعا السرير والدولاب وطاولة الغيار والبانيو (أحبذ اللي بالستاند وتحته مكان لأغراض التروش ) وكرسي مريح لك هذي الأشياء الأساسيه..

1- السرير..يحتاج طقم مفرش للسرير+مشمع يحط على المرتبه عشان الحمايه من البلل+مخده لتصليح راس البيبي +لعبه تنحط على راس السرير+لمبه سهاري على السرير أو بالغرفه+كاميرا تتركب على السرير لمراقبة البيبي(عندك نامس لاتنسين آرس السايل اشبكيه بالكهرب <<وحده متغربله من الناااامس)

2- الدولاب..رتبي الملابس فيه ونصيحه استخدمي الصناديق أو السلال للترتيب أحسن من التصفيط لأنه يدوش وكل مره بتخربين ترتيب الملابس وتعيدين تصفيطها..علقي الملابس الخارجيه والفنايل الداخليه حطيها بصندوق وافرزيها على حسب العمر كل عمر وله صندوقه والشراريب والقفازات والقبعات كلها حطيها بصناديق صغيره وكل على حده(عندكم محلات أبو ريالين خمي من الصناديق الكرتوون طبعا أشكال وأحجام على كيف كيفك)المهادات القطن كلها بصندوق..اللفات الخارجيه بصندوق أو صفطيها مو مشكله لأنها قليليه..وفوط التجشوء حطيها بصندوق لحالها..طريقة الفرز تريحك اذا عندك شغاله مفهيه..الجزم رتبيها بصندوق برضو..

3-طاولة الغيار..أولا أكيد راح يكون فيها أرفف تحت اذا مفتوحه الأرفف حطي سلات اللي بالقمااش ترا شايفتها عند أبو ريالين صح مو حلوه مره بس تبدلين كل فتره مره سلال ومره صناديق أنتي وذوقك..واذا دروج مقفله خلاص رتبي الأغراض مباشره..أولا البامبرز أول بأول كل ماشريتي كيسه فضيها ورتبيها بالدرج عشان يسهل عليك الاستخدام عند التغيير وحطي صندوق فيه أغراض التغيير مثل كريم الحفاض(سودو كريم)+قطن للتمسيح للأيام الأولى من الولاده+مناديل مبلله وياحبذا اللي بالزيت أنعم على بشرة الطفل هذي للطوارئ أو للخروج مو لكل غيار +بودره برضو تبادلين بين البودره وبين الكريم ماتحطيهم سوا<<الكلام للبكريات..صحن مقعر بلاستك صغير عشان تحطين فيه المويه للتمسيح وبرضو للأيام الأولى بعد الولاده مقياس حراره..صندوق ثاني للأدوات بعد التروش حطي فيه اللوشن وكريم الوجه وأعواد القطن وزيت الجسم وقصاص الأظافر وفرشة شعر وشفاط أنف ..حطي فوط التروش اللي بالراس بصندوق لوحده وفوط الغيار اللي من غير راس بصندوق ثاني لوحدها..ممكن تحطين فوط للوجه مع اني أشوف ان مالها داعي..أكياس للحفايض بعد التغيير..أول الأيام بعد الولاده أحس صعبه الوحده توقف مده طويله بتدوخ أفكر أحط كرسي مرتفع زي كرسي البوفيه طوله مناسب لطول الطاوله وكل ماجيت أغير للطفل جلست وغيرت له وأنا جالسه..زباله وانتي بكرامه بجنب الطاوله..

- البانيو على استاند بأرفف بلاستك تحت ترتبين فيها الشامبو والاسفنجه و2 جيك ماء بفتحه متوسطه لاكبيره ينكب الماء فجأه ولاصغيره يضرب الماء جسم البيبي..ومسند للطفل ينحط بوسط البانيو يجي مشخل أو على شكل فوطه ما أحبذ الاسفنج أحسه يجمع البكتريا..

طريقتي في ترويش البيبي وكل له طريقته اللي تريحه وأنا أرتاح للطريقه هذي..أولا أنا ماأحب أروش البيبي في الحمام ماأحبه يبكي بالحمام وبرضو برد عليه..فأروش عيالي بالغرفه أسكر الأبواب وأجهز اللوازم أحط المسند حق البيبي بوسط البانيوأعبي الجيوك مويه فاتره وأحط بالصحن شوية مويه وصابون وأحط الأسفنجه بوسطها خذي البيبي وحطيه على المسند وصبي عليه شوية مويه على كل جسمه وراسه وحاولي تبعدين عن الوجه وابدي بدعك جسمه بالاسفنجه المشبعه بالشامبو أحسن اسفنج هو اسفنج مذركير ناعم بالمره وطبيعي..ادعكي راسه وجسمه كله وحركيه شوي على جنب وادعكي ظهره وبعدها جيبي الجيك وصبي مويه وأنتي باليد الثانيه تنظفين البيبي (في الأيام الأولى تحتاجين مساعده) وبعدها شيليه وحطيه على طاولته حقت الغيار طبعا انتي فارشه عليها فوطته نشفيه ونظفي أنفه بالشفاط ونظفي أذانيه من برا بأعواد القطن دلكيه بالزيت أو اللوشن وقصي أظافره ولبسيه البامبرز وملابسه ومشطي شعره ولبسيه قبعهته ولفيه بالمهاد واللفه ثم رضعيه ونوميه..

5- الكرسي المريح لك اذا جيتي ترضعين البيبي أو تنومينه ولو يكون هزاز أفضل..

أغراض منوعه للغرفه وللبيبي وناويه أشتريها وكل وحده واللي تحتاجه:مخده للرضاعه الصناعيه ومخده للرضاعه الطبيعيه مرجيحه جلاسيه مرجيحه بالمطاط كرسي تعليم الجلوس مره عملي ومريح مشايه كرسي أكل فرشه بألعاب معلقه فوقها مدري وش اسمها عربه بس ماني ناويه أشتري عربه للصغار لأني ماراح آخذه معي برا البيت الا لما يكون فوق السته شهور فالعربه اللي ودي أشتريها تكون صغيره وخفيفه وتنفع لين ال6 سنوات..

6- أدوات الرضاعه..أولا الشنطه تكون بجيوب كثيره وتشيل كل أغراض النونو وياحبذا تكون بفرشة تغيير بلاستك ..الرضاعات تكون زجاج وحده صغيره مره خاصه بالعلاج وثانيه خاصه بالأعشاب والسكر نبات..رضاعتين 120 مل زجاج برضو البلاستك مانستخدمه الا اذا كبر الطفل وصار يمسك رضاعته بنفسه..حلمات مناسبه للرضاعات أنا أحب أغير الحلمات تقريبا كل اسبوعين لثلاثه أكره المستهلكه..مصااصه بغطا ضروريه جدا بالنسبه لي..وعاء مقسم الحليب ضروري ومريح دائما عبيه وخليه جاهز لك للاستخام مو كل شوي تفتحين العلبه حقت الحليب وتكيلين منها برضو ضروريه للخروج..ستاند لترتيب الرضاعات بعد غسلها ويحط بالفريزر أفضل أنا أحط الرضاعات بالفريزر بعد غسلها أحس أحسن من الثلاجه..فرشاة تنظيف الرضاعات برضو بعد الاستخدام توضع بالفريزر عشان البكتريا..أغطية الرضاعات القماش أحب أستخدمها برا عند الزيارات أو مراجعة الطبيب أولا لحفظ الحراره ثانيا لحفظ البيبي من عيون النااس..ترمسين ألمانيه للمويه..جهاز تسخين الرضاعات اذا برد الحليب هذي ودي فيها بس مدري وين أحصلها..

ناويه أشتري محبس بارتفاعين أحطه بغرفتي وأحط فيه البيبي اذا قعدنا بالصاله..

ماتكلمت عن الملابس لأن الكل عارفها..بس ناويه هالمره أشتري رباط للمهاد أنا عمري ماربطت عيالي بس هالمره بربط البيبي لأن عيالي أكيد بيحاولون يشيلونه أو يسحبونه فجأه خاصه الصغير وعشان يكون متماسك ومايتمزع بربطه بس اذا كان معنا بالصاله والا عند النوم أو بسريره بفككه..

أغراض الأم..

أولا الحوايج ولسه مابحثت ولا رتبت شي ولافي بالي شي..

ثانيا الأغراض الشخصيه..كلوتات استعمال واحد مشخله..سنتيانات بفتحه خاصه بالرضاعه..البانيو الصغير المخصص للتنقع بعض المستشفيات يعطونه للمريضه مجانا وبعضها لا..أحسه ضروري..شرابات قطن..كمادات للصدر..كريم لتشققات الصدر ياحبذا استخدامه من الشهر التاسع قبل الولاده..أغطية الثدي القطن..شفاطة حليب أفضل شي بالنسبه لي هي اللي يجي معها رضاعه..طبعا الأقمصه والبجايم وكل وحده وحسب حاجتها..هذا اللي في بالي مدري يمكن ناسيه شي..

طبعا زيت مقري فيه وماء زمزم مقري فيه راح تحتاجينهم اذا مغصك بطنك أو اذا تورم صدرك...أفكر أشتري صينيه بأرجل عشان الأيام الأولى آكل على السرير وأنا سانده ظهري ومرتاحه خاصه للي مسويه عمليه أحس ضروريه بس وين أحصلها..السرير اللي مخصصته للنفاس لازم تتأكدي انه مريح وقاسي نوعا ما وارتفاعه كويس عشان القومه منه ماتتعبك والمخدات اللي تسندين ظهرك عليها حجمها كويس وعددها كافي..

شنطة المستشفى عني بآخذ شنطة غيارات البيبي وأحط فيها أغراضي وأغراضه بلاش كثرة عفش..

أهم شي نجهز فيها علبة مويه فيها ماء زمزم مقري فيه أوراد الولاده والعين..وزيت برضو مقري فيه..المويه تشربينها قبل الولاده وبعدها وتمسحين فيها بطنك والزيت للبطن بعد الولاده اذا مغصك..شاحن الجوال والجوال والكاميرا..علبه صغيره تحطين فيها تمره شايله قشرتها عشان زوجك الله يحفظه يحنك البيبي واذا مايعرف يحنكه أي أحد معك والا حنكيه انتي بنفسك الله يعينك (عمري ماسويتها بأولادي بس هالمره ان شاء الله بسويها) ولاتنسين الأذان باذن المولود..

أغراض البيبي أحس الملابس مايحتاج الا اللي بيطلع بها فنيله داخليه وحده بربتوز خارجي واحد قفازات قبعه مهاد ولفه..بس ممكن مصاصه عشان يتعود عليها من يومه والبامبرز مايحتاج يعطونك في المستشفى..

لاتنسين تشتري الحليب البودره قبل ماتولدين أهم شي أول ماتوصلين البيت ترضعين البيبي أكيد اليومين الأولى ماراح يكون في صدرك حليب فلاتجوعينه بعدين تمتلي معدته هوا أنا صار لي كذا كنت أحسب في صدري حليب..

خذي سكر نبات ورضاع صغيره مره عشان تعطينه البيبي ضروري الأيام الأولى عشان الصفار اللي يجي كل المواليد الكلام هذا للي حتجلس يومين ثلاثه بالمستشفى أما اللي يوم واحد ماأظن تحتاج..

أغراض الأم للمستشفى..قميص استقبال ناعم ومفرش خفيف وناعم..سنتيان رضاعه..فرشه ومعجون أو مسوااك أنتي واللي تفضلين..كريم وجه وقلوس شفاف وماسكارا عني أنا بدون ماسكارا أطلع مريييضه..مناديل تنظيف الوجه..شبشب..شراب قطن..مرايه..فرشاة شعر..شباصه احتياط يمكن اللي بشعرك تضيع أو تنكسر..مقص مدري لأيش بس يمكن تحتاجينه..عطر هااادي لك اذا اللي بيولدك دكتوره اذا دكتور استغني عنه لأنه بيجي اليوم الثاني يشيك عليك وبرضو بيجي دكتور أطفال فاستغني عنه أفضل ممكن تحطيه بعد الولاده مباشره أول مايطلعونك لغرفتك وبعدها خلاص اذا جا من بكره يمدي الريحه راحت..

كمون مطحون..مره..ممكن مسجل فيه شريط قرآن..

بس هذا اللي في بالي أي شي ناقص ذكروني.. يارب أسوي لو نصها المشكله دائما أنوي على الشي ولا أطبق الا 40% منه..الله المستعاان

أهلين الود وينك يالدبا طلعنا عليك اشاعه انك ولدتي وكنت ببارك لك اليوووم رسمي..الله يسهل عليك ويهون عليك الولاده ..والله يعينا على الأسماء شكلي بسوي زيك بولد وأنا ماقررت اسم..أسماء البنات مره صعبه..

بنات اعذروني مقدر أرد على كل وحده مره مزفت معي النت كل شوي مقطوووع..المهم اللي عندها ملاحضات على اللي كتبته فوووق تقووول ترا أنتظر الملاحظات وفيه شي ناقص أفيدينا ..مالك الا دعوووه...وغضوا الطرف عن الأخطاء الاملائيه أنا يالله كتبته وانا أركض لينقطع النت قبل لأخلص فما عندي وقت أراجع وأصحح الأخطاء...

شابورة ... ما شاء الله لا قوة إلا بالله يتهنى فيهم يارب و ملبوس العافية...وعقبال ما تشترين له جهاز الزواج هو و اخوانه يارب

ذوقك روووعة لا إله إلا الله .....و السموحة على قلة دخولي جتني بعيد عن السامعين انفلونزا للمرة الثانية من يوم ما حملت...الحمدلله على كل حال...

بنات من عندها بنت أو ولد سنة ثانية ابتدائي ترى بنتي غلبتني بجدول الضرب تحفظه و شوي تنساه ما غير اجري وراها في البيت و اسألها لغاية ما تعبت و جتني الآم و الم فظيع في الظهر و اسفل بطني....و زاد الطين بلة دور انفلونزا ...الحمدلله كله بأجره....دعواتكم

ميمي

مادري احس التجهيزات اللي انتي كاتبتها تجهيزات بكريه والا ؟؟

خصوصا الاثاث والاجهزه مو بس اللبس ..

انا كل شي يكون بحاله جيده وغالي استخسر ارميه واخزنه وشوفي يفيدني

اثاث ماشريت شي جديد .. لان الاثاث موجود من ايام بكري من 8 سنوات وزي الفل مافيه الا العافيه

الدولاب اللي حاطه فيه اغراضه حق ولدي الكبير .. والسرير عندي خشب حق بكري برضه بس ماركبته لاني اول 4 او 5 اشهر احطه في السرير الصغير

ماشريت الا السرير الصغير وكان عندي واحد .. بس المشكله العمال حقون شركة التخزين كسروه وهم يطلعوه من المخزن لما جينا من كندا ..

عشان كذا اضطريت اشتري ..

عندي الجلاسه بالكهربا هزازة << من ايام بكري برضه وتشتغل زي الفل ..

كرسي الطعام .. وشغلات كثير ..

الملابس طبعا اشتري اكيد من كل شي .. لاني ماحتفظ بكل ملابس الطفل اللي تصغر عليه .. فقط اللي تكون غاليه ومااهترئت بالغسل واللبس ..


يعني اتفاجات لما قريت كلامك ..

خصوصا ان عندك ( ماشاءالله تبارك الله ) 3 اطفال الله يحفظهم واصغر طفل عندك 3 سنوات تقريبا بعمر بنتي .. كل مره تحملي تشتري العفش ذا كله ؟؟ طيب بعدين وين تصرفيه ؟؟

مادري بس حرام والله غالي الاثاث والاجهزه وتكلف حرام كل مره اصرف وارجع اشتري ؟؟؟


عموما .. التجهيز اللي كتبتيه بشكل عام حلو .. وطريقة ترويشك نفس طريقتي مااروش بالحمام ..