بحكيلكم اللي بقلبي بدون مقدمات ويشهد الله علي أنكم مثل خواتي وأحبكم حب مايعلم فيه الا الله
وما قررت أكتب هالموضوع الا لأني عارفه أنكم بتوقفون معاي بالكلمه الحلوه والدعوه الصادقه من قلوبكم الطيبه
أنابقول قصتي بختصار انا انسانه تعذبت كثير بحياتي وصارت لي مشاكل كثيره منها دراسيه ومنها مشاكل اجتماعيه ومنها مشاكل عائليه
وكنت دائما الجأ لربي بكل وقت وأدعي ربي يصبرني ويفرح قلبي بيوم من الأيام
أنا الحمد لله أمي وأبوي عايشين الله يطول بعمرهم ويعاملوني أحسن معامله ولله الحمد لكن اللي مضيق صدري أن كل صديقاتي تزوجوا وكل قريباتي بنات عمامي وبنات خوالي اللي أكبر مني واللي أصغر مني الله يوفقهم يارب
وأنا ولا حتى احد فكر يخطبني ولا حتى تلميح
اللهم لا اعتراض وربي اني عارفه انه نصيب وهذا اللي الله كاتبه
لكن دائما تدور براسي أسئله كثير اقول ليش كلهم يقولون.....
أنت أحلى وحده ؟؟
أنت مشالله اجملهم ؟؟
أنت مشالله ذكيه وأحسنهم دراسه ؟؟
أنت حبوبه وعلطول مبتسمه ؟؟
و....و.....و..... والكثير كانوا يقولونه لي
وأنا بيني وبين نفسي أقول ليش هم تزوجوا وأنا ولا احد فكر فيني مع ان كل وحده فيهم اللي يخطبها ثلاثه واللي اربعه واللي خمسه وهم مافيهم ربع اللي فيني من جمال واخلاق وربي العظيم ما اقولها غرور ويشهد علي الله لكن هذا كلام خالاتي وعماتي:(
واللحين كلهم تزوجوا وعندهم أطفال
والله مابقالي أحد دائما وحيده دائما ابكي
كل ما اتصل على وحده من صديقاتي تقولي والله مشغوله بالحملواللي ولدها تعبان و.......و,,,,,,,,,
وأجي اتصل على من بنات عمي اقولهم بنتجمع مثل أول ويتعذرون اللي تقول بتطلع عن أهل زوجها واللي سلفتها عازمتها على السهره
وحتى أعز صديقاتي كانوا يكلموني كل يومين تقريبا وصاروا مايكلموني نهائي بعد الزواج وانا أكلمهم من فتره لفتره
والمشكله أني كل ما اكلم وحده تقولي وينك يالقاطعه ماتتصلين :(
وهم ما يتذكروني حتى برساله يسألون عن اخباري والا حتى دعوه حلوه يفرحوني فيها علشان لما اقراها أقول يــــــــــــــــــــــــــــــــــــــــــــــــاااااااااا رب
واللحين مابقى لي الا الانترنت أضيع وقتي فيه
كرهت كل شي صرت ما اجلس عن احد
حتى لما يتجمعون خالاتي ما اجلس مع بناتهم لان اللي اكبر مني متزوجات واللي بعمري متزوجات وانا انحرج اجلس معهم واتضايق لاني احس اني غير عنهم
ولما ابغى اجلس مع اللي اصغر مني بالعمر ثلاثه وكلهن مخطوبات وهن اصغر مني اللي بثلاث سنين واللي بأربع سنين وكل كلامهن بالتجهيز للزواج وايش اشترن وايش فصلن من ملابس
وأنا وربي تخنقني العبره أبغى افرح مثلهن
أبغى يكون عندي اطفال وأسولف معهن واقول زوجي جاء وزوجي عمل وأولادي قالولي:(
والله يوفقهن ويسعدهن ياااارب والله العظيم اني اتمنى لهن السعاده من كل قلبي هن وكل مسلمه ياارب
أنا أدعي ربي بكل صلاه أن الله يسهل أموري و يوفقني بحياتي ويرزقني الرجل الصالح والذريه الصالحه
لكن اتمنى من كل خواتي اللي مالي غير الله ثم هن ان اللي تقرأ موضوعي تدعيلي من كل قلبها
الله يوفقكم ادعولي لو بس تكتبون لي كلمه تفرحني وتمسح دمعتي والله ان الكلمه الحلوه ماتتخيلون وش كثر تأثر فيني
ياااااااااااااارب ياكريم تفرح قلب كل بنت من بنات حواء قرأت موضوعي وترزقها السعاده بالدنيا والاخره يااااارب ياكريم
أدعولي أن ماتنتهي الاجازه الا وأنا عند زوجي :)
<+><+><+><+><+><+><+><+>