آآآه.. نفذ صبري!!😢

السلام عليكم أخواتي..
بخبركم عن مشكلتي مع زوجي اللي اعتبرها مشكلة بسيطة لكن فعلا اتمنى لها حل..
بصراحة زوجي لا يعطيني مصروف..وأعلم أن البعض مثلي وعادي عنده.. وأنا كأي إمرأه اتمنى معي ولو مبلغ بسيط إذا طلبت شي أو احتجت شي..
أغلب الأحيان إذا رحت عند أهلي أكون مفلسة..ولا عندي شي ..وانحرج اذا اتفقنا أنا وأخواتي نطلب من برا حلا أو أي شي ودنا..
وإذا طلبت زوجي يقول مايحتاج تحطين معهم..سووا في البيت..واحنا كثيرين اذا تجمعنا.. وما ودنا نكلف على اهلي بشي..في النهاية لنا ولعيالنا..
نادرا يعطيني بعد حن و زن بالقطارة..يعني ١٠٠ او ميتين..
اقول خير وبركه..مع انها ولا شي عند راتبه ماشاء الله وظيفته مرموقة جدا وعنده تجارة ..ودخله ممتاز ..
يقول هذا كله لكم انتي وعيالك..نشتري فله ونأثث أفضل شي و و و ...أماني كثيره يكررها علي ..ولا صار شي..ومازلت كأني فقيرة..بعض السنوات قبل عيد الفطر بصراحة ما استحمل واسوي مناحة..ودي بملابس جديده وكشخه..مع انه يقول عندي كثييير والدولاب مليان البس منهم..مايدري اني اكررهم من سنين..صرت استحي من عائلتنا في التجمعات ..اكرر دااايما نفس اللبس..بس في العيد ما اقدر..ودي افرح زي باقي الناس..كان يشتري لعياله وانا يقول مايحتاج..مدري ليه مايهمه امري..اقول له احنا ولبسنا وكشختنا في وجهه..يعني بيتضح للقريب قبل البعيد انه بخيل معنا..واحسه يتفاعل شوي..بس مايظهر انه تأثر..
أحاول أظهر لأهلي اني مرتاحه ولا مقصر معي ماديا..إداريه وأغطي عليه ..كل شي إلا سمعته عند أهلي وأهله..وهذا احتراما له..حتى هو مقدر مني هالشي..ويدري اني اغطي عليه..
السوق ما أروح الا في السنة مرة فقط..والله ما أبالغ..وإذا رحت أي وقت ثاني يكون لعيالي واغراضهم اللي يمكن مره او مرتين اشتريها في السنه..قبل عيد الفطر ..وقبل المدارس.. حتى الشتويه بعض السنين ما يودينا نشتري جديد...كلها من القديمه..ولو كانت صغيره على عيالي يقول عادي غيرهم مايحصل ..
وما أقول شي..الحمدلله على كل حال..وأمشي اموري بالغصب...
اقول خلاص يعطيني وراح اطلب وماراح ازعجه بالطلوع كل ما احتجنا.. برضو مايوافق..عجزت اقنعه..وتعبت استلطفه..حتى أحيانا أهدده بإخبار أهله وخاصة والده..بس يهددني بأن يسوي اللي ما اتمناه...واضطر اسكت ..وأنا أعرف ايش يقصد..
صرافاتي كلها عنده..لأن فيها فلوسه..مالي حق اطالبه بشي في نظره..
حتى بقية مهري ١٤ سنه وباقي ما اعطاني ..من شروطي في عقد الزواج اذا طلبت الباقي يعطيني..
وللحين وانا اطلب ولا حياة لمن تنادي..
اذكره انه من حقوقي الواجبة يعطيني إياها ويقول عادي انا اصرف عليكم من سنوات وما اطالب ترجعونها لي..وهو عارف انه لازم يصرف وينفق علينا كأحسن مايكون..بس يستغفلني..
بعت ذهبي بمبلغ حلو..عشان ناويه اغيره..واخذ المبلغ وحطه في حساباته..يقول مايحتاج اشتري وابذر.. قومت الدنيا عليه ..هذي اخر مابقى لي.. وحاربت من اجل يرجعها واشتري لي ذهب واللي ودي فيه..ومع ذلك يسكتني بقرشين عشان لاتكبر المشكله واخرب سمعته..
ما ابغاها هالقرشين. ابغى مالي كله..اتهنى فيه..وصار يهددني بزوجة ثانية اذا طالبت بفلوسي..يقول اذا طلعت فلوسك بطلع مثلها للثانية..
وهو اصلا يبغى يتزوج وقد صارحني بهذا الأمر..ويتمنى اوافق له يسويها...مستحيل اسمح بهالامر..كأي امرأة تغار..يجمع فلوسنا ويحرمنا اللي ودنا فيه وفي النهاية يطلعها لغيرنا..والله ما اسكت له لو يسويها وهو عارف اني ماراح اسكت وراح اطربق الدنيا عليه..بس اللي يخليه يتراجع العيال..مايبغاهم يتشتتوا...نقطة ضعفه الوحيده..يحبهم حيل ومستحيل يفكر يشتتهم..يقول اذا اشتدت سواعدهم وكبروا بيتزوج..
والله احيانا اتمنى يسويها..عشان يذوق المر..اعرف ماراح يظهر شي..وانه مرتاح ومريش.. بس انا عاجنته وخابزته .. مايحب المشاوير ولا الاسواق ولا الطلعات ...بيتوتي درجة اولى..واكيد اذا تزوج بيطلع ويسافر ويتسوق وتمشيات..يمكن يتغير ..الله اعلم..
مع انه ماعمره عشانا في مطعم او ودانا تمشيه الا نادرا ونكون مجموعه عوائل..مايحب لحالنا..على قوله بدل مانطلع نسولف برا..نسولف في البيت..ايش الفرق...
والله امور كثيره تقهرني..وحسيت نفسي اني اختصرت لكن صارت حكايه الله يصبرني بس..
طبعا غير انه يطالع بنات في النت و و و استغفر الله بس ..واعرف هالشي من زمان ..واعرف انه يحب الجسم الانثوي.. وانا من النوع اللي احب اعتني بنفسي...لكن ماقدرت اضبط من جسمي على حسب اللي يريحني..ويعجبني ويعجبه..يعني غير متناسقه ولا عندي معالم انثويه للاسف..سويت كل شي عندي في البيت ولا زاد وزني ولا شي..قلت له يعطيني فلوس اشتري حاجات الحريم اللي تضبطهم وخلطات وكذا..بس مايوافق وما يعطيني فرصه ادخر عشان لا اشتري من وراه بدون علمه..برضو مهددني لو اشتري شي او خلطه او اي كريمات من حريم انه راح يزعل ولا يرضى علي ابدا..
احيانا نتفاهم ويكون هادي واريحي..واطلع اللي فبالي ويستجيب لي..بس يوم واحد..وبقيه الشهر معصب ولا يتفاعل معي ولا يعطيني وجه..
طبعه شمالي ..وغالبا يكون حنون وطيب معنا..وخاصة مع عياله..بس مدري ليه يطنشني ويسفهني ولا يحترمني ولا يحب ارائي مع انها في النهاية تطلع صح ولا يحب يعترف بهالشي..مع اني محترمه معه ومع الناس..وبشوشه وهادئه..ولا احب المشاكل..بس هو الله يهديه يسوي من الحبه قبه..
مايعجبه عندي فلوس..يجلس يقول هاتيها هاتيها لين أسحب وبرجعها..وماعاد يرجعها الا اذا احتجت ضروري ...يرجعها بإهانة ..وكلام جارح..
ويرميها بوجهي.. اذا جمعت ١٠٠ او ٢٠٠ ومرينا من محل وطلبت شي يقول خذي بفلوسك..وهو يعرف انها ماتكفي..بس يحرجني..واتراجع واترك اللي نفسي فيه..
افكر بجديه اخليه يعطيني بقية مهري..مع اني عارفه وواثقه انه راح يهيني ولا راح يوديني مكان عشان اتهنى فيها او اشتري..كعادته يقول اتحداك تطلعي مع احد اقربائك.. واذا طلبته يطلعني يقول لا..والف لا..انسى شي اسمه طلعه او سوق او اي مكان..
قبل شوي سوى لي مهزله عشان عندي ١٠٠ ويقول اعطيه وقلت معه اكثر منها..هذي يخليها لي ..وتوعد وازبد واربد وماعاد راح يشحن لي شهريا ولا شي.. وكلام كثير...وانا بداخلي حرب ونار ودموووووع..ماعندي أحد افضفض له ..
وادعي دايما في كل سجود باللي في نفسي..وارتاح الحمدلله..
والله ماعادت حياة..كل شي فلوس فلوس..صبرت على فقر عشان عيالي..
عباتي قبل ٧ سنوات شريتها وللحين ما وداني محل عبايات اشتري جديده..وحاجات كثيييره اتمنى معي..
مدري هل هو بخل..او ادخار كما يقول..او اصلا مايهمه امري..مع انه يعطي اهله بالالاف..واحثه يعطي امه.. لعل الله يعوضني في عيالي..
مره اشتكت لي وحده ان زوجها فقير ولا عنده وظيفه..وحياتهم بالغصب يمشوها..قلت احمدي ربك اذا صار معه عطاك ومشاك والسوق شبه يوميا وطلعك انتي وعيالك ولا ينكد عليك اذا عندك فلوس زي بعض الناس ...وقالت فعلا اذا صار عنده مايقصر ماشاء الله..
معلش حبيباتي طولت في فضفضتي ان صح التعبير..بس اتمنى الاقي حل او على الاقل كلام يصبرني..احس بنفجر نفسي حد يعبرني..