آه من زوجي واصحابه وحريمهم الجزء 2😂😂😂

/مساء السعادة للمتحمسين
طبعاً اكيد فاكرين موضوعي السابق😊
اشكر كل من رد عليا اذا موافقين او رافضين اسلوبي.
قبل ماابدا سامحوني ع التاخير خرجو ع الساعه 2ونص ويابدوب نفضت البيت ورتبت الاغراض ماخلصت الا قريب الفجر
وع طول نمت من التعب ودحين صحيت اسوي الغدا وقلت لازم اكتبلكم عشان اطمنكم
بسم الله نبدا
انا كنت رافضه في البدايه اني اقدم لهم اي ضيافه بعدين غيرت راي وقلت خليني اكون افضل منهم فتصلت ع اثنين من الاسر المنتجه وطلبت من وحده تسوي ليا بعض الاصناف مع القهوة والتانيه تسوي ليا بعض الاصناف مع الشاي ،طبعاً هدي الضيافه للرجال الحريم يحلمو ،ويوم الثلاثا قلت يالله اشتري صحن للحريم بقلاوه وصحن فطائر وعصيرات وايسكريم مو عشانهم عشان الاطفال وهما ياكلو
اتفاجت يوم الاربعاء في الصباح وحده رسلت ليا ع الخاص نسختها لكم بالزبط
الضيافه كالتالي مع القهوة لنا وللرجال
تشيز اللوتس مع زياده اللوتس ومني تشيز كيك متعدده الانواع وبسبوسة محشية بالقشطه مع شيره وبسبوسة محشية بالقشطه بدون شيره ودونات للاطفال
اما ضيافه الشاي لنا وللرجال
معجنات بدون سبانخ وكيك بالشوكولاته للاطفال ورق عنب بدبس الرمان لنا وورق عنب سبايسي للبنات والرجال لهم مكسرات بدل ورق العنب
اما العشا
للرجال رز بخاري باللحم وسلطات وبف وطرمبه(تقصد بلح الشام )
اما الحريم رز كابلي مع سلطات وصينيتين مكرونه بالباشميل للاطفال والبنات
وطبعا ً ما ننسى المشروبات الغازيه(بيبسي -ميرندا)
انا قريت الرساله منها وجن جنوني عرفت واتاكدت انهم يبغو يسو مشكله ع حسابي عشان تتفركش الجمعه واكون انا السبب
رديت عليها مشكووووووره والله يجزاكم خير💃🏻💃🏻💃🏻
(طبعا ً رديت كدا راح تعرفو ليه )
رجع زوجي من الدوام وقلي ترى بيجوبحدود الساعه 9- 9ونص قلتله نعم قلي هذا ردهم يقولو الحريم مايبغو يحضرو بدري..واتخاصمت معاهم وكانت اصواتنا تبغ ترتفع بعدين سكتنا،قولتله هما براسهم موال بس ماراح اخليه يتحقق(طبعاً بقلبي)
طبعاً زوجي مو عارف اي شي عن رسالة الواتس
ع اذان العشا كلمت ام زوجي وقلتلها الضيوف بيجوني ع الساعه تسعه وصعبه عليا الاولاد ينامو وبعدين يصحوهم فبخليهم يجو ينامو عندك قالت الله يحيهم هدا بيتهم ،بعد الصلاة راحو واخدو شنطهم واغراضهم وراحو باتو .قبل الساعه تسعه رتبت طاولة الرجال سويتلهم مني بوفيه حطيت الحلى والمالح مع تلاجة شاي وقهوة وموكا حار وقهوة تركية ومويه صحه وصحون وملاعق وشوك .وقلت لزوجي بعدين اسالهم ايش يبغو عشا ونطلبلهم قلي هدا يكفي (زوجي مره معصب الدنيا دوام ومدارس وهما الى الان مابدات زيارتهم،،حريم يتحكمو في موعد الزياره،،
قلتله مو مشكله قلهم لانهم راح يرفضو لانه ماشاء الله كثيييرالاكل ..اصريت يقولهم عشان لو قالو الحريم حتى عشا ماجابو لنا ،،ازواجهم يقولو احنا رفضنا يجيب😉😉
ع تسعه بدات زيارتهم وكل شويه وحده جايه مع عئلتها صغيرهم وكبيره ع عشره العدد اكتمل رحبت شويه فيهم وسالوني عن بناتي قلتلهم عن جدتهم عشان بكره دوام الا اتفاجت من الطامه بعضهم لاغين يوم الخميس دوام وبعضهم ع حسب يداومو او لا،وبعضهم وهذي الطامه الكبرى مايصحوهم للمدرسه اللي يبغى يصحى يصحى واللي يبغ يغيب يغيب(بحجة ليه اتعبهم ومافي وظائف ولا جامعات 😔😔) حريم همهم الخرجات والونسه
اخدت البنات الكبار حقون المدارس وقلتلهم افضلكم تجلسو بغرفه لوحدكم مع بعض ومنها تنتبهو لاخوانكم،(دخلتهم غرفة مخصصتها العاب لاولادي ،مررره انبسطو البنات اكثر من الصغار)ورحت للحريم وصبيت لهم القهوة ورحت جبت التلاجه الثانيه ، الا وحده سالتني فين البسبوسة ابتسمت قلتلها انت صاحبة البسبوسة 😀وطوالي قلت في وحده رسلتلي ع الخاص انكم بتجيبو الضيافه معاكم قالتلي انا ماقلت نبغ نجيب انا اقصد انت تسويجالسه تخاصم
قلتلها اها ابالي انتو تجيبو مو شوفتيني شكرتك ،،،انا من بداية الاسبوع وانتو تنزلو اصناف اطباق ع بالي انتو بتجيبوها لاني متوقعت وحده ماتعرفوها واول مره تزورها بتطلبو منها ،ايش تقدملكم
لانه قلت زوق وانتو اتوقع مو من هدا النوع صح 😝😝
ساكتو محد رد عليا.فقلت اتوقعت هدا طبعكم لما تزورو وحده انتو بتجيبو الضيافه وكل وحده كتبت ايش تجيب عشان الطبق مايتكرر
،محد رد عليا
سكتنا شويه .الا وحده (جالسه تفكر،،قالت احنا اتفقنا من دورك نطلب الضيافه حقتنا ايش تكون،عشان صاحبة البيت تعرف ايش نبغىوبعدها بدو يتكلمو مع بعض انا صراحه ساكته ،،وكل شويه يجي طفل ياماما جوعان ياماما ابغ اكل وهما دحين يجي العشا.بصراحه حزنت ع حال الاطفال وفرشتلهم واديتهم الفطائر وكروسون وعصيرات وجلسو ياكلو ،جبت الشاي الا وحده منهم تقولي ترى احنا قررنا كل ربوع نجتمع في بيت وحده من غير رجال ومره في الشهر الرجال معانا ،قلت الله يديكم القوه فقالت ليا وحده راح تجتمعي معانا،قلتلهم اسفه انا من زمان وانا رافضه الجمعه واكبر دليل ماجتمعت معاكم.هنا طلع قناعهم وعصبو(احساسي ماخاب،،اساساً واضح الجلسه مافيها اريحيه الكل يعلق ع الثاني والكل مو طايق الثاني)
قالت ليا وحده مو كفايه متسوي فطور للمدرسين كمان ماتجتمعي معانا مو ع كيفك
قلتلهم اولا فطور المدرسين ماليا دخل فيهم،قالتلي وحده كيف مالك دخل فيه وزوجك من ضمنهم يطفح(شايفين الاسلوب)
قلتلها اولاً الفطور المدرسين كانو مقررين بينهم كل يوم واحد يروح يشتري فطور محد قال الحريم يسو(هذا الكلام العام اقترحو المدرسين يسو جدول كل يوم واحد يروح يشتري فطور،،هما الخمسه ومعاهم كم وحده،،قامو يتفلسفو ويتنافسو وكل وحده تسوي فطور اشكال والوان لما يكون ع زوجها لدرجة صارو يسو محاشي وايدامات ،،لما اقولكم يحبو الهياط.. ولما بدات السنه هدي المدرسين بنفسهم نسيو الموضوع وهما لا من اول يوم دوام وحده منهم سوت فطور لهم ورجعو زي العام بالتنافس،،)قالتلي هدا زوجك ومن واجبكم تسعديه وتشرفيه قلتلها لما يكون في بيتي ايوه اما خارج بيتي ماني ملزومه فيه،ورجاً لا تغيرو الموضوع أنا لادخلوني معاكم في جمعاتكم.
ردت وحده وقالتلي زي رجالنا مدخلونا وافقنا انت كمان توافقي ايش ينقصك،قلتلها ماينقصني شي انا وضعي غير عنكم،،
قالت وحده انا قلت تجتمعي يعني تجتمعي😱😱😱 ،،قلتلهم انتو حرين تبغو تجتمعو ماني مجبوره اسمع كلامكم ،،المفروض من اول زوجي قال زوجتي ماتبغ تجتمع وهو كمان انسحب،ذوقينا تتقبلو هدا الشي
ردت وحده قالت انت انسانه غريبه مو كفايه حارمه عيالك من الغياب(ايش دخل هذي الهرجه مدري)وكمان ماتبغي تجتمعي معانا،انت ابالك اني ابغ اجتمع معاهم من البدايه انا كنت رافضه بس لما قلي زوجي ع الفكرة وافقت عشانه،،وكلهم قالو حتى انا حتى انا،قولتلهم انتو حرين بحياتكم،،وانا حره بحياتي ،، فسكتو
فغيرواالهرجه
(اللي محزني ولا وحده قامت تشيك ع الاطفال مين نايم ومين صاحي،لو تشوفوهم اللي نايم ع السيراميك واللي معاه اي باده ونايم عليه واللي نايم فوق الالعاب،والبنات ولا عليهم كل وحده ع جوالها وماهي داريه عن اخونهم)
وكل وحده تعرض جدولها الاسبوعي المزحوم
اهم شي عندهم يسو جدول للخرجات والجمعات ويقولولي احنا اجتماعيين مو زي بعض الناس (يقصدوني ههه😂😂😂)
وانا ساكته مااتكلم اخدت جوالي قدامهم وبلكتهم وخرجت من القروب،،ع الساعه اثنين ونص مشوي .
وهدا اللي صار
ماخذين الموضوع عناد انه ميسير نجتمع وانت لا.غصبن عنك راح ندخل بيتك(عشان جدولهم الاسبوعي لازم يكون مزدحم بالمواعيد)
عاد ماادري ايش راح يسير،،
كلمت زوجي قلتلهم مايدخلو بيتي نهائياً لا اسبوعين ولا شهرين..قلي انا فهمتهم وقلتلهم هدي اخر مره الحريم يدخلو بيتي،،لاتخلوهم يفرقونا بعد عشرة عُمر.
الحمد لله انتهى الموضوع وارتحت منهم،
واسفه طولت عليكم بالهرج.😊😊😊