أبشركم ولدت حمدلله +تجربتي مع الولاده في مستشفى "رعاية الرياض"التأمينات سابقا

السلام عليكم اخواتي

أولا وآخرا الحمدلله كما ينبغي لجلال وجهه وعظيم سلطانه
الحمدلله حتى يرضى والحمدلله إذا رضي والحمد لله بعد الرضا والحمدلله حتى يبلغ الحمد منتهاه


أبشركم.ولدت طبيعي وجبت احلا ولد بالدنيا فلله الحمد والمنه

ولادتي كانت بعد استخاره بين مستشفى رعاية الرياض ومستشفى المركز التخصصي الطبي

ولما جاني الألم صرت أقرا سورة الزلزله على بطني وادعي واقول ..اللهم لاسهل إلا ماجعلته سهلا وانت تجعل الحزن إذا شئت سهلا
اللهم اجعل ولادتي علي بردا وسلاما كما جعلت النار على إبراهيم بردا وسلاما ..

ياحي ياقيوم برحمتك استغيث ..
لاإله إلا الله العظيم الحليم لاإله الله رب العرش العظيم لإله إلا الله رب السماوات والارض ورب العرش الكريم .

طووووووووول الوقت وانا اردد هذي الادعيه ..

ورحت طيران أكلت ملعقة عسل اصلي
وملعقه زيت زيتون.طبيعي ..

ودهنت بطني وظهري بزيت زيتون مغلي مع حبه سودا

واخذت شنطة المستشفى وطيران ع السياره

وطبعا الالم كل ماله ييزيد وفترته لكن ماتركت الدعاء ولا لحظه وزوجي يسألني وين تبغين اي مستشفى

قلت له خلاص رعاية الرياض ..مع العلم إني لي تجربه سابقه مع رعاية الرياض قبل 11سنه جبت ابني البكر فيه

المهم..قررت عالتأمينات وتوكلنا على الله والحمدلله استقبلونا كويس وكانت دكتوره سودانيه بالطوارئ

كشفت علي وقالت 5سم مفتوح الرحم

وطلعوني فوق قسم الولاده ولقيت سيسترات اخلاق بيشيلوني من الارض شيل كانو 3الي تمسح على راسي

والي تواسيني..والي تجهز الاغراض والتحاليل

بس كانو قممممممه في التعامل ..

وعطوني مسكنات واوكسجين مخفف للألم

وانا بس اذكر الله وابكي بدون صوت

وزوجي معي متوتر جدا

والالم كل ماله ويزيد ..وجت دكتوره هنديه والله اني ناسيه اسمها ممتازه جدا كشفت علي بهدوء وقالت 8سم

وجهزت العده ولبست الكمامه وغيرت القلوفز تبعها

وبدينا مرحلة الدفع ووهي موسعة لي بيدينها والسيسترات جنبها كلهم يقولون لي ادفعي ادفعي

كل ماجاء الالم يصرخون ويشجعوني وأنا بمووووت من الالم بس حمدلله ماكنت اصرخ كثير بس كنت اخذ نفس عميق واكتم وادفع ..نصيحه خواتي لاتصارخون ترى الصراخ يأخر الولاده يأخر الدفع

والحمدلله ربي سهلها علي ونزل ابني
احلا لحظات في عمري
طبعا الدكتوره الهنديه خيطتني خياطتها ممتازه مشدوده ومرتبه

وبعد الخياطه انتظرت ساعتين وبعدين ودوني غرفة التنويم
من حسن حظي والله يابنات ماكذب عليكم اني كنت الوحيده
بهالوقت عندهم اولد ..حتى الدكتوره قالت انتي سبيشل اليوم
دايم يجونا مجموعه يولدون انتي ألحين لحالك ..
والله يابنات من الدعاء ثم الدعاء دايم ادعي ان الله يسخر لي ممرضات ودكتوره بنت حلال
الحمدلله لك يارب تسهلت ونمتبالمستشفى يوم ونص
عنايتهم روعه ونظافتهم ممتازه ولو ابيهم اضغط الجرس يجون بثواني

وبس هذي قصتي وتجربتي
والله يسهل على كل حامل يارب ويهونها عليها

وسامحوني طولت عليكم ..ولاتنسوني من صالح دعائكم