أبغى اساعد اخوي عضيدي .. تكفون يابنات شوروا علي !!

السلام عليكم يابنات حواء

هذه اول مشاركة لي .. لكن لاتتوقعون اني ماعرفكم انا اتابعكم كثير وخصوصا القسم هذا

اتمنى إني القى حل لمشكلتي عندكم ... او بالأحرى مشكلة اخوي

اخوي مو من النوع اللي يتكلم ويفضفض عن اللي بمشاكله لكن انا عارفته من عيونه وشكله شايل هم الشي هذا

خصوصا انه مشكلته مايقدر يحلها هو بيده


اخوي تخرج من الجامعه من سنة تقريبا .. عمره الحين 24 سنة وماشاء الله عليه متفوق بدراسته وقدر يتوظف مهندس بشركة سابك براتب عالي .. الله يوفقه ويحفظه ويزيده من الخير والنعيم

اخوي كلم امي على أساس انه يبغى يخطب ويتزوج خلاص .. امي قامت بدورها ودورت له بنت وحصلت له العروسه المناسبه

اخوي راح شافها واعجبته وهي اعجبت فيه ووافقوا وكان كل شي تمام .. وراحوا يسوون تحليل الدم لكن للأسف التحليل فشل وماتطابق دمه مع دمها

واضطر اخوي يفسخ الخطبه عشان كشف الدم .. ولاحظت انا انه تأثر بسبب السالفة هذه << ياجعلني فداك ياخوي ماتذوق الحزن يارب

وترا لا اخوي ولا خطيبته السابقه فيهم مرض او شي .. الحمدالله سليمين بس دمهم ماتطابق .. يعني فيه احتماليه انه عيالهم يطلعون معاقين لو تزوجوا .. عشان كذا مانجح الكشف



بعد السالفه هذه بفتره بسيطه تفجرت مشاكل كبيرة جدا بين أمي من جهة .. وابوي واهله من جهة ثانية ( المشاكل هذه مو موضوعنا الان لكنها جزء اساسي من الموضوع )

وبعد تفجر المشاكل هذه أمي طبعا انشغلت فيها وأبوي كمان .. وأخوي مسكين ضاع بالطوشه .. ماحد فاضي يخطب له ولا شي

لاحظت انه بعد المشاكل هذه اخوي ساكت عن موضوع رغبته بالزواج مراعاة لظروف امي .. لكن والله أشوف بعيونه انه وده يتزوج ويخطب خصوصا انه قادر ماديا ومافيه شي يمنعه .. خصوصا يبان عليه لمن يبارك لواحد من اصحابه بزواجه او ملكته او يحضر زواج واحد من اصحابه

اتذكر مره سمعته يتكلم بالجوال مع صاحبه والظاهر صاحبه جاب سالفة الزواج .. فرد عليه اخوي .. يقول ان شاء الله نتزوج بس شكلنا مطولين شوي ويضحك ضحكة خفيفه .. وانا اشوف ورا ضحكته حسرة

وأخوي على فكرة عايش لحاله بمدينة قريبه مننا حوالي 300 كيلو .. وهو يكره يعيش لحاله .. حتى من يوم كان صغير وهو يشارك غرفة نومه مع اخوانه ويطفش مره اذا جلس لحاله
احس صعبه انه الانسان يعيش لوحده خصوصا اذا كان واحد شخصيته مثل اخوي مو راعي طلعات كثير او قهاوي .. دايم يجلس بالبيت او يطلع يلعب كوره مو اكثر من كذا

ممكن كثير منكم يقول انه ينتظر الين ما المشاكل تنحل بين امي وابوي واهله .. لكن المشاكل شكلها مطوووووولة كثير هذه اذا انحلت كمان الله المستعان

انا اخته الكبيره .. وبصراحه اخوي هذا اطيب اخو لنا .. طول عمره حاط باله علينا يودينا ويجيبنا ويراعي اغراضنا الكثيره انا واخواتي .. حتى اول راتب اخذه بعد ماتوظف اعطى كل وحده فينا الفين ريال .. يقول اعذروني اخاف اشتري لكم هدايا وماتعجبكم <<< احنا عقدناه بذوقه مسكين هههههههه


والمشكلة اخوي اعرفه ماراح يطلب الشي هذا من أمي ابدا.. لانه أمي فيها اللي كافيها وهو مايبي يزيد عليها الضغوط

انا آسفه اذا طولت عليكم .. بس اتمنى القى منكم حل

تكفون يابنات شوروا علي كيف اقدر اساعد اخوي .. المشكلة كل صاحباتي اللي اعرفهم بعمري يعني اكبر من اخوي ب 5 سنوات واغلبهم متزوجات كمان .. والله ابغى اساعده وماني عارفه