بسم الله الرحمن الرحيم....وبه نستعين....
خواتي العزيزات :: ترددت كثيير قبل ماأكتب موضوعي هذاعشان أنا ماتعودت الكتابه لاني
بصراحه ماعندي الكفائه الكافيه والخبره في كتابة المواضيع,,:44:
بس بصراحه شعار الحمله والمواضيع الي نزلوها البنات الله يجزاهم خير شجعوني أتجرأ وأكتب هالموضوع وما أكذب عليكم
أذا قلت أني تخنقني العبره كل ماشفت شعار الحمله أو قريت موضوع للأخوات العضوات وأحس كثييير أني مقصره,, لأني أم ولازم اشارك في هالحمله,,
فتوكلت على الله وكتبت هالموضوع المتواضع جدا.... وسامحوني أذا موب ذاك الزود:)
باركز ياحبيباتي على اخطر سن في حياة أبنائنا وبناتنا الله يحفضهم الي هو سن المراهقه فاأقول
ياريت ياحبيباتي نكثف أهتمامنا وحرصنا ورعايتنا لأبنائنا
أذا وصلوا لهالسن سواء كانوا أولاد أو بنات...ونحاول نكرس طاقاتنا وجهدنا وكل مانملك لهم ونشد
على نفسنا شوي ونتنازل عن اشياء ونضحي باأشياء برضه
أذا كان هذا في مصلحتهم ونحتسبه عند رب العالمين سبحانه,,
والله يابنات ترى الأمر موب سهل وخاصه في عصرنا هذا عصر الأنفتاح وحتى لو ماطلعوا من البيت تخافين عليهم,,
القنوات الفضائيه وكثرتها ومافيها من مسلسلات هابطه وبرامج ماسخه هادمه للقيم تأثر فيهم تأثير كبير,,
والأنتر نت والي موجود فيه ماسنجر,,منتديات,,فيس بوك,,يوتيوب,,,,كل هذولي مصايب والله أذا ماأستخدموا بشكل كويس
للكبار فما بالك بالمراهقين!!!خاصه أن المراهق عنده حب الأستكشاف والمغامره وخوض التجارب والتقليييييد,,,
المدارس وماأدراك مالمدارس صارت تخوف هالأيام بدل ماتصير مكان آمن.. في مدارس البنات أنتشر الشذوذ والعياذ بالله والبويات وصديقات السوء,,,
ومدارس الأولادصرنا نسمع عن أصدقاء السوء و التحرش وتجمعات الأولاد بعد المدرسه وما فيها من تدخين ومخدرات,,
أيضا كثرة المشاكل الزوجيه والخلافات بين الزوجين تأثر بشكل كبير على أستقرار الأبناء العاطفي والنفسي.. والمراهق زي مانعرف
يحتاج وبقوه للأمان النفسي والعاطفي.. والكلام في هالنقطه بالذات يطوووول وأنا أعرف غالياتي أنه موب بيدينا
عدم التوفيق وقلة صلاح بعض الأزواج وتسلطهم وتقصيرهم وأشياء كثيره الي لابد نعاني منها كزوجات,,لكن أنا كاأم وبما وهبني الله سبحانه
من قدره على التحمل..ومن قوة صبر,, ومن عاطفه جياااشه ومن قلب كبييييير وحب أكبر لفلذات كبدي قادره أن شاء الله
على الأحتواء..أحتواء أبنائي وحمايتهم من كل هالمخاطر الي سبق ذكرها..فكييييف أحتويهم وأحميهم؟؟
باأقول لكم على طريقتي مع عيالي المراهقين وحتى الصغار الله يحفضهم,,وأن شاء الله انها طريقه جيده للأحتواء,,
أول شي أعزز عندهم الجانب الديني والخوووف من الله في كل أمور الحياة والتقرب ألى الله بكل شي اقدر عليه
من قراءة القرآن والتنافس على ختمه,,,وكثرة الصدقه حتى لو بشي بسيط,,الصلاة في وقتها وعدم التهاون فيها
مراقبة الله لي طوال يومي وأنا في مدرستي أو في بيتي على الكمبيوتر أو أتفرج على التلفزيون أو أكلم أصدقائي أو صديقاتي,,
ثاني شي ماأخليهم يحسون باأي توتر أو خلاف يمكن يحصل بيني وبين أبوهم ولو حصل هالشي قدامهم
أحاول أخفف من آثاره عليهم قد ماأقدر مثلا أقول كل البيوت يصير فيها خلافات أو أقول أبوكم هالأيام نفسيته تعبانه لازم نعذره ونصبر عليه,,
أحاول أعوضهم بطلعه ولا أجيب لهم شي يحبونه,,
أعتذر منهم وأخلي أبوهم يعتذر منهم على الموقف الي شافوه,,
ثالت شي وهو مهم جدا عودتهم على المصارحه بكل شي يسوونه أويحسون فيه أو يضايقهم ولااازم أشاركهم بكل شي وأعرف كل شي عنهم,,وأحاول أساعدهم وأنصحهم أذا لزم الأمر
وأجاوب على أستفساراتهم وفضولهم وأعلق على كل شي نشوفه مع بعض في التلفزيون أذا كان حاجه كويسه أو حاجه
موب كويسه وأقول رائيي فيه من ناحية الدين والأخلاق وصاروا يقلدوني في هالنقطه ويقولون رايهم..
أمدحهم باأستمرااار وأثني عليهم.. على أخلاقهم وعلى شخصياتهم وعلى أشكالهم وعلى دراستهم وعلى أي شييي يسووونه حتى لوو ماأعجبني,,
والبنات بالذات أمدحهم كثييير أمدح لبسهم وذوقهم وأمدح شكلهم وترتيبهم ولو سوو لو حاجه بسيطه في البيت طبخ ترتيب أمدحهم وأثني عليهم وأشكرهم..
أحضنهم كل يوم قبل لايروحون المدارس وأستودعهم ربي و بعد مايرجعون من المدارس,,
بس بصراحه فيني طبع موب عاجبني أبدددد وودي أتخلص منه وهوأذا زعلوني في أي حاجه أزعل عليهم وماأكلمهم لييين يجون ويعتذروون,,
ودي أكون متسامحه وأنسى وأغفر لهم لأن أحيان يطولون مايعتذرون فاتعب أنا وأخاف عليهم لا يكون زعلي يجيب نتيجه عكسيه ويدورون منا ومنا شي يخفف عنهم وينسيهم زعلي
عليهم وهذاني أحاول جاهده
أتخلص من هالطبع والله يكون في عون الجميع يارب,,
وأخيرا حبيباتي أقول أحس نفسي مقصره ومقصره مع عيالي وأحاول أقرأ وأبحث عن أشياء تفيدني في تربيتي لعيالي في كل النواحي,,
يابنات ترى عيالكم أمانه عندكم فحافضوا عليهم بكل ماتقدرون وأحموهم من الأخطار بكل قواكم,,قال رسول الله صلوات الله وسلامه عليه((كلكم راع وكلكم مسؤول عن رعيته..الخ)) والله سبحانه ماراح يضيع تعبكم ولا يحرمكم أجر كل ماتسوونه عشانهم
وراح تقطفون الثمار حلوه أن شاء الله وراح يبرونكم عيالكم ويدعون لكم......
أسأل الله العضيم رب العرش الكريم أن يصلح لي ولكم النيه والذريه وأن يحفضهم لنا ويبلغنا فيهم كل خيروكل مانتمنى أن نراه فيهم...
وشكرا جزيلا لكم على قرائتكم موضوعي أسأل الله تعالى أن ينفع به ولا يحرمني وأياكم الأجر...
اسأل الله تعالى ان يعينك على تربيتهم على افضل وجه
ويعطيك مساااااااااااحات اوسع لفهمهم والتجاوز عنهم
عزيزتي ... حتى الاولاد اذا تعودوا انك كل شوي تزعلين عليهم
او يطول مايهتمون لزعلك خليه على شي قوي ويستاهل
واذاشي يتعدى خوذيه برحابة صدر وعاتبي مع احتواء
تقبلي مروري ... وموفقه
لا اله الا الله