أبوي حبيبي ومعاناته مع السرطان تكفون ادعو له الله يشفيه

السلام عليكم ورحمة الله وبركاته

المرض ابتلاء وامتحان من الله
ومحبة الله لعبده وتقربه لله والحمدلله على كل حال

انا كنت دايم أقراء القسم واتالم للمصابات وأدعي الله يشفيهن
وما جا في بالي ان احد عزيز علي بصير معاه هالمرض ولكن قضاء الله وقدره

أصيب والدي بهذا المرض فجاءه بعد انتقاله لبيت جديد وبعد أسبوعين فقط تعب وأخذه اخوي لمستشفى أرامكو وكان ذاك اليوم ياقلبي عليه مسوي عشاء الجيران عشان يتعرف عليهم وقال لاخوي ارجع واستقبل الضيوف وقول لهم أبوي تعبان وجلس عنده اخوي الصغير عمره 16 سنه وأخذوا تحليل عليه وآشاعه على مكان الألم وكان في جنبه الأيمن وطلع عنده سرطان في الكبد وأخوي بغى ينهبل الصغير وكلم اخوي الكبير ويوم خلص العشاء جا وأخذ يومين وطلع أبوي. وكان بس ساكت وحنا ماندري وش شفيه قالو لنا شد عضلي بس حتى أمي ماتدري وطلب اخوي تحويل له مستشفى الرياض مدينه عبدالله او عبدالعزيز نسيت حق الأورام وكنا مستغربين قال اخوي معاه التهاب كبد بي. كذب علينا عشان مانخاف بس بعدين علمنا لانهم نوموه واعطوه حقنه بشريان الفخذ وكان تعبان حيل تعبان اهلي بالدمام وانا متزوجه بالقصيم المهم جينا وزرناه وجا اخوي الصغير عمره 12 سنه وواحد عمره 13 سنه ماجا يوم شافه أبوي بعد ماصحى من التخدير قام أبوي يبوس ايدين اخوي الصغير ويبيكي ويقول وين اخوك ليشش ماجا كن أبوي يقول اخر مره بشوفكم وصار حساس كل من زارة جلس يبكي
المهم رجع لنا بالبيت وكان عنده موعد بعد شهر ونص من أخذ الحقنه عشان يشوفون نتائجها
كان بس قاعد لحاله وساكت
وأتوقع كلكم سمعتوا عن العشبة ديد الضبعة. او الفعمه حقت العازمي بالقصيم
جبناها لأبوي وسويناها والله يعينه على طعمها مره بس شربها لمدة شهر ونص بانتظام ومشى على الحمية حقتها
وراح لموعده أبوي كان فيه على الكبد ثلاث اورام واحد كبير وثنين صغار
ولما راح لموعده وأخذ اشاعه قال الدكتور الأورام الصغيره ماتت خلاياه والكبير صار خامل وارتاح أبوي نفسيته واعطاه الدكتور حبوب نكسفار ثلاث شهور بهذلته طلع تقرحات برجوله وفمه وكان عند موعد قبل يومين بالرياض وراح وكان قلبي ناغزني مش مرتاحه
أخذوا تحليل واشاعه وأخوي دخل قبل أبوي وسئل الدكتور وكانت الصدمه
طلع فيه
من سرطان بالكبد
الى سرطان في جدار البطن
و سرطان بالرئة
سرطان بالغدد
سرطان بالدم
والأورام اللي بالكبد زادت وكبر حجم الورم الكبير وصار طالع على سطح الكبد
ياررررررب رحمتك أشفي أبوي وصبر قلوبنا

اخوي طلب الدكتور قال لا تقول لأبوي

دخل أبوي على الدكتور أبوي كان يقول لامي انت حاس انه زايد علي لان مكان ورم الكبد احسه قاسي ويعورني
المهم قاله الدكتور تحليلك كويس والاشاعه كويسه والأورام نفس اول مره ماتغير شي الورم ساكت عندك
قاله أبوي طيب والوجع اللي فيني قاله الدكتور شد عضلي بمكان الورم وهذا طبيعي وما في خوف
أبوي مايعرف بس مشت عليه وصدق وهو مايدري ولا راح نعلمه لان أبوي خوواف خصوصا من الامراض
اخوي قال بوديه مستشفى فودا بالصين وارسل تقاريره قلت له أبوي منتشر السرطان بكل مكان وأماكن صعبه وين يعالجون وين يخلون بس مصر انه يوديه اخوي هذا عمره 24 سنه وموظف
كلم مستشفى في المانيا بس غالي حيل مليونين
أبوي ماله علاج ابد وقفوا النكسفار عنه لان مانفع معه
وابوي يقول لامي الحمدلله مازاد عندي شي نفس اول
أبوي وامي وأخوي بيروحون عمره لمكه يوم السبت ويرجعون يوم الثلاثاء
أبوي راجع عند شيخ بالخفجي ابن رشيد ومسك مكان الورم وقاله انت فيك سرطان تعالج والله يشفيك وقاله انتم عليكم نفوس وعيون

ادعو له يا بنات بالشفاء والله ما يعذبه بحياته ويرحم بحاله وحالنا
انا اخر مره شفته شهر 12 في العيد وبروح هالاسبوع له ودي اروح قبل يعتمر أخاف ماعاد اشوفه ودي اكحل عيوني بشووفته ودي اضمه واجلس معاه يارب تشفيه انا ساكنه بالقصيم وأهلي بالشرقيه

تكفوووون ادعو له الله قادر على اي يحي العظام وهي رميم

يارب تشفيه وتصبره
وتشفي كل مريض ومريضه امين