أبي رأي صاحبات الخبره.....جزيتم خيرا

أولا كل عام وانتم بالف خير وصحه وسلامه
ثانيا عندي مشكله قااااااااااهرتني وفاقعه مرارتي من جد أحس بيجيني ضغط ولاسكر من هالمشكله الي أعتبرها رفعة ضغط أكثر من كونها مشكله
أدري طولت عليكم بس وش أسوي والله من الحره
مشكلتي مع زوجي وبدأت من أول ماتزوجت وعجزت أتأقلم مع ألأيام
زوجي بارد....ثلج...بطيء...ياربييييه وش بعد؟؟زوجي كل الكلمات الي تحمل معنى البرود
مثلا أحنا متفقين نروح للسوق..أوكي..الرجال ولاعمره رفض وقال لأ ولو قالها كان أهون من الحركات الي يسويها...تخيلو الموقف..عيني على الساعه..الوقت يمشي..والرجال جالس ومنسجم عند التلفزيون متااااابع..وعقارب الساعه تركض..وضغطي يرتفع..والحبيب مايحب طبع الالحاح..يعني انثبري لين يلبي طلبك..أبشركم..حس ان الوقت تأخر وعزم يطلع وأخييييييرا راح الغرفه لبس ثوبه..وساااعه يمشط شعره..وساااعه يلبس الساعه وباقي الشغلات الي ماتاخذ ثواني عند الانسان الطبيعي...وأناااااا:30:خلاااااااااص ماعاد اتحمل أركب السياره وأنا خانقتني العبره..أوصل السوق في الوقت الضايع يادوب أمشي شوي ألا قفلوا الأنوار يعني أطلعي..وقيسي على هالموقف الي يوجع قلبي.
بارد مثل الثلج مايتفاعل مع الحياة..لو أفتح له مجال كان جلس بالأيام قدام الي أسمه تلفزيون بدون مايقدم أي نشاط.اذا عنده وقت فراغ يقضيه في النوم ومااااأقدس النوم عنده لو أصد عنه ربع ساعه نام.تراني أتكلم جد وكل الي أقوله واقع.بصراحه مليت من الركود.دائما أنا الي أخطط لطلعاتنا ونشاطاتنا وأنا الي أفكر وأدبر وأصر وأراقب الوقت وأنظمه عشان يساعدنا.لو وقفت عليه هو كان خسنا في البيت على الكنبه قدام التلفزيون..
انسان يفتقد روح التجديد والنشاط والتفاعل وش ممكن تسوين معه.بأكمل سنتين معه وعجزت أتأقلم مع الوضع لأن طبعي العكس تماما.في بداية زواجنا كانت مشاكلنا كلها على هالموضوع والحين خفت كثيييير بس لازلت غير راضيه ولامرتاحه وأحس ان الكتمان والتطنيش الي أعيشه بدأ يأثر على صحتي .تكفون دلوني على الحل أبي شوية تفاعل أبي حركه أبي نشاط.قاعده أشوف رجال كبار في السن ولهم نشاطات ماشاء الله لاقوة الابالله..
والمصيبه الأعظم انه ماكان كذاقبل الزواج علىحسب فهمي من كلامه كان يروح ويجي ويقوم بنشاطات كثيره..ياناس حتى اصدقاءه ماصار يروح لهم يعني ناشب في البيت لدرجه تقيدني وتعطلني.باختصار ذاااااابحه العجز أي شيء فيه مجهود ولو بسيط يتجنبه حتى لو كان يستاهل..
أدري طولت عليكم وكثرت هذره بس والله من حيرتي وتعبي من هالموضوع.أتمنى القى عندكم الحل الي يريحني من هالمشكله واتمنى تكون واضحه.
جزاكم الله خير
اختكم ريح الرياحين