أبي رايكم بموضوعي

استغرب من اللي مو لاقيين يسدون حاجتهم ويشتكون ضيق الحال وقلة الفلوس ويفكرون بالسفر !
وش تحسون فيه ؟
السفر مو ضروره عشان تدفعين من جيبك وتسفرين زوجك على المستريح وهو فلوسه يسفر بها اهله
اذا في نصيحه انصحها لنفسي قبل غيري فلوسي لنفسي فقط
ماني ملزومه اخذ دور الزوج واصرف على البيت وفوقها بعد اسفره على حسابي
وكلنا ندري ان الرجال لو محتاج فلوس يطلعها من تحت الارض حتى لو سلف
اما مسألة انه يطنقر ويسوي زعلان عشان النغغه الدادا ماسفرتيه معاك هذا اسمه استغلال وراح يجر وراه اشياء كثير فيها استغلال لفلوسك
واضح ان الزوج اللي اذا شاف عند زوجته فلوس يتعمد يخليها تصرف وحتى لو عنده فلوس يدعي الفقر والحاجه لانه للاسف ردي مو رجال بمعنى الكلمه
خلاصة الكلام لو مكانك طز بالسفر واحفظ فلوسي لنفسي وحتى البيت ما احط فيه ريال
لاني لو اصرف راح اكون سبب في تدمير بيتي واخلي الطرف الثاني يعتمد علي لدرجة اني لو رفضت ما اعطيه مثل ماصار معك يزعل وينفعل لانه خلاص اعتبر صرفي عليه وعلى بيته واجب مو تفضل وكرم مني
ارجعي اعرفي دورك كزوجه وواجباتك وحقوقك اللي من ضمنها ان الزوج هو اللي ينفق عليك وعلى بيته مو انتي اللي تنفقين

لو راتبك ملايين ملزوم بك وبااطفالك ملزوم يوفر لك الاساسيات انتي عودتيه تدفعي والمفروض حتى السفره يدفع لك الغي السفره بكبرها قولي له مامعي فلوس وانت اللي ناوي تسافر بنا تكاليف السفره كلها عليك، خليه يزعل يوم يومين ويرضى من نفسه واذا قالك تحبي الفلوس قولي ايه احبها تقضي حاجتي والحمدلله اني ربي كرمني بوظيفة وتراك مقصر معاي بالماده كثير والله ماودي اتوظف لكن الحاجه للفلوس خلتني اتوظف وهذا بسببك والحمدلله ربي اغناني من فضله

وعليكم السلام

والله ماعطيه يدبر حالة واذا السفرة فيها نكد لاتسافرين احسن. هو رجال هو ملزوم عليكم مايبي يدور شغل اجل لايطلب منك . هو خذك على سنة الله ورسوله يكون مسؤول على النفقة عليك وعلى بيته مو اهله هو ريلك محتاج ياخذ دروس في حقوق الزوجة على زوجها وواجبات الزوج . واختي لاتسمحين مرة ثانية يمد ايده عليك اخذي موقف إن عادها والله انا ماخبب بس عندك أهل روحي لهم وخبريهم فشليه

مرحبا، اولاً الجميع عنده رأي وفالأخير رأي قلبك هو اللي راح يمشي..

ثانياً، من اولويات الزوج انه يقوم بالاساسيات في البيت وانه ما يقصر عليكم لا مأكل ولا مشرب ولا سكن ولا مصروفك الشخصي حتى لو كنتي موظفه ٥٠٠ ريال ماتضر.وهذا الشي الدين حثنا عليه وامر الرجال فيه لانهم قوامه.

ثالثاً، اللي فهمته ان زوجك اب ل منزلين، منزل امه لان ابوه توفى الله يرحمه واب لك ولعيالك. وهذي مسؤوليه كبيره عليه. لان طبيعي راح يساعد اهله ك الرجل الوحيد اللي في البيت هو مكانة الاب حالياً. وهذا نصيبه ونصيبك ما تقدرين تمنعينه من النظر في حاجات امه واخته لان مالهم غيره والصراحه التقصير ايضا من اهله مب منه هو فقط. المفروض ما يدخلونه في كل كبيره وصغيره الله يصلحهم.

رابعاً، المشكله اللي عندك في اعتقادي الشخصي! ان انتي كاشفه كل كروتك الماليه امام زوجك وهذا غلط.. انا احاول قد ماقدر ما ابين لزوجي كم عندي وكم راتبي هذي حرية شخصيه وانا مب مجبوره اقوله كم عندي بالريال. طبيعة النفس البشريه سبحان الله الاتكال والاعتماد عالغير اذا كان في مجال خصووووووصاً الرجل. ف انتي رايحه تراويه بنفسك ان عندك فلوس وتشترين للبيت وتشترين للابناء و و و و . غلط حبيبتي. حتى لو قصرتي على بيتك فتره معينه حتى تراويه ان انتي مش قادره تشلين الدنيا بروحك سويها! مب لازم تقعدين تشترين كماليات للاطفالك امام عينه وتترسين البيت اغراض امامه. واذا واجد في خاطرك شغله قوليله هذي من عند قرايبي هديه. المهم تحسسينه ان انتي نقص من راتبك وصارت عندك نقص فالماده واللي عندك يلا يكفيك.

خامساً، زوجك ماراح يدور على عمل الا اذا نضغط ف لا تتوقعين نفسك تصرفين عالبيت وتدلعينه وبعد يروح يدور وظيفه حاولي قد ماتقدرين تقنعينه باسلوبك ان لازم يتوظف واذا حب راح تساعدينه تدورين له مكان.

واخيرررررررا واهم نقطه عزيزتي، مب لازم تسافرون. انا عندي فلوس ولله الحمد وشايفه خير وقاعده في بلادي. السفر مش حياه او موت. السفر كماليات. و الاولى ان هو يسويلكم شيء بمقدوره حتى لو اخذكم لفندق داخل المملكه!! شيء على امكانياته فقط!! و اذا كنتووووو حابين السفر جداً ولا صابرين عليه تسوون صندوق حق السفر اول آلسنه تخططون فيه انتي وهو كم كل واحد يحط بالشهر في هالصندوق عشان تسافرون نص السنه او بالصيف.

لا تضغطين على نفسك مادياً، ولا تكرهين نفسك في زوجك، وكل شي بالتفاهم. والسفر اخر الهموم اول شي فكري كيف تصلحين وضعكم المادي وكيف تحفزين زوجك على العمل وكيف انك تعرفين شو اللي لك واللي عليك فالبيت. تابعي دكتور جاسم المطوع في موضوع الميزانيه راح يفيدك.