أبي مشورتكم

السلام عليكم خواتي

والله مو عارفه من وين ابدا موضوعي بس تعبت من التفكير وحبيت اخذ مشورتكم في امر

انا خوالي من زمان مهاجرين من الكويت صار له 15 سنه مو شايفتهم
المهم عندي خاله بالدانمرك عايشه ومستغره حياتهم هناك
وانا واخواني دايما نتكلم معاهم على الماسنجر ضحك وسوالف مقالب نسوي مع بعض
وما اكذب عليكم انا انعجبت في ولد خالتي اللي اكبر مني في 4 سنوات بس ما قلت له وخليت تعاملنا مع بعض مثل الاخوان
في يوم من الايام تفاجأت وهو يقولي انه يحبني ويبي يجي الكويت يخطبني وقال ابي رايج انتي شنو احساسج صوبي
قلت اني فعلا معجبه فيه وبشخصيته وووو
وكان هو قبل لا يكلمني في موضوعه يقولي ويتكلم معاي بكل صراحه قالي انه كان يحب وحده من سنتين بس اتركته وتزوجت غيره واشياء ثانيه يعني

وكذا مره يقول انه ناوي يجي الكويت ويخطبني بس يقول انه بعد سنتين عشان يقدر يتزوج من بره ويسمحون له

لانه هو مغير مواليده والحين يوم غيرها صار عمره 22 سنه

بس يقولي امانه اذا جا نصيبج روحي بنصيبج ولا عليج مني واذا تميتي على حالج وجيت انا الله يتمم بخير

بس سألته انت قلت حق خالتي عن هذا الموضوع قال لا

قلت له ليش ماقلت لها المفروض خالتي تعرف

قال هذا الموضوع يخصني وانا مو صغير

قلت له حتى لو مو صغير المفروض الاهل اول من يدري في هذا الموضوع

قال انا ما ابي افاتحهم في هذا الموضوع الحين الا اذا قرب الموعد يعني بعد سنتين بقول حق امي وابوي
قلت له ويمكن خالتي ماتبيني قال لا ما اعتقد ترفض

وانا ادري بخالتي انها تموت علي وتحبني حيييل
والله ما ادري هل استمر معاه ولا اسكر الماسنجر خير شر ولا عاد اوريه رقعت وجهي

على فكره صليت صلاة الاستخاره وبنفس الليله حلمت اني انا وبنت عمي نصعد على سلم ووصلنا عندي مكان مثل البالكونه ولقينا زوجة عمي ومعاها شهاده مكتوب فيها قبووووول انا احترت في بداية الامر هل الحلم لي ولا لبنت عمي لانه وقتها بنت عمي كانت تمتحن الثانويه العامه قلت اشوف النتايج اذا انجحت بنت عمي الحلم لها اما اذا ماتوفقت فهو لي وفعلا بنت عمي ما انجحت جابت دور ثاني

والحين محتاره والله
وادري اذا قلت حق امي راح تشيل الكومبيوتر من اساسه وتعصب وتسوي لي سالفه
وانا ما ابي الكومبيوتر ينشال لانه هو الوحيد اللي اقضى فيه وقت فراغي ماعندي شي اسويه

تكفوون ابي مشورتكم